स्टाटस
याङबेलरि थोन्बाबिमा ङ्हाच्छा ङाइ फेसबुकरि गिक्खे स्टाटस पोस्ट लाजि । स्टाटस चुराङबा मुबा– ‘केही दिनका लागि आफ्नै जन्मगाउँ तेमालतिर लागियो ।’
ओजा स्टाटसरिन न्हेसि तामाङ डाजाङसे कमेन्ट लाजि, ‘शुभयात्रा । फर्किँदा खजना बोकेर आउनुहोला ।’
स्यान ह्रोजुगुसे नोन डाजाङसे ह्राङलासिन ज्याबाम्हान्बा फुल्जि ।
डाजाङ थेन स्यानह्रोजुगुला ज्याबाम्हान्बादा कुतिङरि किन्बान आले च्युनि उमेश थेन आङा थेबा याङ्जीतेन प्रे स्हेसि ङा याङबेलरि निबारि दिमग्यामसे प्योल थोन्जि ।
जाम
याङ्जीसे ङादा तिरेम प्लिक च्याबान पाङजि, ‘ज्योज्यो, याङबेलला ग्यामरि बस जाम तासाम ह्याङ ङ्यासेचे दोला ताला ।’
याङ्जीला तामसे लासि उमेश थेन ङा ज्यागोन गाइना नेसि टिजि । ओम, याङ्जीपाट्टि फ्लिक दोसि ङाइ पाङजि, ‘याङबेलला ग्याम सहरबजारला ह्राङबा ग्याम आहिन, याङ्जी । थेरि बस नोन; ज्यानालासि आब्रा, तिलासि जाम ताला ।’
ट्वाइलेट
ग्यामरि उमेश ट्वाइलेटरि टितोबाला टितोबान ताजि ।
उमेशसे ङादा क्रालि काइसे पाङजि, ‘ज्योज्यो, चुराङबान हिसाबसेम ङा तिनि याङबेलरि आरु थेबा (आमाला आङा थेबा) जा आदो ताला म्हान्सि खाजि ।’
उमेशदा ङाइ ङोसि पाङजि, ‘एदा ट्वाइलेट खोपोङहेन्देन पुइसि बातोबा टिम ।’
ङाला ङाम्तेला सिटरि टिबा पौडेल नाना ङाइ पाङबा तामदा थेसि नेसि टिजि, ज्यागोन गाइना ।
ह्वाइ
ङा टिबा सिटला लिच्छारि गोरगि जोडी मुबा । ओजा जोडी गिसेमगिदा चुइचुइ ङोसि टिमुबा ।
ओतेबान दुइरि बसला खलासी खासि ओजा जोडीदा ङ्योइजि, ‘ओइ, एङ्हिदा दात्ते ङ्यासि टिबा ह्वाइ खाराङबा छोर्सि टिमुला ?’
ओजा जोडीला ब्योनचासे खलासीदा कुल्जि, ‘डासि निउ … छिकला ह्वाइदा ङ्याना लाउले ।’
खलासीसे छिन्नाङरिन ङ्यासि टिबा ह्वाइदा पोजि, ‘डासि निउ …’
ओजा जोडी खलासीला ङोसेबान म्हि टिम बिसि लिच्छा था याङजि ।
ग्रेनराप
ब्रिखेन जितेन्द्र रसिकसे फेसबुकरि कमेन्ट लाजि, ‘ईश्वर ह्रो, ङादा आबोर्ना तेमालरि ह्राङ याकारगिचे निबा ?’
