दिम ग्याप पाटिला वाथिरि क्युइ खाबारि ग्लरुकग्लुरुक तासिटिबा मुबा । क्युइ ताइबारिन जकि गाइजि थे कुनु सत्ताला बिमा । वाथिरि क्युइ ताइबारि ग्लुरुक ग्लुरुक बिबा काइसे कालुला ङोराप ग्यामसे फेद छोर्ना लाजि । स्योला दुइ मुबा । स्यारग्यामसे दिनि फेबारि स्यार वालावाला तासि टिबा मुबा । कालुला दिम वाथिला ङाच्छा पट्टि ताबासे कालुदा वाथिसे पाक छेर्ना लासि फेद छोर्जि ङोराप ग्याम । लाम्हेला आखे पाराङ क्युइ तासि ह्रिरि ब्राजि । कालु जाजाबा हेन्से क्युइ क्लाङबारि सेम ताबा मुबा । जामा कुनु दिमरि ग्रेन म्हि खालाइ आरेबा ।
वाथिरि क्युइ ताबारिनोन खालाइ आदोगाबा मुबा । वाथिरि निसि कालु क्युइ क्लाङबा, लि ख्रुबा लासि क्वाननोन फ्योरफ्योर बामजिन्जिम । ओतेनोन दुइरि मायाङला नाना सुकुसे म्राङस कालुदा क्युइ क्लाङबा बिसि बाङजि । आमादा सेला बिबान कालु क्रासि दिम न्हाङरि वाङजि । दिम न्हाङरि वाङसाइ थेन टिबारि आम्हान्जि कालु । ग्राम्बारि मार मिख्लिला फोल्तोङ अजै पुइबान मुबा कालुसे । दिम न्हाङग्याम वाथिरि खालाइ मुबा कि आरेबा बिसि मि सुरसे च्याबान मुबा म्हि दिमन्हाङ तासाइ सेम कालुला वाथिरिन मुबा । स्यारग्यामसे दिनिला होइसेर ह्वगागा लेप्गाजि । दिनि न्हाङरि तोङगे गु दोना होइसेर ठाम्गाजि । माङगेरि थोन्सि टिगे म्हान्बा दुइ मुबा ।
खाङबाला दुइ ताला जिन्बा मुबा । काल माङगेरि थोन्सि दिमला छानो पट्टि च्याबा क्यार च्याबा लासि टिबान मुबा । मार्से आकुला दिमला ख्राङगारि ख्वाइख्वाइ बिवा कालुसे थेजि । काल ह्यारसि निजि । म्हिकादे पोपपोप तासि नेवाला मुबा । आखे, माम निनोन मुबा । गोर्गि छार म्हि नोन ताम लाबान मुबा । म्होकोनसे खबरकादे ङयोइबान मुबा । थे दुइरि कालुनोन छार म्हिला ङामरि निसि राप्सि टिजि । छार म्हि सेला ? बिसि कालुदा आखेसे ङयोइजि । कालुसे आसे पाङजि । क्याच्चा दिमला अफ्रेन कांजि म्हाले मालुला आबा मुग्लानग्यामसे खाबा पाङजि । कालु चि नेसि टिजि । मालुला आबासेन खाल्ला कोला चु पाङजि ।
माम माइलिसे तोर्से ताइला कोला म्हाले चु पाङजि । अफ्रेन कांजिनोन छाक्का तासि लुलु ङामरि खाउ बिसि कुरि थान्सि थोपो सुमसुम लाजि कालुला । कालु पेबा ह्राङ तासि लिरिन आच्याना टिबा मुबा । कालुदा तिला चालाओम पाङजि अफ्रेन कांजिसे । कालु तामनोन अपाङनि । ह्रेक छाकिमा अफ्रेन कांजिसे गल्दाग्याम केकेबा (चकलेट) तेसि न केक्रे बिसि पिन्मा केकेबा तासि टाप दिमरि ह्यर्बा मुबा । या नाङ केकेबा मुबा । थे दुइरि कालुला आमा घट्टग्याम दोगासि जिन्मुबा । आमा आमा मालुला आबासेम ङादाम केक्रे रो ।
केकेबा या नाङ पिन्बा बिसि फोतोतो बोल्सि नेबा मुबा । कालुदा केकेबा आउदिन सेम ताङबा मुबा । केकेबाकादे दाप्पा क्लाङबा ह्राङ लासि गि गि लासिनोन ज्याबान मुबा । केक्रे बिबा तिला आमा बिसि कालुसे आमादा ङयोइजि । केकेबा ल्हाना चाबा, ज्याबा म्हिदा केक्रे बिला आमासे पाङजि । थे तासि एदा केक्रे बिबा अफ्रेनसे बिजि । कालु जननोन फो न्हाइसि न्हाइसि नेजि ओम आमानोन नेना लाजि ।
काभ्रे
