ए बोइउइसाङला तामाङ, थे ग्यागर दानला तामाङ
ह्राङ मेचिला तामाङ, ङा महाकालिला तामाङ
मुगाइ तिब्बतला तामाङ ,या भारतला तामाङ
म्राङगाइ नोबामेबा तारम्लाङ, तासाइ याङ जाङगिला तामाङ ।
थे गोन्बोला तामाङ, चु ब्राङगिला तामाङ
तिला वति गंगरि रुइजुबा, ह्याङ दिमगिला तामाङ
ला लु तेम्ब ग्लेतेन्बा, तामाङ, बंशला रिमठिम आतेन्बा तामाङ
ओन्माला ग्लेठिम च्यासि छोर्गो , ए दार्सेला तामाङ।
छोरावाला सांग्युर ब्रिबा, ब्रिगु चुङ्बा तामाङ
डा बन्डा टोक्मा पुइसि, फ्युक्पादा सलाम पुङबा तामाङ
ज्यामि कुल्लिरि बोल्बा तामाङ, जिआइराकरि कोल्बा तामाङ
गोसाइ आगोबा ह्राङ थालाउ ए , देशविदेश छोर्बा तामाङ।
खालाइ ह्वाइगोबा तामाङ , खालाइ ह्वाइरि स्याबा तामाङ
खालाइ सोबारि छे लाबा तामाङ ,खालाइ क्रान्तिरि गेलाबा तामाङ
दारेम पालो खाजि च्यागो ,ह्याङ्ला थोबो ख्रेन्गो तामाङ
खाइमादाम्मान ज्यार्दिला लिच्छालिच्छा थाब्राउ ,पुर्खाला ना लि तेन्गो तामाङ ।
(तामाङ डाजाङला दातेला चोहो व्हाइखाब्रिखेन, व्हाइब्रिखेन, कोबोन फूलकुमार बम्जनला चु व्हाइखा तामाङ डाजाङग्याम्से स्हेङबा राष्ट्र ब्यापि प्रतियोतिता २०६५ दिङला गिक्छा व्हाइखा हिन्ना)
