छेक्पा छापा ला । गान्धि क्याम्साङ म्हादन हेन्से ब्रासि खान ग्युरु खाइमा योनायोना खाइमा गोलेसे ब्रासि काभ्रेला राजवास बिबा ग्लारि दोमा म्हुना ८÷९ बजप तासि जिन्बा मुबा । क्योलोलो सेनारि निबाला मुबा । थे दुइरि सेक्सन कमान्डरला जिम्मेवारि पुइबाला मुबा । ल्हाना हतियारकादेला मिननोन सेबा आरेबा विसाम थे हतियार खाराङलासि चलब लाला बिसि लोप्पाइ आरेबा मुबा । ङयासे आर्मि पुलिस खालावा बिसि चिबा लाबारिम पालोपालो टितोबा सैनिक नियमनोन हिन्ना । थे दुइरि मथङ मथङ तहला लडाकु योदे दोना ग्रेन कमान्डरदा चिबा लाबारि पालो आथान्बा मुबा । बरु थे कमान्डरकादेसे खाराङलासि सत्रुला चिबा लाबारिम? कादेदोना चनाखो ताबाटिम ? पासवार्ड म्ह्लेबा टिम कि जिबा टिम चेक लासि लडाकुकादेदा सतर्क लासिगेन खाबाला मुबा । खाप्पा ग्लारि दोजि थे लडाकुकादे गत्दामन ल्हाना तासाइ पासपोर्टजा गिनोन थान्सि डान्तोबा मुबा । कान चासि म्हेर्बा बिमा ङहाच्छा डिउटि मिलाप लाजि च्यामा ङाला मिननोन आरेम । सेमरिनोन ठिकन ताजि ल्हुइ सु खासि छावानोन रेला ह्राङ तासि टिबा मुबा । ताइ ङादाम चिबा लाबारिन आथान्जिम म्हान्सि सेमनोन फिर ताङजि ।
स्यान्दो दुइरि म्हुना थाल्साइ छुप नि आखम्बा ङा थे रेकुनु अकोनान छुप निजिम । ङाइमि म्हाङ म्रान्सि टिजिम । ओइ सेना खाजि ह्यार्गे रेगो योना योना बिसि ङाला ह्रो आङा चेलिसे पाङसि टिबा दुइरि फेत छोर्जि । खालाङ हिन्नोम म्हाङ अहिन्बा टिम ङादाम चिबा लाबारि रेगो बिसि ङ्हाच्छाला पालो जिन्सि अर्कोला पालो छिङमा आखम्बा बिसि अर्को ह्रो अनिबासे ङादा चिबा लाबारि निउ बिसि छिङबा टिम । थे ह्रोसे थेला घन्टा गिक दुइ दोनाला बृतान्त सेजि । खानाइ ग्लारि नाकि चुबा, खानाइरि लाइटला ह्याल म्रासि म्हि ब्राबा, खानाइजारि तिलाइ ग्रेन काइ खाबा थेराङबान थेराङबा ताबा घटना कादे सिजि । ङाइ ङयान्सि टिजि । चिबालाबा पोस्ट म्हेर्बा ग्ला बिमा ओराङबान दस पन्ध्र मिटर थारेङ मुबा । ङाला यारि एस एम जि हतियार! घडि थेन दोसि चिबा लाबारि ब्रिबा कपि पिन्जि । जमा जेखेन बल्ल ङाइ घडि च्याजि म्हुनाला दुइ बजप ताजिम । ङादा हतियार, घडि च्योल्सि ह्रो म्हेर्बारि निजि ।
ङामि उदेक ताजि । थे दुइ दोना ङाइ खाइमाइ ओदे तुन्बा हतियार थोबाला आरेबा मुबा । च्याजि मुइला रु ह्राङबा जकि कुङगिलिङ ताबा म्यागेजिन थेरि ३० वटा दोना गोलि वाङला बिसि पाङबा थेबा मुबा । खालाङ निनिन ब्वाङ ब्वाङ ङाइ म्हान्जि मुतेबाग्यामसेन तिरेमरिन गोलि निबा मुन्तला । ए ……..हे ! ४५ मिनेट दोना थारेङमि नरस्योङ (नार्के बजार) सेना फटाफाट खासाम दोकला । ङाइ हतियार चलब ला आसे । तिलासे लासे । घन्टा गिक दुइ अजिन्ना निबारि आम्याङ । टि बिसाइ हतियार चलब ला असेमा टिबाला अर्थ खाइ? सेम क्लाङजि ङामि लोङजि दुइ बजे लिच्छाला दुइ जक्कि खतरा बिसि सेला तिल्दा विसाम थे दुइ लिच्छा आक्रमन ल्हाना ह्राङबा लाला लाबा बिसि जहिलेन थेबाला मुबा । तिगागा, चरा, अर्को जन्तुसे सर्याक सुरुक लासाइ लु दारेम तिलासे म्हान्जि । लोङसि लोङसि टिजि । जब म्हि लोङला तब दुइ गाइबा निबा छोर्जि । घडि च्याबा मुला क्योलोलो पन्ध्र मिनेट निजिम । उफ चु घडिला सुइ कादे गाइबा हेत्तेरि ……. ।