जितेन्द्रसे चुराङबिसि टिबा दुइसाङरि ङाइ तिनिबिमा ङिसदिङ ङ्हाच्छाला तामदा थुम डान्जि ।
ओजा दिङरि ब्रिखेन हरिसुन्दर छुकां, जितेन्द्र रसिक थेन ङा ल्होसि तेमालला ल्हाम तिबा मुबा । ओजा दुइरि ङानिसोमसे तेमाल फुतफुत कोर्मुबा ।
तेमालला थोरि छुकांसे तिलाइ ह्वाइखा ब्रिमुबा बिसाम, रसिकसेचा तेमाललान थोरि ग्रेनराप नोन ब्रिमुबा ।
घन्टागिलिच्छा
बोदिहेन्दे ङानिसोम कोट तेमालदोनाचे निबा बसरि क्रेमुबा, याङबेलदोना निबा बस आयाङनागि ।
ङानिसे क्रेबा बस सङस्युखर्कपाट्टि निबा बस मुबा ।
बस कानपुररि दोकामा आले रुपेशला फोन खाजि, ‘ज्योज्यो, ह्राङनि खालाङ दोकाजि ? ङा थेन सुवास ह्राङनिदा किन्काबारि कोट तेमालरि खाबाइगे मुला ।’
ङाइ रुपेशदा पाङजि, ‘ताला आले, ङानिसोमए नोन कानपुररि दोकाजि ।’
ङानिसोम कोट तेमालरि दोकाबाइतेन रुपेश थेन सुवासए नोन तिखुरिन थेरि स्हाङ दोकाजि ।
घन्टागिलिच्छा; कोट तेमालग्यामसे ङानि ङ्हा ब्रासि ङ्यासे थाङमा याङबेलरि दोजि ।
साङगुल
आरु थेबासे सुङजि, ‘आले, ङा थेन रुपेश वातिदोना दोसि खाला । एनिसोमचा आकुतेन प्रे दिमरिन टिउ ह्या वा ?’
आरु थेबाला ल्हेङमो सारि आताइजिमा नोन, याङ्जीसे पाङजि, ‘आरु ङाए नोन, वातिरि निला ।’
उमेशसे नोन, याङ्जीसे ह्राङ नोन बिजि । याङ्जी थेन उमेशए नोन, आरु थेबा थेन रुपेशतेन प्रे वातिरि निबा ताजि ।
गोप्ति वातिरि दोसि फ्लिक दोकासिलिच्छा, याङ्जीसे ङादा गिक्खे राप सेजि–
वातिरि गिक्खे आले जाजा खामुबा । ओजा आलेदा उन्सि गिक्खे आङासे ङोबा चुजि, ‘साङगुलदा म्राङसि खाइ खालाइ नोन आलोङबा टिमलोम ?’
ङाइ आगोना ओजा आङादा ङ्योइजि, ‘ङाइ आगोजि । तिला बिबारि छेबा आङासे ?’
लिच्छा गोमा था याङजिकि ‘ओजा आलेला मिन नोन साङगुल टिम । साङगुल खामाकुनु केबा बिसि थान्बा मिन टिम, साङगुल मिन ।’
ब्रेल्बा
याङबेलला चन्द्र ज्योज्योसे थाक्लेरि दोबा आरु हसनी (आमाला आङा पाराङचा) दा डान्सि मिख्लि प्रुलुलु पुइसिन टिजि, ज्यागो गाइना ।
चन्द्र ज्योज्योसे ङापाट्टि फ्लिक दोसि क्रालि काइसे सुङजि, ‘आले, आरु हसनीसे ङादा कादे चेकाइ लामुबा । कादे साह्यार लामुबा । थेमि ङादाचे था मुला ।’
ङाइ तिलाइ आबिजिमा नोन दाबे ज्योज्यो चन्द्रसे ङादा सुङजि, ‘आले, दात्ते आरु हसनी याङबेलदा प्लेक ख्लासि थाक्लेरि दोमुला । आरु खालाङतामा दोसाइ नोन, ङाइमि आरुदा डान्सिन टिमुला, आले ।’
आरु हसनीला ब्रेल्बा दोक्छेबिमा ङ्हाच्छा; याङबेलरि तामुबा ।
मान
दिमरि आकु ङाङ्हिचे मुबा । आकुसे ङादा सुङजि, ‘आले, ङा मान चाइ ह्या ?’
‘ताला आकु, सोल्गो ।’ ङाइ आकुदा पाङजि ।
आकुसे ताला थोग्यामसे गाङसाल प्लिङबा बोल तेजि । गिलासनाङ युसि स्वाट्ट थुङजि ।
ङाइ आकुदा ङ्योइजि, ‘चुमि आइराक आहिन, आकु ?’
आकुसे ङादा गोल्छेसे पाङजि, ‘चुमि, खालाङ आइराक हिन्लोम आले– ङाला मान माले, मान ।’
ओतेबिसि आकु ज्युम नेजि । आकुला नेबारि ङाइए नोन ह्रो लाजि ।
पेबा
ज्योज्यो टङ्के ह्वारारि म्हे मोइबाइगे मुबा ।
ङाइ ज्योज्योदा ङ्योइजि, ‘ज्योज्यो, ङाइ ह्राङला गिक्खे आङसि तेला, ह्या वा ?’
