सोनाम थेन लोडे ल्हानान डिक्पा ह्रो मुबा । बागरगाङ नाम्साला लोप्खाङ गिरि ङिनोन कक्षा गिकरि डोबानरि निबा तेरेरे ला ङा/डु जे ताबा मुबा । लोप्खाङ निबा ग्यामरि कालाङला दोङ मुबा । नाम्सा क्योङरिन थे दोङ गिकजेन मुबा । लोडेला दिमरि आपाआमासे कलाङला गेडा ग्लोङसाम फोरि दोङ फुइला बिसि लोङना लाबा मुबा । ह्राङला जासे कलाङ ग्लोङसि गाला बिसि ।
कलाङ मिन्सि उरउर तागाबा मुबा । दोङरि ख्रेबा आट मि खालाइला आरेबा मुबा । कि युङबासे रोप्सि, कि हुर्सिङ ल्हिसि ताइना लातोबा मुबा । मिन्गाबा दुइरि ह्राङनोन कलाङ दोङटारि क्यार ताइबानोन लाबामुबा । तिरेकुनु स्ह्योरि लोप्खाङ निमान लोडेदा कालाङ चाइ चाइ मान्बा मुबा सारि ताइबा म्राङसि । तासाइ लोप्खाङरि दोबारि गाइबासे यारि छ्योइकादे ख्वाइबान छ्योङबा लोडेसे सेम खिजि ।
सोनामदा बिजि, ‘ओ होइ, कलाङ चाइ चाइ मान्बा मुबा, गाइजि मास्टारसे छेक्ला, दारमा दोगामा जा चातोला या ! ।’
‘हँ ङादाम आताङबा गा चाउ ऐ क्युङबा कलाङ ।’ सोनामसे पाङजि ।
बुटुटु छ्योङबान लोप्खाङ दोजि । लोप्खाङरि मास्टरकादेसे लोप्पा कक्षारि चिबान लामा दिगु चाबा दुइ ताजि । सोनामसे ग्वाला गेङ थेन लोडेसे जा मागाइ थेन मोठे रोबा बोर्बा मुबा ङिनोन दिगु ग्लागिरि चाजि । देप्पेन कक्षारि चिजि । डोबान लामा घन्टि ङ्याजि । सोनाम थेन लोडे कुज्युलटारि छ्योइकादे ख्वाइसि दिमरि खाजि । ग्यामरि खाबान लामा देप्पेन कालाङ दोङ टारि दोगाजि ।
सोनाम सरासर ब्राबान मुबा, लोडेसे बिजि, ‘ओइ, ब्रानोले कालाङ चाइ ।’
गोर ङा डु दुइसि पाइटला गल्दारि युजि, गोरगि जा सुङरि । न्हान्दा गाङरि दोबादेन दिमरि सरासर अनिना थेनोन कालाङला गुच्चा क्लाङबारि तिजि ङिनोन । क्लाङबाला सुररि लोडेला सुङरि मुबा कालाङ ओल्बोङरि फ्युस निजि । लोडे क्राबारि तिजि । गासि आहिन कि आपाआमासे पाङबा ताम डान्सि लोङसि ।
सोनामसे ङ्योइजि, ‘तिगदा क्राबा ?’ ‘ङाइ कालाङ ग्लोङपुइजिम…..।’
क्राबान लोडेसे बिजि । सोनामसे झन लोङना गि बिजि । ‘हो…., ज्याजि दारेम लोडे, ऐला मिननोन लोडे, कालाङला दोङ फोनोन प्लोक चाल्सि फुइबादेन ताला फ्लोडे ।’
लोडे झनोन ग्रेनग्रेन काइ तेसि क्राजि । क्राबान क्राबान दिमरि दोजि ।
आमा ह्रान्दा स्याङबान मुबा । कोला क्राबान खाबा म्राङसि आमासे ङ्योइजि, ‘तिगदा क्राबा लाइनु ?’
