चु ह्युल्ला चोहोकादेसे गाङ स्योङ चुङ्सि जिन्जि
आझाइ नोन चु ह्याङ्ला ह्युल्नोन चुङ्गे बिसि ब्राजि
चु ह्युल्ला ठिमरि स्युबाकादे कुर्सिरि जेक्खेन बाङ्सि चिजि
ह्युल्ला साँध सिमाना म्हि बैरिसे नाङ्साइ टुलुटुल च्यासि चिजि ।
तिल्दा खाइमादाम्मान पार्टि पार्टि बिसि लिच्छा लिच्छा ब्राजिबा
ह्याङ्ला ह्युल्नोन म्हिसे किन्गे लाजि एला पार्टि तिक्दा मि च्युम्सि चिबा
ह्युल्दा सोना लाउ बिसि म्होकोन चोहोकादे दाम्सि पुइजि
लिच्छारि थेकादे तिनि ह्युल्दा बिमा कुर्सिदा चेगाइ ल्हाना लाबा म्राङ्जि ।
ए ज्योज्योआले नानाआङा चु ह्युल्ला दलाल चोहोकादेला ताम कादे ङ्यान्सि चिबा
ह्याङ्लान ह्युल्ला साँध नाङमा तिगाइ बिआहाम्बा दलाल चोहोला ताम कादे ङ्यान्सि चिबा
दारेम ह्याङ म्होकोन डिक्सि ह्याङ्ला काइ साँध सिमानदोना दोना लाइ
म्हि बैरिदा साँध सिमान आनाङ्गो बिसि थेना ह्युलठिम दोना म्होइजेन लाइ ।
तिल्मा आखेम्हेमेसे शत्रु बैरिला ङोन्छाङ छेसि डासि थान्बा चु ह्युल
दारेम चु ह्युल्ला स्वार्थि चोहोला ठिमसे म्हिला यारि दोगे लाजि चु ह्युल
ह्याङ म्होकोन ज्योज्योआले नानाआङा ह्युल्ला चेगाइ तिङरि थोसि ङाच्छा ब्राइ
चु ह्युल्दा नेपाल बिसि ङोसेना लाबारि खाइमादाम्मान ह्युल्ला माया तिङरि थोसि ङाच्छा ब्राइ ।
घ्याङलेख गाउँपालिका वडा नं–५, बुदुमचुली, सिन्धुली