१. म्होइजेन
लस्मितादा तिरेकुनु तामलाम तामरि ङाइ ङ्योइजि, ‘आङा, ह्राङ्से ग्योइकाइला खाप्पाचा थुमरि ब्रिगु स्याङ्सि खामुला ?’
लस्मितासे ङादा सुङ्बारि आगाइनि, ‘ङादा ब्रिबारिचा आखाबा मुला, ज्योज्यो । डोबा थेन ङ्यान्बारिचा ल्हानान सेम ताबा मुला ।’
ङाइ अझ बाङ दोन्जि, ‘ह्राङसे दारेम ब्रिउ, आङा । ङाइ म्होइजेन लाजि ।’
२. ह्वाइखा
ङादा लस्मिताला ह्वाइखा डोबा सेम तासि खाजि ।
लस्मितादा ङाइ आदेङदेङ लासि पाङजि, ‘आङा, ङाइ ह्राङ्ला ह्वाइखादा खाइमा डोबारि म्याङ्ला ?’
‘ङाइ ह्वाइखाचा ब्रिबा आरे ।’ लस्मितासे नोन ङादा आदेङदेङ लासिन पाङ्जि, ‘च्यागे होइ ज्योज्यो, ब्रिजिबिसाम ज्योज्योदा डान्सेला मुला ।’
३. सेमरि
लस्मितासे ह्वाइखा आब्रिसाइ ग्योइकाइला छ्योइजुगुचा डोसि खामुला । लस्मिता ग्योइकाइ थुमला गिक्खे देन्बा डोखेनए नोन हिन्ला ।
लस्मिता
ङाइ लस्मितादा ह्राङ्ला आमाग्योइग्यामसे ह्वाइखा ब्रिबारि म्होइजेन लाबा दुइसाङरि लस्मितासे ङादा चुदे सुङजि, ‘ङाइ देन्बान ब्रिजिबिसाम ङाला गिक्छा प्राथमिकता आमाग्योइदा तासेला मुला, ज्योज्यो । ह्राङ्ला चु ल्हेङमोदा सात्तान सेमरि थान्सेला मुला, ज्योज्यो ।’
लस्मिताला ओजा ल्हेङमोसे ङा फुरफुर ताङसि टिजि, ज्यागोन गाइना ।
४. सुर्ता
लस्मितासे ङादा पाङजि, ‘ज्योज्यो, ङाइ दात्तेदोनामा ह्राङ्से दोबा ह्वाइखाजुगुदाचे डोबारि म्याङ्बा मुला । ह्राङ्से ब्रिबा स्हेजुगुदाचा डोबारि म्याङ्बान आरे । ह्राङ्से ब्रिबा स्हेजुगुदा योनासेन डोबारि म्याङ्गाइ बिबा सेम मुला, ज्योज्यो ।’
लस्मितादा ङाइए नोन पाङजि, ‘सुर्ता थालाङ, आङा । ङाइ ब्रिबा छ्योइजुगुदा ह्राङ्से योनासेन डोबारि म्याङ्ला ।’
लस्मितासे दाबे थुइजि, ‘ग्योइकाइ थेन ज्योज्योदा प्रे नोन गोम्याङ्गाइ ।’
५. ल्हुइराप
लस्मितादा ङाइ पाङ्जि, ‘आङा, ङाइ ब्रिबा ह्वाइखा ङाला ल्हुइराप हिन्ला ।’
लस्मितासे नोन पाङ्जि, ‘थे ज्याबा ताम हिन्ना, ज्योज्यो । परिकल्पनाबिमा देन्बादा कुरि थान्सि ब्रिबा स्हेजुगुसे योनान थुर्बारि खाम्लाह्राङ छार्मुला ज्योज्यो, ङाइए नोन ।’
ङाइ तिलाइ आबिजिमा नोन दाबे लस्मितासे ङादा फुर ताङ्सि पाङ्जि, ‘दारेम योनासेन ह्राङ्दा डोसेला मुला ज्योज्यो, चु आङासे ।’
ङाइए नोन लस्मितादा फुर ताङ्सिन पाङ्जि, ‘ह्या ताला, आङा ।’
