ल्हेङमो
सञ्चारकर्मी सुशीला तामाङसे तिरेकुनु ङादा फोनरि सुङजि, ‘ह्राङतेन प्रे तिलाइ ल्हेङमो लातोबा मुबा । ह्राङला ल्हुइ थेन ग्योइकाइला थोरि तिलाइ ब्रिबा सेम मुला ।’
ङादा ताङबा खाजि ।
सुशीलासे ओजा सेमताम थान्बा तिलाइ रेलिच्छा याम्बुरि मुबा सुशीलालान गेदिम ‘जोय नेपाल’रि स्हाङ दोजि ।
ओजान दुइरि सुशीलातेन प्रे तिलाइ ल्हुइला, तिलाइ ह्वाइखाला ल्हेङमो लाजि ।
लिच्छा; ओजा ल्हेङमो ‘जोय नेपाल’रि ‘मलाई लेखेर कहीँ पुग्नु छैन, बस् ! यसैमा बाँचिरहनु छ– जब अक्कल लामा ईश्वर थोकर बनेर चिनिए’ क्राछिकरि छिसि खाजि ।
सुशीलासे स्हेङबा ओजा फिचरदा डोबारि म्याङसि दाबे ङा ताङजि ।
आमाग्योइ
दोक्छेबिमा ङ्हाच्छा सुशीलादा ङाइ ‘कान्तिपुर’रि डोबारि म्याङमुबा । लिच्छा; आदेङदेङ लासि ‘तामाङ डाजाङ’रि नोन डोबारि म्याङजि ।
सुशीलादा ‘तामाङ डाजाङ’रि डोबारि म्याङसि ङादा ताङबा खाजि ।
ङाइ म्हान्मुबा, ‘सुशीलासे ह्राङला आमाग्योइरि ल्हेङमो लाबारि आखाम ताला ? सुशीलासे ह्राङला आमाग्योइरि ब्रिगु स्याङबारि आखाम ताला ?’
सुशीलादा ह्रुप तासिलिच्छा; था याङजिकि, ‘ङाइ म्हान्बा थे ताम देन्बा आहिन टिम ।’
ह्राङला आमाग्योइला थेए नोन ग्योइकाइ स्योस्यो ‘तामाङ डाजाङ’रि सुशीलादा रेमरेम डोबारि म्याङसि दाबे ङा ताङजि ।
फुरफुर ताङजि ।
गेदिम
ङा सुशीलाला गेदिम ‘जोय नेपाल’रि वाङबाइगे मुबा । ओजा दुइरि सुशीलासे ङादा ह्राङलान आमाग्योइग्यामसे ताम पाङसि डेन लाजि ।
ओतेबा दुइरि ङाला सेम दाबे ताङजि ।
फेबारि छेबा दुइरि नोन सुशीलासे ङादा ह्राङलान आमाग्योइग्यामसे ताम पाङसि गेदिमला राङगादोना साकाजि । ओतेबा दुइरि नोन ङा ताङजि ।
दाबे ताङजि ।