लोपखाङरि ङाला डिक्पा ह्रोकादे ल्हानान मुला । मिन नोन तेतोमा– अस्मिता, सोनिका, सर्मिला, सङगिता, रसिला, सोनियाँ, चाँदनि, आइस्कान, कृष्णा, वन्दना, पुजा, सुस्मा थेन रेविका ङाला कक्षाला डिक्पा ह्रोकादे हिन्ना । थे ह्रोकादेरि नोन ङातेन आउदिन डिक्पा ह्रो चा कृष्णा ख्वालापाला छानला बाइ ह्रो हिन्ना ।
कृष्णा ह्रो थेन ङा चु बिमा ङ्हा दिङ ङ्हाच्छान ह्रुप तामुबा, गोर्गि लोपखाङरि । थे ह्रो जामा दुइरि छार लोप्डा ताबासे खालाइ ह्रोकादेतेन, खालाइ सर मिसकादेतेन छ्याम ताम आपाङबा । पेसि कुटिसि टिबाह्राङबा ह्रिक्पाला म्राङमुबा ।
कक्षा ब्लिहेन्दे थे ह्रो ङा डोटिबा लोपखाङरि डोबारि खामुबा । ङाचा नर्सरिहेन्देन थे लोपखाङरि डोसि खामुबा । ङा ङ्हि कक्षा ब्लिहेन्देला ह्रो मुबा ।
थे ह्रोसे सर मिससे दोन्बा होमवर्क दुइरि जिन्ना लामुला । होमवर्क जिन्ना लासि ह्रोकादेतेन छ्याम स्हेसि तेलकासा क्लाङबारि जान्मुला । होमवर्क लाबा ह्राङ लासिन तेलकासा क्लाङबा ह्राङ लासिन थे ह्रोसे दिमला गेए नोन आपाआमासे आकुल्जिमा नोन हुर जान्सि लामुला । थे ह्रोला सेमए नोन आउदिन ज्यामुला ।
सेमह्राङ लासिन हेन्ड राइटिङए नोन ज्यामुला कृष्णा ह्रोला । ह्यान्ड राइटिङरि थे ह्रोदा नाङबा कक्षारि खालाइ आरे । थे ह्रोला ज्याबा ह्रिक्पा चा थे ह्रोसे सात्तान सर मिससे दोन्बा होमवर्क आम्लेना लामुला ।
थे ह्रोसे ह्राङबिमा ग्रेनदा क्वाइ लाबा÷जात्तुकुदा चेकाइ लाबा लामुला । थे ह्रोसे लिच्छा–लिच्छाम ह्रोकादेला गुङरि नोन ताम पाङबा चुजि, पेबा सेमदा स्वाल ब्लासि ।
कक्षाला गिक्छा लोप्डा आतासाइ कक्षारि ह्यान्ड राइटिङ ज्याबा ह्रो ताबासे थे ह्रोदा छाङमान ह्रोकादेसे चेकाइ लामुला । सर मिससेम झन बिनोन आतो ।
थे ह्रोला दिम थेन ङा टिबा डेरा थारेङ आरे । ङा टिबा डेराग्यामसे थे ह्रोला दिमरि दोबारि मिनेट गि सुत्ताइ ल्हागाप आतानि । थे ह्रो थेन ङा लोपखाङरि नोन छ्याम नोन निमुला । लोपखाङसे दिमरि नोन छ्याम नोन खामुला ।
कृष्णा ह्रो ङाला बेञ्च गिरि टिबा ह्रो हिन्ना ।
थेह्रो थेन ङा लोपखाङरि निआतोबा दुइरि खाइमा खोपाङला न्यातपोल लाथान, खाइमा लायकु, खाइमा सुकुलढोका ओम खाइमा चा सुर्यविनायकला गणेश लाथानदोना कोर्बारि दोमुला ।
ङादा चटपटे आउदि सेम तामुला । ङादा ह्राङ लासिन कृष्णा ह्रोताइ नोन चटपटे सेम तामुला । कोर्बा ताङदा ल्हुङ गाप्सि ङा ङ्हिसे खाइमा–खाइमा चटपटे नोन चाबा लामुला ।
ङाला तिङमा ह्रो कृष्णादा तिरे ह्रुप ताआम्याङसाम ङादा खाराङ–खाराङ तामुला । तिला म्लेजिह्राङ, तिला ख्लाजिह्राङ तामुला । थे ह्रोताइ नोन ङादाह्राङ नोन तामुला ताला ! तिला म्लेजिह्राङ, तिला ख्लाजिह्राङ । खाराङ खाराङ ।
