ब्राबासे आसेनान– पाप्जि
पाप्बा हेन्सेन हिन्ना
रेबारि लोप्जि ओम ब्राबारि सेजि ।
पाप्बा दुइरिम
ङा ल्हाप्तेपाप्तेसे नाङजि
ओम धुलो खिदिसे नाङजि ।
ङादा मोक्कोन मोक्कोनसे नाङजि
गज्जब ङ्हाम्ला
काङ आरेबासे नोन नाङजि ।
दातेजा
नाङबाला सहानुभुतिसे
बजेडो नाङचिमुला ङादा ।
ङाइ सेम लामुबा
लाबासे ङादा गोलेसे नाङगाइ
अक्सिजन ब्रानचिबा
कुला ग्लोबारि नाङगाइ
तासाइ स्यान्दोन ग्लारि ब्योङचिजि
थुर्बाला आभास सुताइ आपिन्नि ।
ल्हुइला रफ्तार– म्हान्बा ह्राङबा
न्हा गोलेसे मुबाचिम न्हा योना मुबाचिम
जेक्खे थेलान अचम्मला गति मुबाचिम ।
चु नुप्बा घटनाहेन्से–
याखारगि परिबेस
ङाला न्हाब्याङरि ठोक्सि
चुह्राङलासि केसिकेन निजि
ताङसे छिगजुगु ह्राङसेन ब्रिबान
एला मिरि छिग छिगला अर्थ
ल्हागाब ल्हागाब लाबाकेन–
ङ्होग्याम स्योर्सि निजि बिसाम,
तिला गे ताला ?
दातेदोना डोसिकेन खाबा
एला चु नुप्बा चेतनाला ?
ङा पाप्सि रेबा
घाइते म्हि– ल्हुइला युद्धग्याम
स्तब्ध ताजि ।
ङा सरल म्हि
तिक्खुरि !
जटिल ताजि ल्हुइला गनितरि
ओम ङाइ ब्रितोबा मुबा
ल्हुइलान फर्मुलारि
भाग्यला ज्यामितिय कोनजुगु ।
पाप्बा– ल्हुइला नुप्बा अर्थ चिम
रेबा– ल्हुइला ल्हानान साइ चिम
म्हानालाबा– सोबारि लोप्बा प्राकृतिक यन्त्र चिम ।
ङा पाप्सिन गा !
ङाला ल्हुइ फिरि रेजि ।
ङा रेसिन गा !!
ङाला ल्हुइ सोजि ।
ङा सोसिन गा !
ङाला मिन एला तिङरि ब्रिजि ।
