याम्बुला निजि लोपखाङरि डोबा पासाङ कक्ष ब्लिला अन्तिम जाँच पिन्बा तयारि लाबान मुबा । कोरोनाला हल्ला खाजि । जाँच पिन्ना आम्याङनान लोपखाङ बन्द ताजि । सरकारसे कोरोना कोला बिसि लोपखाङ जे आहिन म्होकोन गेदिमकादे आठोङना बन्द लाजि । मटरगाडिकादे आस्याङनि । पासाङला आपाआमासेन ल्हुइरि खाइमाइ आथेबा लकडाउन बिबा ताजि । लकडाउन बिबा म्होकोन काबाडुङबा । खाइमाइनोन नाम्सारि आनिना याम्बुरि जे चिबानखाबा पासाङला आपाआमा नाम्सारि काङ आजुबा लिच्छा फुप्सि जिन्बा दिम थेन म्रा फुइबा ह्वारि बु मुबा ग्लारि निजि । याम्बुग्याम ल्हानान थारेङ । सडक सुत्ताइ आदोबा । बिजुलिलाम तामनोन आलाइ । मोबाइल फोनला टावर तिगाइ आदुइबा ग्ला । पासाङला आपाआमा ह्राङनोन ल्हानानसे ख्लासि ब्राबालिच्छा बिरुप ताबा, दिमकादे फुप्सि म्रा फुइजिबा । ह्वारि बु खेतिलाबा म्हि आरेना बाँजो । टापटाप म्रा थेन पुजुला जाङ दोचिबा । चुराङबा ग्लारि दोजि पासाङ आपाआमादेन ।
सहरला सुविधारि चिबाकादेला दोहोलो ताजि । म्हिदा ल्हुइ बिमा ग्रेन तिगाइ आता । सोबाला लागिरि म्हिसे खातमान गारो आप्ठ्यारो तासाइनोन नातोला । नाम्सादा हेला लाबाकादे कोरोनासे सिला बिसि नाम्सारि गो छुम्बारि निबा मुबा । नाम्साबासे पालोसेन ब्राङदिमकादे स्होबारि तिजि । आपाआमा, म्हेमेमामसे टु ब्योङना लासि छाबा काराङ दोचिबा सा ट्वाइबारि तिजि म्हिकादे । तिगाइ नाम्साला मायासे थेनोन सा ख्रुङसिचिबाकादे बिसाम सहररि सुप माबाकादे नाम्सारि दोसि खाबा म्राङसि चुह्राङबा रेनोन खाबाजिम मान्सिचिबा मुबा । पासाङ बिसाम सहरला सुविधा मुबा तामकादेदा डान्सि झोक्राइदिसि चिजि । क्लाङबा स्हे तिगाइनोन आरे । याम्बुरिन चिजि । लोप्खाङ आनिबा दुइ जत्तिखेरन क्लाङबा आपा थेन आमाजाला मोबाइलसेन गे आलमाहेन्से पासाङ तिगा लाउ तिगा लाउ ताजि । क्लाङबा ह्रोनोन आरे । अर्कु दिमरि निसि ह्रो माइसि क्लाङबारिन ङामरि आरे । क्याच्चा गाङरि दोतोबा । आपाआमा चिबाला बन्दोबस्त लाबारिन बेस्त ताजि । पासाङ बिसाम थोमथोम बोरसि चिजि । आपाआमादा सहररि निगे बिसि बिबारि तिजि । लकडाउन थुम्बाला छाट आरे ।सहररि दोबा ताम आतानि । पासाङदा तिगा लासि नाम्सारि थान्बा बिबा थेला आपा आमादा पिर ताजि । वाम्बारि मुस्किल ताजि । सहररि टिभिरि कार्टुन च्याबा, मोबाइरि गेम क्लाङबा पासाङदा नाम्सारि तिगाइनोन आरे । पासाङ चुराङलासि गिक्छा रेम नाम्सारि चिबा हिन्ना । खाइमाइनोन थेदा आपा आमासे नाम्साला ल्हुइला थुमरि पाङबान आरेबा । थेसे चुह्राङबा म्राङबान आरेबा । थेला संसार बिबान लोपखाङ निबाहाबा, टिभि च्याबा, गेम क्लाङबा मुबा । सहरबजार झिलिमिलि चुनोन मुबा थेसे म्राङबा संसार । अर्कु संसाररि नितोाम थेदा गारो ताबा स्वभाविक हिन्ना । कोलाला अवस्था म्राङसि आपाआमासे मान्जि कि जाम्बुलिङ बिबा चुनोन गोरगिक हिन्ना । म्हिल्हुइला गोरगिक पक्ष दात्तेदोना कोलादा आओन्ना थान्मा थेसे तिछ्यामान नातोमा कोलादा गारो ताजि ।