पुलिस, सेना दोसि अर्को दुश्मनला चिबा लाबारि टिबा म्हि ङा घडि च्याबादेन थे हतियारला बारेरि सेम क्लाङसि ङामस्हुर फिरक्याप तिला ताजि तिला ताइ लाजि थेनोन स्योङ म्हेजिम । एकोहोरो खाइमा हतियार खाइमा घडिकादे च्यासे दिक्क वक्क तासि जिन्जि । थे दुइरि सङगठन स्होसि,ह्वाइ कोसि, खाइमा स्यासि ब्राबा थुम जिजि । बेकाररि खाजिम चु सेनारि । स्यान्दो सेनारि निउ बिमा आङयान्बम चुराङ तासिनका टिम । डकडक ल्हिबा झोला पुइतोबा, चाबारि म्ल्हा, खु छ्युगु पुइतोबा । कादेखेर सेनादेन छेतोबा ब्रातोबा टितोबा तिल्लाइ ठेगान आरे । तोर्सेला कमान्डरला आदेश ङयान्सि ब्रातोबा डान्सि खामा युद्धप्रति बितृष्णा ताजि । हिन्बाम युद्ध तृष्णासे लाबा आहिन तासाइ थेकुनु आज्याना म्हान्जि । दिम डान्जि लोप्खाङरि डोबा ह्रो डान्जि आबा आमा डान्जि । ङा लोप्खाङरि डोबा दुइरि गोर्कि ब्योन कोल्से ‘ए माओवादि सङगठनरि अटिउ थेन्सेम बोर्लारो साइला रो बरु ब्राउ एलान नाना याम्बुरि मुला ङाला ज्योज्यो याम्बुरे मुला ह्यार्गे थेरिन लोप्खाङरि डोला आहिनसाम तिलाइ सिप लोप्ला ।’ थेसि पाङबा ताम जिसि मिग्याम मिख्लिन फ्रोल ताइजि ।
ङामि चिबा लासि ह्राङनोन सोबारि ह्रोकादेदा सोना लाबारि बिसि टिबा तर ङा लोङबादेन हतियार आसेबाला गुङरिन घडि च्यामा ५ मिनेट जे बाकि टिम ङाला पालो थुम्बारि । सेम फिर ताङजि गोल्सेसे बानि तालाइ ह्रोम म्हान्जि । मिसे थारेङ आच्याना हतियार ख्युरुरु दोसि च्यासि टिजि । ङाला ङामरि म्हि दोकापा थानोन आदाजि । ङामरिन दा राप्कामा जे म्राङजि । पासपोर्ट पाङजि थेसे उत्तर आपिन्जि। लु दारेम सिबाताजि म्हान्सि सेमनोन प्रेक साइजि । हतियार फोसि ह्रोकादेदा छोर्ना लाइ बिसाइ फो आसेजि । सेमनोन सिमा ह्यर्बारि आखम्बाटिम काङनोन लरक लुरुक गेजि । ओदे दुइरि ङामरि खासि ताम ङयोइजि तिल तिल ताजि घन्टा गि दोना ? ओदे बिमा ङाला सा खाजि लु दारेम सोजि म्हान्जि । ङाइ पाङजि ङाइमि चु हतियार तिलासे चलाब लालावा बिसि सेमसि म्हान्ना म्हान्ना दुइ निबा थानोन आयाङजि । थे तासि ङाइमि ङामस्हुरला वातावरननोन था आताजि । हैट ताइस्या चुराङ लासिनोन तलोम ? एजेन अहिन एसे लाबा जक्कि लापरबाहिसे ह्रोकादे सिला । ह्याङ सेनासेम मुतेबा हतियारला जानकारि थान्तोला । ङाला ग्लारि स्यान्दो कमान्डरसे चिबा लाबारि खाबा हिन्साम एदा कारबाहि लासेला । एसे म्हि ङामरि दोकासि जे था ताजि । क्याथाङ मुमान ह्राङला ह्रो टिम कि दुश्मन टिम था ताबारि पासपोर्ट प्रयोग लातोबा आलाजि । ङाइमि ए क्योलोलो सेनारि खाबा जाजा आङा बिसि माया लाबा हिन्ना । दारेम खाइमाइ चुराङ आलाउ बिसि मधु (सर्केस ग्लान दान्दे बागमत गाउँ पालिका मकवानपुरला चोहो) से चेकाइसे ङादा केजि ङामि स्योल पेजि ।
काभ्रे, गाङनाम्सा