ज्योज्यो टङ्केसे ङापाट्टि फ्लिक दोबान सुङजि, ‘आङसि तेबा दुइरि ङाला लिदाचा म्राङना आलाउ होइ, आले ?’
ङाइए नोन, ओराङ नोन लाजि ।
म्हे मोइसिलिच्छा; ज्योज्यो टङ्केदा ङाइ ङ्योइजि, ‘ज्योज्यो, ह्राङसे तिल्दा आङसिरि ह्राङला लिदा म्राङना आलाउ सुङबा ?’
ज्योज्यो टङ्केसे चुते सुङजि, ‘ङादा पेबा खासि, आले ।’
कफी
ङा ज्योज्यो टङ्केला क्याफेरि मुबा, कफी थुङसि टिबा ।
ओतेबान दुइरि खोपोङहेन्दे जाथेबा आनन्दला फोन खाजि, ‘आप्रेन, एदा ज्याबा खाम्बान मुला ? आङि थेबा थेन आकु च्युनिचा खाइओम ? आप्रेननि, खाइमा दोकाला चुरि ?’
ङाइ आनन्ददा पाङजि, ‘ङानि, योनासेन दोकाला । ए, सुर्ता आताउ आपा ।’
योथाङमा
नारायणस्थानला लाथान ज्याल्सिलिच्छा; दिगु चाबारि बिसि योथाङमा याङ्जी, रुपेश, उमेश थेन ङा साउराला गिक्खे होटलरि वाङनिजि ।
याङ्जी, रुपेश थेन उमेश मः मः चाबा ताजि । ङाचा च्या थुङबा ताजि ।
ङानि ब्लि नोन, दिगु चाबाइगे मुबा । गिक्खे म्हि ङानि ब्लिला ओन्छाङला बेन्चरि खासि टिजि । तिरेम होटलला नानादा प्लिक च्याबान थे म्हिसे ह्रिजि, ‘नाना, ङादा दर्जन हाफ मः मः (हाफ प्लेट मः मःदा) बाउ ह्या ?’
ओजा ज्योज्योला ल्हेङमो थेसि ङानि ब्लिला मि छेजि । थाआयाङना; होटल होङना नेजि ।
होटलला नाना थेन ओजा दर्जन हाफ मः मः ज्योज्योसे नोन, ङानि ब्लिला नेबारि ह्रो लाजि ।
आङि
ह्रेङबा दुइलिच्छा; साउरारि ग्योइखाररि दोबा आङि केशरीदा ह्रुप ताम्याङजि ।
आङिसे सुङजि, ‘कोन, ब्राउ फेप्के आङिचा । आस्याङए नोन दिमरिन मुला ।’
आङिसे आमा थेन आपाताइ नोन ङ्योइजि । आङिदा ङाइ ‘ज्याबा खाम्बान मुला’ सुङजि ।
आङिसे आङिचा दोना निबारि म्होइजेन लामुबा, दुइसे लामा निबारि आम्याङनि ।
मिख्लि
याङ्जी लोपखाङला गेसे लामा तिरेङ्हाउ नोन, याङबेलग्यामसे खोपोङरि खामुबा । ङा थेन उमेशचा याङ्जीबिमा; तिरेलिउ खोपोङरि खामुबा ।
याङ्जी; याङबेलग्यामसे खोपोङरि थोन्काबा दुइरि आरु थेबाला मिरि मिख्लि मुबा ।
ओराङ नोन लासि; उमेश थेन ङा याङबेलग्यामसे खोपोङरि थोन्काबा दुइरि आरु थेबाला मिरि मिख्लि मुबा । आकु थेन आरु थेबासे याङ्जीदा ह्राङलासिन; उमेश थेन ङाताइ नोन, बसस्टपदोना साकाजि ।
आकु थेन आरु थेबातेन प्रे रुपेशए नोन मुबा ।
बस लिप आथातेदोनान आकु, आरु थेबा थेन रुपेशसे ङानिङ्हिदा च्यासिन टिमुबा, मि प्रेक छेङसि छेङसि ।