म्हाबारला नाम्सा डान्मा

वर्ग संघर्षला थे फे लोङबा रेकादे दुइकादे । वर्ग संघर्षला तुफानि वेगकादे। मे ल्हामदेन क्लाङबा डानकादे । तिनि ककर लासि सेम तिङ हेन्से डान्सि खाबान मुला । सेम तिङ न्हाङग्याम्सेन दुङालला स्हुकादेसे स्हु कोबान मुला । खाइमा सेम ताङसि खाला खाइमा बोमो दोसि खाला खाइमा तेकाप लासि खामुला । म्लेसिम म्ले आखम्बा थे दिङकादे दुइकादे। विरता बलिदानला ङामरि चिसि डान्बान मुला । ङाला ल्हुइला शिक्षा दोसि दा राप्पान मुला । म्हाबारला ह्युल्बा ।
खाप्पाइ बिमा ङ्हाच्छा २०५६ दिङ असोज लारि काभ्रेलाम्हाबार नाम्सारि एस. टि. एफ.ला फर्मेसनरि छ्याम दोनिजि । भिगुर(भिमखोरी) मोर्चाला लागिरि दोलखा सिन्धुला (सिन्धुपाल्चोक ) गोर्कि टुकडि कमरेड रामजिला नेतृत्वरि निजि । एस. टि. एफ.(स्पेसल टास्क फोर्स) कमान्डर कमरेड सुरेश थेन स्ह्यान्दो ह्रोकादेदेन छ्याम ह्रुप तामा सेमरि खाराङ खाराङ म्हान्जि । थे दुइरि जहिलेन सेनाला फर्मेसनह्राङ चलप तासि चिबा नाम्सा दिमरि आधार इलाका घोषणा ताबाह्राङ म्हान्बाला मुबा । तिलाइ आलोङनान खालाङ दामान निम्याङबा क्लाङम्याङबा तालिम ला म्याङबा मुबा । खाल्सेनोन पुलिस आर्मिदा ताम बोर्ला वा बिसि आलोङना ढुक्क ताबाला मुबा । थेराङबा विश्वास म्राङमा सेम फुर ताङसि म्योबा मुबा । ह्युल्बासे सत्ता चलब लाबा ह्राङ म्हान्बा मुबा । सार ताङबा ल्हाला कुरि मुबा भिमखोरी चौकि आक्रामनह्युल्बाला विश्वासदेन ह्रो लाबासे डाखाम्बा मुबा । योनायोना लातोबा गेकादेसे नाम्साकादेरि छ्यालछ्योल ङाम्देसे ल्हाना क्लाङ आम्याङजि । पुलिस चौकिबिमा घन्टा डे थारेङ ह्युल्बासे पुलिसला मिग्याम छुम्सि थान्जि । थे तासि ङादा थे ग्लाला ह्युल्बाला आउदि माया खामुला ।
कमरेड सागर थेन कमरेड माइला लामादा आउदि माया लाबा म्राङजि । औदिन ज्याना लाबा औदिन सेम निबा याङजि । माइला लामा सिसाइ फोटो बासि खाउ बिबा थे ग्लाला खेप्पा खुयु आपा आमाला ताम थेमा सेम रोप स्हु खाजि । थे दुइरि चुनोन योद्धाकादे मिला ङ्याल्मो मुबा । बेनासेन ङोसेबा सेम तिङ न्हाङरि तोक थान्बा । चु बिमा ङ्हाच्छा जनदिशाला ताम खाला । जनदिशा चुराङबान कुसलतासे लामा ह्युल्बाला तिङला ढुकढुककादेरि सोसि चिबा ह्राङ म्हान्बा मुबा । नोबा गाङ विकासला लहर ब्योङ आखाम्बा ग्ला म्हाबारला नाम्सा गाङसा म्राङमा सेमसे साइलुङ थुम डान्बाला मुबा । ओदे जे आहिन सेम फुर ताङबा मुबा । थे ग्लाला ह्युल्बासे खेतिपातिदेन रा, म्हे, मुइ न्हासि ह्राङला ल्हुइला खोर्लो स्याना लासि खाबाला मुबा । मोटर गाडिला ग्याम आरेबासे न्हे ख्वाल्सि खुवा स्होसि खुवादा छाङरि पुइसि ङ्हिरे ब्रासि खोपासि पनौतिरि चुङबारि बाबा मुबा । चुराङबान खुवा चुङसि खाबा टाङगासे जनयुद्धला योद्धाकादे न्हासि खाबाला मुबा चिम । ह्युल्बाला चु ङ्हाज्याङ सेम्लोदा खाइमाइ म्लेसिम म्ले आखाम । तामाङ नाम्सा ताबासे थे ग्लारि खेप्पा खुयु आपा आमासे ज्यार्दि ग्योइ आगोबा मुबा । थे ग्लाला आपाआमा नानाआङासे गोबाला