ह्युलरि सेमसे म्हमन्बा ह्राङ, ह्याङ्से बिबा ह्राङ तमबा हिन्साम सायद ह्युल ख्लासि, ग्ला ख्लासि खालाइ आब्रासेला मुला ताला । ज्यार्दि ठिमसे लासि याम्बु ख्लाबा ङाला म्हेमे माम म्हाबारगाङ ग्याप्से म्राङ फ्यासि चिसि तामाङ ठिम सोना लासि थान्बा मुला ।
कोङरे, ताया, तेमे, तिस्या, तेम्सुर चासि ख्वासि छार्ना लासि थान्बा कोला÷छायाजुगु हिन्ना ङाएन । थे ह्युल दातेला मरिण गाउँपालिका वडा गिक हिन्ना । बोँदि (बनेपा)ला बस तिक्युङ्मा जेक्खेन दोजि । बस दोबा दुइरि थे ग्लाला ह्युलबाला सेमसे मु थुर्जि ।
ङा नोन ताङजि, लोप्खाङरि ब्राबा दुइरि बस हाला बिबाम म्हाङरिन म्राङ्बा आरेबा । दाते रेला गोरगिक बस निला, थे सुताइ सेर्खारि जेखेन ।
ताम तिक्युङ्माला हिन्ना नाम्दुङ ङ्ह्याला दुइरि खास्योर सिङ्गुन ज्याल्सि म्हेमेला मिनरि नाङ्साल÷छ्युमे म्राइबिसि ङाला माम, आमा दोगाजि । बोगाल गिक दुइ हेन्से ह्राङ्लान याम्बु कोर्बा सेम पुरा ताजि । बसरि क्रेसि निबा दुइरि बसला चिबा ग्लारि आमा पुप ताजि ।
ङाइ ङ्योइजि– ‘तिक तजि आमा ?’
आमासे सुङ्जि–‘ङ्हिलिक्लिक चुकादे सप्तला गाडि ? क्राङ्क्युर्जि ङादा ।’
ङाइ पाङ्जि ङाच्छ सिगो तिगाइ आता । दुइ तेमाल जात्तर मुबा । जात्तर छुना लाबारि जोङ जोङ हेन्दे ल्हामान ज्योज्यो आले, नाना आङा, म्हेमे मामजुगु दोगोबान मुबा । म्हि ल्हाना म्राङ्सि ङाला माम थेन आमा लोङ्जि ।
सुङ्जि– ‘आप्पाइ चुकादे सप्ताला म्हिकादे ? हानाङ चिला ? बु, ह्वारिनोन आरे तिला चाला ? माकाइ थान्बा चिम, सुन थान्बा भकारि नोन् आरे ।’
ङाइ पाङ्जि– ‘चुरिम बेनान ग्लुतोला । तिग्तामान लाबारि लासाइ न्होर आरेते आता, चु सहर बिबाम चुराङ्बन गोम, चुमि ह्याङ्ला बु चिम म्हले ङाच्छम ।’
मरिण गाउँपालिका–१, सिन्धुली