एला चेगाइ हाइ हाराङ्बा हाराङ्बा
खाइमाम सिल्ना सिल्ना ताना लाबा
खाइमाम चु तिङ स्योपस्योप क्रोना लाबा
एलान चेगाइसे ङाला ल्हुइला
अर्थ मुतेबान गोना लाबा
ह्रेच्छाक जेक्खेन आम्राङ्साम
चु सेम धरमर म्योना लाबा
एला चेगाइ हाइ हाराङ्बा हाराङ्बा
जादुवालाला टुनामुना ह्राङ्बा ।
एला चेगाइ हाइ हाराङ्बा हाराङ्बा
चुच्चा ज्योज्योलाइ सेमरि वाङ्सि
थेच्चा आलेलाइ तिङरि वाङ्सि
ख्लाजिम चरासे जाङ ख्लादे
जाङ थान थान लासि
ग्लागिरि तागाइ सिसाइ सोसाइ
बिबा ग्रान चासि
एला चेगाइ हाइ हाराङ्बा हाराङ्बा
कुर पोसि वाङ्बा हिले ह्राङ्बा ।
एला चेगाइ हाइ हाराङ्बा हाराङ्बा
चेगाइसे लासि कादेन म्हितेन छेजि
बित्तासोम दोना ङाला थोपोइ डेजि
लिच्छारि सेमसे तेजि ङादा
आम्च्याङ्से ह्राङ नोन लेजि
स्यान्दोला सेमरि बास चिनिजि
चु लहुइ ह्यान्दे फेजि
एला चेगाइ हाइ हाराङ्बा हाराङ्बा
कार्तिक लाला नागि ह्राङ्बा ।
एला चेगाइ हाइ हाराङ्बा हाराङ्बा
एला चेगाइ मुबा चिम सस्तो कादे
चैतरि ताइबा ल्हाप्ते बाते
ङातेन लेप लेप तासि ब्राजि
खल्तिरि न्होरला बिटा तादे
ङाला चेगाइ मुरिसोम क्लोक चाजि
नागिसे होङ्गाला क्लि चादे
एला चेगाइ हाइ हाराङ्बा हाराङ्बा
ताया बा फिला क्युइ ह्राङ्बा ।
एला चेगाइ हाइ हाराङ्बा हाराङ्बा
मुसाइ ङालान तिङ रोप रोप
आरेसाइ ङालान तिङ रोप रोप
खाजिबा ह्युलरि निसे ङा
खान्दामान निसाइ दोप दोप
एला चेगाइ आचिनि ग्ला गिरि
खाइमा टारि पोप खाइमा जोरि पोप
एला चेगाइ हाइ हाराङ्बा हाराङ्बा
ग्योइ फिला क्युइला फ्रुम ह्राङ्बा ।
एला चेगाइ हाइ हाराङ्बा हाराङ्बा
रेरि झल्को हाना लाबा
ख्रेन्बा फुइबा म्हाना लाबा
म्हुनला म्हाङरि छ्याम नोन तासि
चेगाइला म्हेन्दो सार्ना लाबा
लाङला ह्राङबा ल्हुइ मुबा ङाला
छ्याडि ह्राङ सोङ सोङ हार्ना लाबा
एला चेगाइ हाइ हाराङ्बा हाराङ्बा
नाना लाबा म्लाङ डुडुइ ह्राङ्बा ।
मरिण गाउँपालिका वडा १, टुडिखेल, सिन्धुली ।