ङाला हयुलरि गे आयाङमा
प्रमाणपत्रला थुप्रो कादे पि ब्याङसि
पत्रिकारि खाबा बिग्यापन च्यासि
मेन पावररि पासपोर्ट थोसि ङा दोमा
मेनपावरग्यामसे ल्हाना आश ओन्जि
ल्हाना टाङगा सोसि बाला बिसि ।
चु सेम फुर फुर ताङजि
जक्कि मुबा म्हार म्हुइ चुङसि
आयोबादा छे म्हाइजि या ताजि
मेन पावररि पोप लाबा टाङगा पिनिजि
तिनि बिमा न्हाङगर बिमा
हावाइजहाज क्रेसि निबा दुइ खाजि ।
चु सेम आउदिन क्राबा सम्मान क्राजि
आमा एला जामेमि मुग्लान हयुलरि
ल्हाना टाङगा स्होसि बला बिसि
साहुदेन बन्दक थान्बा दिम हवारि
खप्ला बिसि ज्याबा क्वान्बा चला बिसि
आमा ङा मुग्लान हयुलरि दोजि ।
थे म्हिला हयुलरि ग्योइ आसेजि
तोर निउ बिमा मर निजि
टिउ बिमा रप्जि रप्को बिमा टिजि
बाउबिमा ताजि न बिमा पिन्जि
आमा एला जामे मि तिनि
मिख्लिला ग्योइ छ्याना क्रातोजि ।
चाबा थुङबा म्हेर्बाला ठेगान आरे
पशुदा ह्राङ ठित्पा ग्लारि
लिच्छा लिच्छा ब्राजि
गोल्सेसे दुइ निजि ला निजि
ङादम टाङगारि किन्बा म्हि हिन्ना बिजि
तिला बिबा थे गेनोन लतोजि
आमा थे दुइरि एला जामे मि
न्हा सिबारि खाम्जि
न्हा सोसि ल्हाना टाङगा बाखम्जि
मिख्लिला धारा पुइसि क्राजि
साहुदा च्योल्बा दिम हवारि जिसि
केवा हयुलरि खाइ बिबा खा अखम्जि ।
आमा एला जामेदम तिनि
च्युप्सि थन्बा पशु सोजि
थे तसि आमा
मुग्लानरि खलाइ निला बिसम
पाङसि पिन्गो ह्या
थोसि खाबा म्हाङ म्हाङनोन दोला बिसि
मुग्लानरि टाङगा दोङ आरे बिसि
मुग्लानरि म्हि सेम थोबा म्हि आरे बिसि
म्हिसे ओन्बा आशला लिच्छा आब्राउ बिसि
ङाला दुङाल पाङसि पिन्गो ह्या
खम्साम सास अखम्साम लास
खाला बिसि ग्यालाम च्यागो ह्या
पाङसि पिन्गो ह्या ?
रोसि गाउँपालिका, काभ्रे