छेक्छि माम थेन छेकोनला जा निजि बिबा तामसोर दोगाजि । तामसोर थेबातेन याम्बुरि मुबा ज्योज्यो आले नानाआङा मुतेबातेन फोन ताजि । फोनरि काठुइ लासि ङाइ प्युटार नाम्सारि निबा तयारि लाजि । काठुइ अन्सार ङा यामबुग्याम नाम्सारि वाङनिजि ।
ग्यालामा आउदिन जोखिम मुबा । हान्दामान डुइसे ग्यालाम न्होङना लाथान्मुबा । खामआखाम ङा इमाडोलला दिमग्याम्से प्युटार नाम्सारि दोबारि सफल ताजि । नाम्साला ज्योज्यो आलेतेन हापह्रुप ताजि । थेन्तेन न्हाङगार लातोबा गेलाबारे तिलाइ काठुइ लासि ङानि ह्राङह्राङला दिमरि निजि । न्हाङगारदाङसे स्योरी ५ बजेरिक्यार नाम फ्रुसफ्रुस ताइचिमुबा । थे नामरि बाम्सिकेन ग्यालाम तिजि । ल्हाम अपठ्यारो मुबा । प्युटार नाम्सा ग्यामसे घन्टा ङिस प्रादोबा मुबा ङानि दोतोबा नाम्सा ।
ङान्ना टिम सेम कुङला लासि ल्हामरि वाङजि । ङानि मकवानपुरला बकैया गाउँ पालिकाला मन्थलिला सोलिथुम गैरिगाउ ताबान ब्राबा चुजि । खाइमा हान्डो खाइमा ग्युरु तासिकेन सिखरपुरला च्याउच्याउ दमाररि दोतोमुबा । बर्खाला दुइ मुबा । चु दुइ तिबाइला दुइ । हान्डो ग्युरु ब्रातोबा दुखम मुनोन मुबा थे फिरि काप्जि तिबाइला पिर । आपाच्याङबा सुमन थिङ, धनबहादुर थिङ, प्रेम थिङ, लालबहादुर बोम्जान ल्हानान चलाख मुबा । खालाइसे बुट क्वान्बा मुबा । खाइलाइजा चप्पलरि मुबा । ङाए नोन चप्पलरि मुबा । बुट क्वान्बादा तिबाइसे ओदे स्याप्बा आरेमुबा । ङा चप्पलरि मुबासे ङादा तिबाइसे च्योबारि चुजि । ङानि क्योङसेन चाचा फोर्जि काङरिक्यार । थेलिच्छा दोसि ङान्ना ल्हाम तिजि ।
ग्यालमरि तिबाइला चर्तिकला आउदिन ज्याना लासि च्याम्याङजि । तिबाइला चर्तिकला च्याबान ह्रिगुङरि मुबा याखारगि दिमरि दोजि । थे बोम्जनला दिम चिम । थे दिमरि तिलाइ दुइ दुवा न्हाजि । ङानि हान्डो ग्युरु ब्राबासे ब्लाप्जिन्बा मुबा । थे दिमरि ब्लाप्बा न्हाबा जेक्खे आहिन दिगु सुताइ स्याप्जि । ङान्ना फोरि निमु प्राजिबा मुबा । छ्यामरि ङान्दा ग्यास्टिकला समस्य मुबा । बोम्जान आस्याङला दिमरि साङाला बाप थुङबान देपेन ङान्से ल्हाम तिजि ।
खाम आखाम ज्योज्यो आल्ला दिमरि दोजि । थे दुइरि घडिरि ११ ङ्ह्याजिन्बा मुबा । ङान्छे स्हुदा तिङरिन नाङथान्सि घटना ताबा मुल दिमर काङ थान्जि । दिम च्याजि थोसे आज्याना मोइजिम । थे लिच्छा ङानि छार दिमरि दोजि । थेरि लामा म्हेम्हेकादेसे बिधिपुर्वक गे लाबागेन चिम । तामाङला ठिमअन्सारसे दुर्सा गाङरि बोर्बा तयारि लाबागेन चिम । आमाराङ थेन थे जाजा आले बिधिपुर्वक लिच्छाला श्रद्धान्जलि पिन्बान तिलाइ दुइ आराम लाजि ।
ङानि थेरि गे जिन्छि नाम्सारि दोतोबा दुइ खाजि । ङानि हताररि मुबा । फुर्सद आरेमुबा । नाम्सारि धमाधम दिम स्होबाकेन मुबा । स्योरि ह्राङ नोन दिन्छे नोन नाम ताइबा दिनि फेबा ताचिबा मुबा । ग्यालाम ओस्बान अप्ठ्यारो मुबा । ङान्छे सेमदा कोङना लाजि । फ्रुसफ्रुस ताइचिबा नामदा वास्ता आलानान ङानि ब्राबा चुजि । ग्यालामरि ढुङरे स्योङ दारापचिबा मुबा । चु स्योङ थासि ङान्छे चु हान्डोरि दोसि तिलाइ दुइ दुबा न्हाजि । ङान्छे दारे बाङ लास थातोबा हान्डो ङ्हि मुबा । गिक्छा हान्डो ह्रिगुङरि मुबा । थेरि नोन याखारगि दिम स्याप्जि । थे दिमरि खेप्पा दोजिन्बा प्राआखाम्बा माम थेन म्हेमे मुबाचिम । म्हेमे ग्यास्टिकला स्हुसे नाचिबाला चिम । थे म्राङसि ङान्दा माया खाजि । ग्यास्टिकला स्हु नाबारि आखाम्ना म्हेमेसे कुदाबला लेप्पा गेसाब फोरि थान्सि फोलेप्पाकेन चिम । ङन्दा माया खाजि । म्हेमेदा ङान्छे ग्रोइ पिन्जि, ‘म्हेमे चुह्राङ लासि आता । ह्राङ अस्पतालरि ब्राला स्हिगो ।’
म्हेमेसे ङान्दा सुङजि, ‘हान्डो ग्रेन नोन मुला । आलेनिदा क्युइ फुइजि ताला । क्युइ सोल्ला स्हिगो । तिलाइ सोल्बास्हेए नोन सोल्स्ह्युला कि ? हान्डोरि बाङ ताला ।’
ङान्छे ङ्योइजि, ‘म्हेमेजा तिलाइ सोल्बास्हे मुला ओम । ङान्छे म्हेमेदा न्होर पिन्ना म्हाले ।’
म्हेमे मुइमुइ ङेसि सुङजि, ‘चाउचाउ, बिस्कुटजुगु चुङबारि थान्बा मुला ।’
ङान्छे चाउचाउ थेन बिस्कुट ग्लुजि । ? बजाररिर बिमा तिलाइ ल्हाना न्होर फातोसाइ चुह्राङबा सुनसान ग्लारि चाबास्हे याङजि ताङबा खाजि । ग्लामरि प्राबा डोम्बोदा सेवा लाबा म्राङसि । म्हेमेसे आन्माहेन्सेन चु ग्यालामरि ब्राबाजुगुदा फुम्बाला ताङरि क्युइ थान्सि फुइबा म्हाना लाबा गे लास्ह्युबा चिम । क्युइ किन्बारि घन्टा ङ्हि थारेङ ग्यालाम दोतोबा चिम । ओदे थारेङग्याम क्युई होसि ख्वाबा म्हेमेदा फ्याफुल्ला !
चुग्याम ङानि दोसि ङ्हाच्छा वाङजि । स्यान्दो हान्डो खाजि । चु हान्डोरिइ नोन सुनसान मुबा । चु हान्डोरि बोम्जन आस्याङला गिक्खे दिम मुबा । बोम्जन आस्याङ ङान्ना ङामलान ङेङगोरए नोन हिन्ना । चुरि ङान्ने तिलाइ दुइ ब्लाप्बा न्हाबा काठुइ लाजि । छेकोन कोन्बे पर्दिबासे रमाइलो गफ लाजि । चुरि साङाला जि थुङजि । जिला नसासे ङान्ना सेमरि आट काप्जि । ङानि दारे चु लिच्छाला हान्डो थुम्ना लाबा कोसिसरि मुबा । चु दुइरिन ङाला मि छे कोनरिरुक्यार दोजि । थेसे सिङला डोजर स्होसि कुल्बाकेन चिम । ङाइ च्याबातेन थे पेसि लाजि । ङाइ थेदा पेआतो बिसि हवाम्जि । तासाइ आङ्यान्नि । आप्च्याङ थेन आलेकादेसे ङाला बारेरी पाङसि ह्वाम्जि, ‘चुमि पत्रकार हिन्ना । नाङरेगेन एला बरेरि ह्रोसे ब्रिला ।’ ह्रोन्छे ह्वाम्साइ नोन थेसे आङ्यान्नि ओम लाबारि ह्यार्जि । ङाइ ङाजा मुबा तामाङ डाजाङ तेसि कोन्मेदा पिन्जि । चुरि ङाला बारेरि ब्रिबा मुला । नम्बर नुन मुला, फोन लाउ पाङसि ङानि थेग्याम ल्हाम तिजि । ङानि ब्राबारि चुमाहेन्से बिसाम थेसे ङान्दा दिमला खाला ग्याम्से लासिकेन च्याचिबा मुबा । ङान्छे थे लाइनुदा या ह्योङसि बिदाइ ह्रिजि । ङानि थेमे ङ्हा थेग्याम ह्राङला नाम्सारिक्यार काङ ल्हेबा चुजि ।
ङानि बागमति स्योङरि दोगामा दोप ताजिन्बा मुबा । दिमरि दोगामा ङ्यासेला नौ बजतिबा मुबा । न्हााङगार ताङसे आलेकादे ह्राङह्राङला गेरि वाङजि । ङाए नोन याम्बुला इमाडोलला दिमरि दोगाजि । चुह्राङ लासि थे दुङालले जुर्याप लाबा पिडादायिक ल्हाम पुरा लाजि ।
बागमती गाउँ पालिका वडा नं ४ प्युटार, ललितपुर