हिक्कु डुइबान क्रासि जे चिजि । ‘आहिन चुदा खालाइसे छेक्पाकि तिला ? कि सरसे छेक्पा ?’ आमासे ङ्योइजि ।
तिगदा क्राबा बिमा तिलाइ अबिबा तासाइ क्राबा आख्लाबातेन आमाजादा तिगा लाउ तिगा लाउ ताजि । क्याच्चा दिमला माम लोडे क्राबा थेसि खालारि दोगाजि ।
सुङजि, ‘तिगदा क्राबाला क्राबान लाबा चु ब्राबा जाजा, क्रालि माङसे स्याप्चि कि तिगा ?’ ।
लोडेला आमासे पाङजि, ‘खाइ माम ङाम तिगा लाउ तिगा लाउ ताजि, खालि फोरि जे साम्सि क्राबा मुला, फोस्हुखाबा वा ? दिगुन चाबा आरे ।’
‘ग्यालामरि क्यार माङसेन वा स्याप्चि तिरेम बोम्बो जा बोर्सि च्यागो’ मामसे देप्पेन सुङजि ।
लोडेला बिसाम सेमरि लोङबा जे खासि चिबा मुबा । कलाङला गेडा ग्लोङबा ताम सेगे कि आसे ? सेसाम आमासे बाङला । आसेसाम फोरिन दोङ फुइला ।
ओत्तेगेनरि लोडेदा गोरि लाप बुइसि आमासे नाम्साला बोम्बो साजिजा बोर्जि । बोम्बोसे स्युइबा फुइबा लासि पुइगाजि । लोडे डान्मा लोङसि क्राबा आडान्मा थेनचिबा लाजि । ङ्यासेला कान चाबा बेला ताजि छाङमान कान चाबारि ख्वाङ ताजि ।
लोडेसे कान चाबा छाट आम्राङबातेन आमासे कुरि थान्सि फुलफुल वाम्जि, ‘लो पाङगो ओम एदा तिगा ताबा, फोरि स्हुखाबा ? ज्याना लासि अलुना पाङगोयोम एदा ङा ज्याबाज्याबा क्लाङबा स्हे ग्लुसि पिन्ला ।’
आमाला ताम थेसि लोडेसे आमाजादा लोङसि लोङसि ताम सेजि, ‘आमा…ङाइ मि कालाङला गेडा ग्लोङजि, दारेम ङाला फोरि दोङ फुइला, ….हि हि ।’ देप्पेन क्राजि ।
लोडेला ताम थेसि आमा ङेजि । ‘लाउ लाइनु, ओल्बोङरि स्हुखाबा मुला कि आरे ? आमासे ङ्योइजि ।
लोडेसे मिख्लि फ्याबान बिजि, ‘अँ, फोरिन दोजि म्हाले गेडा ।’
ओते कोलाला ताम थेबालिच्छा आमासे लोडेदा वाम्बान पाङजि, ‘आक्रागो लाइनु, तिगाइ आताबा गा, लोङआतो, फोरिन दोङ फुइजिला ओम खाइमाइ ? आहिन्बा ताम गा चु ।’
आमाला ताम थेबातेन सा डुइबान क्राबा ख्लासि देप्पेन लोडेसे आमादा ङ्योइजि, ‘आमा, ओयामा ह्राङसे ङादा तिगदा कालाङला गेडा ग्लोङसाम फोरि दोङ फुुइला सुङबोम ?’
कोलाला प्रश्न थेसि आमाजादा सेमरि ङ्हाम्जि, ‘ओहो ! जात्तुगुदा आहिन्बा ताम पाङसि लोङना लाबारि आताबाजिम, हिन्बातामनोन पाङतोबाजिम ।’
आमासे लोडेला ग्राम्बारि स्योम्बान पाङजि, ‘कालाङला गेडा ओल्बोङरि गासाम सिला बिसि गा ओराङ पाङबागोम । दारेजा आग्लोङगो या गाला ओल्बोङरि’ लोडेदा आमाला ताम थेसि लोङबा माजि । क्राबा ख्लासि आपाआबातेन कान चाबारि वाङजि लोडे ।
कोन्ज्योसोम गाउँपालिका, ललितपुर