लागिरिनोन ङाइ तामाङ ग्योइ लोप्तोबा सेतोबा मुबा । थे तासि म्हाबाररि चिदे दोना ङाला ह्रुइ स्याङतान ताजि । तामाङ नाम्सारि दोमा तामाङ, मङगर नाम्सारि दोमा मङगर, बाइ नाम्सारि दोमा बाइ, गुरुङ नाम्सारि दोमा गुरुङ, चुराङनोन लासि स्यान्दो नाम्सारि दोमा स्ह्यान्दोन ताजि । ङा साझाह्रुइ साझा जात थोबा म्हि दोजि । ङाला ह्रुइ स्याङतान ताबासे ङादा ल्हाना माया पिन्जि । फो ख्रेन्जि । सोल मिन्जि ? बिबा लोप्सि सेबा मुबा । ह्रोकादेसे ल्हाना विरोद लासाइ मार्क्सवादि दायारा न्हाङरि परप आतासाइ मामखुयुकादेला याग्यामसे स्होबा मकै थेन साङाला जि खोरेनाङ सिप थुङजि । चु ङाला बाध्यता मुबा ख्रेन्सि फोइथान सिबा बिमा जि थुङसि म्योइ म्हान्जि । छापामार योद्धाकादेदा तामाङ नाम्सासे तामाङला समुहसे लाबा मायासे क्रान्तिला मे ल्हाम हुरहुर लुङबा मुबा । वर्ग संघर्ष खालाङ दोदो थेम्बाला मुबा ।
ल्हाना ह्राङबा सोझासाझा म्हिकादेदा लेबाफेवा लाबा फटाहाकादे नाम्सा ख्लासि बनेपा धुलिखेलरि ह्यार्सि चिनिजिम । नाम्सा नाम्सारि जनसत्ता चलब ताबा चिम । किलो सेरा टु अप्रेसनला दुइरि नाम्सारि ग्रेननोन लोङना लाजि । ललितपुरला ग्रेन दुर्लुङ हत्याकान्डरि चुङसि बाबा नानाआङा कमरेडकादेदा लिकन्डि लासि नाम्सा कोर्बारि छ्याम थोजिम । ओदे तासाइह्युल्बाला आस्था थेन बिश्वासदा ह्याङह्योङ ताना आलाजि । तिनि चुनोन डानकादे डान्सि डान्सि खाबा मुला । थे लिच्छा ङाइ म्हाबारला नाम्साकादेरि रननितिक प्रत्याक्रमनला दुइरि लाजाङ क्लाङ म्याङजि ।
गोकुलेला राजनितिक प्रसिक्षन लिच्छानोन म्हाबारला नाम्सारिन चि म्याङजि । डान्बारि खाम्बा खाइमाइ म्ले आखाम्बा ग्रेन गे लाबा मुबा । मकवानपुरला भोर्लेनि हेन्से काभ्रेला गोकुले थुइबा मोटरग्याम हजारौ ह्युल्बा थेन सयौ जनमुक्ति सेनाला योद्धाकादेसे रे, ला दोना गे लासि मोटरग्याम स्होजि । पुलिस आर्मि खामा जनमुक्ति सेनासे ह्युलबादा सुरक्षा पिन्जि । थे दुइरि राज्यसे युद्धदा लाबा दमन चरमोत्कर्षरि दोजि । नार्के थेन घर्तिछाप ह्राङबा बहादुरि भिडन्तकादे ताजि । थे भिडन्तरि जनमुक्ति सेनासे सदरमुकाम कब्जा लाबा तेबान हतियारकादे ब्यानखाम्जि । चु भिडन्तरि दर्जन बिमा ल्हानान योद्धाकादेनोन सहिद दोजि । ह्युल्बा थेन योद्धाकादेदा दुङाल पिन्बारि थोन्बा आर्मिकादेदा गोकुले एम्बुससे ग्रेन धक्का पिन्जि । चुराङनोन लासि धार्नि गाङ, फलामेटार, फोक्सिङटार,महादेउटार, बन्खु, बेतिनि, गोकुले, घर्तिछाप, जगथलि, साल्मे, तालढुङगा, मझुवा, मिल्चे, सालधारा, डाडागाउ थेन सहनेग्लाकादे नाम्साकादे खाइमाइ म्ले आखाम्जि। शान्ति प्रक्रिया लिच्छा खाइमाइ दोआखाम्जि । तिनि सेमसे ङ्योइबान मुला युद्धला दुइरि दोबा दान्दे दोआखाम्बा नाम्साकादेला लि पोजि कि आपोजि ? चु सेमरि सुर्ता थेन चोइ तामुला । क्रान्ति थेन क्रान्तिकारिकादेदा ह्राङलान कुरि सुल छुम खाम्बा नाम्सा गाङसाला आपाआमा नानाआङाकादेदा लाख लाख डान्बा थेन सलाम । कालिन्चोक गा. पा. वडा न ६ लापिलाङ दोलखा