ल्हुइदा रग्घोर लाबारि ल्हुइरिन इम्म्युन सिस्टम जहिलेन तयार तासि चिजिबा ताला।फिक्र्यपग्यामसे वाङबा एन्टिजिन,ब्याक्टेरिया,भाइरस,प्रोटोजोवा,फङगस राङबा स्हेकादे ल्हुइला हाच्युबाइ ग्लाग्यामसे वाङजि विसाम थेदा ताप्पारि,सेबारि थेन चाबारि बिसि इम्म्युन सिस्टमसे इम्म्युनिटि पावार स्होबा ताला।थेसे लामा थे इम्म्युनिटिसे डादे दोना ल्हुइदा माइक्रो अर्गानिजमसे न्होङना लाबारि आहाम ।
ब्याक्टेरियाकादेरि स्टेफाइलोकोकल बिबा मिनला ब्याक्टेरियासे ख्रुम ताना लाबा ताला।थे ब्याक्टेरिया ल्हुइरि वाङबा हिन्से ल्हुइला इम्म्युन सिस्टमसे थे ब्याक्टेरिया थेन छेबारि बिसि तार का ला सेल पुइखाबा ताला।तार का ला सेलरि मुबा इम्म्युनिटि थेन ब्याक्टेरिया छेमा तार का ला सेल,टिस्यु थेन ब्याक्टेरिया थिसि ब्रुइ दोबा ताला।छ्यामरि थे क्वाराराला स्याकादेनोन थिबा ताला।थे थिबा स्हेकादे नोन न्होङसि ज्युसि न्हा दोबा ताला।थेनोन न्हा फिक्र्यप थोन्बा लिच्छा थेरि स्पेस मुबा पोगोल दोला। ख्रुम ताना लाबा ब्याक्टेरिया थे न्हाग्यामसे कोबा ताला।थे इम्म्युनिटि आबङबा ल्हुइदा अवसर च्यासि कोबा ताला।
ख्रुमला कारण था मुना मुनान थेन थेदा काबारि सेना सेनान थेसे ङादाइ आख्लानि।थे ब्याक्टेरिया स्टेफाइलो कोकलसे ङादाइ म्ह्याङजि। सेवा पिन्बा ग्लारि सेवा ग्राहिदा ताजिबा समस्याला कारण थेन रोकथामला बारेरि परामर्स पिन्बारिमि सजिलो ताला तर थे ग्राहकला ग्लारि ह्राङनोन पर्दिमा सामना लाबारि गाह्रो।सेवा किन्बा ग्राहककादेरि बो ङ्हाला बो गिमि इन्फेकटेड पोर थेन कट् इन्जुरि मुबा।थेकादेरि गोर्गि ङानोन ताजि।तिरेरि गोर ङ्हि सोम।आहानि बिबाला गोरगिला ख्रुम ज्योर्नोन तोबा मुबा।गोरसोमला ख्रुम ज्योर्बाला रेङेन दाङसे हिन्से जक्कर जक्कर क्याबारि माइजि।रि पिन्बाम थेरि स्या गाना ताजि।थे ख्रुमदोइ सेवाग्राहिकादेदा सोमरे ब्लिरे दोना रे ख्योर्सि फालोअपला सेवा पिन्ना पिन्ना ह्राङलान ल्हुइरि ख्रुमसे न्हाला जाङ स्होसि जिन्बा था आदानि।काङला क्लेपरि नाल्जिङ राप्सि जिन्जिम।
थे लिच्छानोन रे आख्योर्ना सोमरेला क्लिनिकरि आहाम आहाम वाताइ वाताइ तासि ब्रातोमाम न्हा थोन्सि स्हु मि कादेकादे।ब्रामाइ थुर्बा,चिमाइ लेप बेर्बा,रेमाइ ङहाप्पा ज्योर्माम झन मिरि नामनामला म्हेन्दो सार्बा।ल्हानान दिङ लिच्छा हाबा थेख्रुमसे जत्तुगु दुइला ख्रुमका थुम डान्ना लाजि।थे दुइरिनोन हाइमा छिक्मारि हाइमा पुइरि हाबा मुबा।ङादा जेक्खेन आहिन नानादाइ आप्च्याङला जामेदाइ हाबा मुबा।थे दुइरिमि पर्सनल हाइजिन आसेना हाबा मुला ताला।जत्तुगु जत्तिदामि बेनानदा दाम्सि दाम्सि हाबा मुबा ख्रुम।
न्हा वाइसम अर्कुदा कोला रो बिसि थारेङ ब्याङगो बिबाला मुबा आमासे ख्रुमसे फेल्टाङजिबा पुइसे ब्राबारि आहाम्ना न्हा फ्याबा रुवा दिमग्यापला चे ह्वारिरि ब्याङबा मुबा।थेसे सार तासि मुनाम ख्रुमहामा मकै रोबा मुला रो बिबा मामला तामएन डिक्जि । थे दिङरि मकै ल्हाना रोसि।गोर गि दिङरिम छिक्मारि गोर ङ्हि तिक्खुरि।हाइमा पुइरि।ल्हुइरि ख्रुमरोबा।ह्वारिरि मकै राङ। दिङ ङ्हि सोम दोना थेरेरे हाबाला हाबान।जहिलेन बर्खरि नाम ताइबा दुइरि। छिक्मा थेन गोरि थेरेरे हामाचा म्हेर्बारिन आताना दलानरि ब्यो तिसि ख्लुप ताजिबा मुबा।ङ्हाप ङ्हाप लाबा बिसि जामा तोर फ्लिक दोसि ब्लिङसि थान्बा मुबा।म्हेर्बा हाजिम।आप्च्याङला नाका हासि ख्रुमरिन ट्वान छ्वासि ख्रुमला न्हा म्हामाएन प्योल तेसि बोर्जिम।बाङसे ज्यार्नोन आतोनि।
दिङ गिरि चा पुइरि हाबा मुबा।काङ कुम्बारिन आतानागि। ख्रुमला स्हु नाबारि आहाम्न क्राजिबा म्राङसि आमासे बान्बोदाइ स्युइपुङबा मुबा।राङाब ताजिम रो क्युइसे। चु हुललाएनोन आउदिन स्हुहाजि।थे दुइरि राङनोन राङाब ताबा वा ख्रुम।
पनौति, काभ्रे
