ब्योन
वालाला आङरे क्वान क्वान्बा
चु पट्टि च्यागो म्हार क्वान्बा
साप्राला दरवार म्हालाङला
एनि छामेकादे खालाङला ?
म्हेला चोखो नौनिसे धुप् ताजि
तिला सन्जोगसे रुपताजि
छामे
तोजा मुरि फ्याङबा ग्वाइ म्राङसि
चिउनिकादे आलोङसाइ
नाका मामा लोङसि ङोर्टिबा
चु ब्योनकादे खालाङसे
गे से वा कि कोर्सि वा ?
सेसि खावा कि थोर्सि वा ?
ब्योन
रालाम मिनचाम कानासि
ओन्मान आमासे जा न्हासि
न होइ म्हिला जादा नि म्याङसि
न होइ म्हिला जामे बाम्याङसि
पहराला छ्योङ छ्योङरि
निलाजि जोवन हयोङ हयोङरि ।
छामे
गोठेला मालि म्हे स्योर्सि
सुन्न पुवागा चाचिबा टिम
खाप्पा नाम्साला ब्योनकादे
खालाइ छामे आयाङना
ह्योङ ह्योङ फ्योङ फ्योङ तासिनाम
छामे म्हाइसि ब्राटिबा चिम ।
ब्योन
रोसि स्योङला फाइला चाम
खाइ तिला पाङसे ह्लाना ताम
खारेरि क्वान्बा गलबन्दि
दिम ङाला सर्लाहि लालबन्दि
चु खाबा मंसिर लारि मि
लाइलोम ह्याङला ग्राङ जन्ति
छामे
मकर तालि गुगिला
ताम सन्कोले दुखिला
पहराला सिल्पा क्युइ
मान्जेरि युसि छाँया च्याला
एसे ङादा बिमाह्राङ आलासाम
गिग्बारि छान्सि राइ ज्याला ।
ब्योन
गुगिम डानडुन मे चोल्ला
गोन्बोला लादा फ्याफुल्ला
ङान्नाम दिमरि ब्राउ सेगे
साङाला तासाइ केम सोल्ला
सुनदा ह्लाङरि तोनिला
सेबाम दोन्ना मोनेला ।
छामे
खारबा सिङला कप्टेरो
ग्यालाम मुला अप्ठेरो
दिन्छे निसाम ब्यान्खाला
म्हुन्छे निसाम च्यान खाला
बाल्बोम ङयाबा सामसिमरि
नितोला स्योला रामरिमरि ।
ब्योन
चुपालसेला सायतरि
कादे ज्याबा तुम्बक तोक याङजि
सायर लासि थोतोला
ए ङाला ब्याहारि फोदोला
ए ङा ह्राङबा छ्याम डिक्सि
ताङबा दिमनाम सोतोला ।
छामे
पोरवा मामासे जाङ स्होजि
क्याम्साङ ह्रिला पाखारि
ङाला होइ माया मुसामि
खासि चिउ ङाला चु कुरि
सेमला ताम देप्पारि
दुख–सुख बो लाला ।
ब्योन
साल भन्ज्याङला ग्युरुरि
आउदिन नोबा साँगुला दोङ
कादेज्याना म्राङबा मरिन स्योङ
एला माया याङजि ङा ताङजि
तिनिसे क्यारला चुसे मारला
तासेला आरे ङा ह्योङ ह्योङ ।
छामे
आमासे थानिउ सुङमुबा
आबासे थानिउ सुङमुबा
रोसि स्योङला माझिसे
तार्ङा साइबा जाल रोप्सि
माइतला माया त ख्लासिमाम
ङा खाबा झ्यालग्याम फिर छ्योङसि ।
ब्योन
तोरतोर याम्बु सहररि
सिम्बु खस्योररि ला मुला
बर्खाला सिमसिम झारिरि
घुम कुसिमाम सुन सुला
ङाला लागिरि ए मुला
एला लागिरि ङा मुला ।
छामे
मार निबा बन्खु चागलरि
ह्रिरि रा म्हे छानिबा
हान्डो ग्युरु पेरो ग्याम
खाइमाम रा थेन म्हे छ्याम
ह्रबारि ल्हानान खामुबा
ङाइ माया लाजि एदेन छ्याम ।
ब्योन
तोर्सेला ज्योमो गाङ आगुर्ते
मार निबा गन्दि आङार्ते
सेमसे म्हान्बा डान्बा ह्राङ
ए ङाला सेम एन डिक्तोला
रा मुहि छाबा, म्हेदेन छ्याम
ङाइ लाला माया एदेन छ्याम ।
छामे
आलामा माया लाला जिन्जि
एदेन ङाला ताला जिन्जि
ए ङा डिक्सि चितोला
दुख लासि चातोला
दुख सुख जे तसाइ
ह्याङ ङि डिक्सि ब्रातोला ।
ङिनोन
आलामा माया लाला जिन्जि
एदेन ङाला ताला जिन्जि
ए ङा डिक्सि चितोला
दुख लासि चातोला
दुख सुख जे तसाइ
ह्याङ ङि डिक्सि ब्रातोला
