हनुमानसे दिनि ग्लोङ्जि

गोर्गि रमाइलो ह्रि मुबा । थेरि तिरेकुनु गोर्गि माकारसे तोक जेबा कोला न्हाजि । कोला उदेकला मुबा । केबा तिलाइ दुइरिन थे मुरि फ्याङबा चुजि । थे ल्हानान कोङबा मुबा । दोङला गोर्गि ह्याल्ङाग्यामसे स्ह्यान ह्याल्ङारि छ्योङमुबा । ग्रेन ग्रेन दोङला ह्याल्ङा गोर्गिन यासे क्युइमुबा । थे जाजाबा जात्तुकुला बाङ म्राङसि नाम्सामाकादे उदेक तासि च्यामुबा । थेनिकादे जात्तुकुतेन छ्याम ल्हानान लोङए लोङमुबा ।

तिरेकुनुला ताम हिन्ना, थे जात्तुकु पाङगेलरि प्लिङ ताटिमुबा । थेला मिरि दिनिला टाक टाकाजि । थेसे दिनिदा च्याआखाम्जि । थेसे जोक रेबान दिनिदा च्याजि । चुर्से ओर्से ल्हेसि दिनिग्यामसे ख्याप्के लाजि । दिनि फ्रिस आताजि । थे लिच्छा थे दिनितेन झन जोक रेजि । थेसे ह्यालाइ पुइगासि दुक्ख पिन्बा वाला फोल्तोङदा दाबे ध्यान पिन्सि च्याजि ।

पाङगेलरि टिना टिनान थेदा ल्हानान फो ख्रेन्सि जिन्मुबा । थेदा थे वाला फोल्तोङ ब्रोइ खाबा स्हे चाबा सेम ताजि । थेला सुङग्यामसे ठ्वा खाजि ।

“ओहो ! थे वाला चाबा स्हे चाम्याङसाम कादे माजा तासेला !” जात्तुकु फुर ताङबान क्रिङजि ओम बाङसे ब्रुक छ्योङसि डोङ रेजि । थे लिच्छा थे प्लेनह्राङ लासि वाला स्हे चाबारि मुपाट्टि फ्याङजि । फ्याङबान फ्याङबान ल्हानान थारेङ दोसि लिच्छा थे वाला स्हे मुबा ङामरि दोजि ।

“ओइ ! जाक्कि थारेङ टिउ, ङा ल्हानान लेप्पा मुला, ए नाथे बिजा फ्योट ड्वाङना क्रोसि मेफ्रा दोला दाबे !” वाला फोल्तोङसे जोक रेबान बिजि ।

वालाला ताम थेसि जात्तुकु झन जोक रेजि । थेसे क्रिङबान बिजि, “ओइ एसे ङादा लेबाफेबा लाबा ? ङा जात्तुकु हनुमान हिन्ना । तिनि ङाइ एदा आचाना आख्ला !” हनुमानसे जोक रेसि पाङजि ।

जात्तुकुला ताम थेसि वाला फो न्हाइसि न्हाइसि नेजि । थेसे फुइ लाबान पाङजि, “ओइ ! मुर्ख जात्तुकु ! ङा दिनि हिन्ना । ङादा थुर्बाइतेन ए क्रोसि मेफ्रा दोला ।”

“ओइ ! ङादा मुर्ख बिबा, दारेम ङाइ एदा चाला ।” जात्तुकु क्रिङजि । थे लिच्छा थेसे आ … आ … लासि ग्रेन सुङ लाजि ओम दिनिदा मिल ग्लोङजि ।