पासाङला आपाआमासे कोलेसे कोलेसे पासाङला नाम्साला जनजिवन लोप्पारि तिजि । साप्रायुङबा, लाबा, दोङ, स्योङ, गाङहोप, रा, मे, मुइ, नामेकादेला जाम्बुलिङ । नाम्सारि याङबा चाबा स्हेकादे, दोङरि रोबा रोकादे, अन्नबालिकादे । चाबा तारिकाकादे लोप्पन निजि । पासाङदा चु म्होकोन स्हेकादे सेम निबारि तिजि । क्यायाङ गाङला मामला दिमरि मुबा राला कोला थेन म्हेला कोला पासाङला ह्रो ताबारि तिजि । पासाङसे थेरि अर्कु ह्रोनोन स्याप्चि, नवाङ । थे नाम्सालान लोपखाङरि कक्षा ङारि डोबा मुला । लोपखाङरि घण्टगिक ब्रासि नितोबा, लोपखाङग्याम खासि नागा छातोबा, राला कोलादा ङ्हे ख्वातोबा, दिम सेङतोबा थेन क्युइ तातोबा थेला गे मुबा । पासाङ थेन नवाङ ह्रो मि ताजि तर ताम लाबारि गारो ताजि । तिगदा बिसाम पासाङदा तामाङ ग्योइ आखा । नवाङ लोपखाङरि निमाहेन्से ज्यार्दि ग्योइ खामुला तसाइ ओदे ज्याना जा आहिन । ह्रो तामाहेन्से थेनि ङिसे ह्राङह्राङला तोसोसे ताम लामा ग्योइ गिसे अर्कुला लोप्पान निजि । पासाङसे म्होकोन तामाङ ग्योइ गोजि तर पाङबारि जा आखाम्बा ताजि । पासाङ दारेम नाम्सारिन ताङबारि तिजि । तामाङ ग्योइ दिमरि ङ्यासे ङ्यासे आपाआमादेन खासाइ आखासाइ पाङबारि तिजि । आपाआमादान ह्राङकादेसे ग्योइ सेसाइनोन कोलादा दान्देदोना आलोप्ना थान्बाथोरि आज्याना ङ्हाम्जि । ‘ओहो खुयु कोरोनासे लासि ह्याङला कोलासे ग्योइ सेजि होइ ।’ पासाङ आपासे आमाजादा ताङ्सि बिजि । आमाजासेन बिजि, ‘कोलासे ग्योइ सेजि, नाम्साला रहनसहन सेजि, चु ह्यामसेम ह्याङदान ल्हानान ताम लोप्चि म्हाले ।’
तिनिबिमा न्हाङगार बिमा लकडाउन आजिन्नि । पासाङसे बिसाम तामाङ ताम, नाम्साला ल्हुइ म्होकोन थाहा याङजि । सहरला क्लाङबा स्हे, कोर्बारि निबा पार्ककादे, टिभिरि च्याबा कार्टुननोन म्लेबारि तिजि । रमाइलोम कादे कादे । खाइमा स्योङरि तारङाला कोला चुङबारि निबा । खाइमाम पुलुङ चाबारि निबा । नाम्साला ह्राङदेबान ह्रोकादेदेन रा मे छाबारि निबा लाजि पासाङसे । पाडाम्हेन्दो, डाँफे नामे, मे, मुइ किताबरि जे डोबा पासाङसे हिन्बारिन म्राङजि । थेनिकादेदेन क्लाङबारि म्याङजि । याम्बुरि प्याकेटरि खाबा ङ्हे मे मुइसे खाराङ लासि पिन्बाजिम बिबा थाहा याङजि । म्ल्ह्ला बोरा जे म्राङबा पासाङसे सुन सुबा हेन्से खान्बा थेन सुनग्याम म्ल्ह्ला दोबानोन थाहा याङजि । कोरोना ह्यामसे लासि पासाङदा चु म्होकोन तामकादे सेबा अवसर डिक्पा हिन्ना । कोरोना ह्याम मि च्याङबा बिमाइनोन ल्हेबान निबा मुला । लोपखाङ खाइमा ठोङबा थाहा आरे । लोपखाङ ठोङबाला ठेगान आरेसाइ पासाङ थेन थेह्राङबान कोलाजगुसे ल्हानान ताम बिसाम लोप्पारि म्याङबा मुला ।
कोन्ज्योसोम गाउँपालिका–२, बागारगाङ ।