दिनि ग्लोङसि लिच्छा हनुमानला जिउ ङ्हाज्याङ ताजि । थे गोल्छेसे फ्याङबान फ्याङबान जाम्बुलिङरि फ्लिक दोजि । जाम्बुलिङरि दोकासि लिच्छा हनुमानसे उदेक म्राङजि । थेरि चुर्से ओर्से दोप दोप मुबा । थेसे थेरि मुबा साक्तान म्राङबारि खाम्मुबा । थेदाचा खालाइसे म्राङबारि आखाम्मुबा । थे लिच्छा हनुमान गोर्गि तोङजा बिघाला पाङगेलरि दोसि प्लिङ तासि म्हेर्जि ।

सेकेन्ड सेकेन्ड तासि दुइ निजि । दिनिला ह्यालाइ आरेना जाम्बुलिङरि तोसा ताजि । म्हिकादे अक्सिजन आयाङना क्राबा क्रिङबा चुजि । दोङ म्राकादे कार्बनडाइअक्साइड आयाङना खार्सि निजि । न्हाबेङ गि न्हाबेङ ङ्हि ताबान मुग्यामसे दिनि म्हाबा साङग्युर चुर्से ओर्से साक्रिन थेजि । ग्रेन ग्रेन बाइज्ञानिककादे रकेटरि क्रेसि दिनि म्हाइबारि ब्राजि ।

टुडिखेलबिमा तोङजा तोङजा ग्रेन पाङगेलरि जाम्बुलिङला छाङमान क्राबा क्रिङबा लासि पोप ताजि । थेनोन पाङगेलरि अदृस्य तासि हनुमान म्हेर्सि टिमुबा । गि ङ्हि सोम ताना तानान ग्यार्जा तोङजा म्हिकादे पोप ताजि । पाङगेल हुलसे प्लिङजि । थेनिकादेला नाइके नोन दोकाजि ।

“ह्युल्बामाजुगु ! ह्याङला रकेटसे दिनि म्हाइबारि आखाम्जि । खाइ दिनि खालाङ म्हाजि ? तिलाइ था आताजि । दारेम ह्याङ साक्नोन सिबा ताजि । जाम्बुलिङ दारेम सोङ सोङ खार्बा ताजि ।” नाइकेसे सुर्ता ताबान बिजि । नाइकेला ताम थेसि ह्युल्बामाकादे क्राबा क्रिङबा लाबा चुजि । थेनिकादे लोङसि चुर्से ओर्से ह्यार्बा चुजि ।
ठिक थेनोन दुइरि पाङगेलरि म्हेर्सि टिबा हनुमान फेत छोर्जि । छोर्बाइतेन थेसे म्राङजि– गोर्गि बुमो मिख्लि प्रुलुलु पुइसि क्रासि टिमुबा । थे सा डुइबारि ज्योआतानागि सिबारि छेबाइगे मुबा ।

बुमोला थेराङबा दो म्राङसि था आयाङना हनुमानला सेम ङ्युजि । थेसे बिजि, “लु चु दिनिमि जाम्बुलिङरि टिबा म्हिकादेला का ह्रो टिम । लु दिनि निउ ङाइ एदा ख्लाजि । सात्तान ह्युल्बामाला सेवा लाउ ह्या वा ! चुर्से ओर्से लासाम ज्याबा आता । ह्युल्बामासे ठिक लासेला मुला । दात्ते जाम्बुलिङरि नोन गनतन्त्र खाबा मुलानि !”
दिनिसे “ताला ।” बिजि । थे लिच्छा हनुमानसे आ … लासि ग्रेन सुङ लाजि । दिनि फिक्र्याप प्योल थोन्जि ।

दिनि फेबाला पायान ह्युल्बामा ताङजि । थेनिकादे फुर ताङसि स्याबा चुजि । थे लिच्छा दिनिसे खाइमाइ ह्युल्बामादा जाजा बिसि लेबाफेबा आलाजि । थे तासिन तिनि नोन छाङमा तान च्योच्यो ह्यालाइ दोन्बा थेदा छाङमासेन “दिनि ला” बिसि चेकाइ लाबा, तिङ नाबा थेन ज्याल्बा लामुला ।

दो:बा : ईश्वर थोकर