नोबानोबा गाङ्कादे फुप्पादा
नुप्पा नुप्पा ह्वाङ्कादे ल्हुबादा
ए ङा चिबा बेनान ग्ला
याखरगिक चे (समतल) सोबादा
खाबागेन मुला सङ्गुल ।
चोरम्बा सङ्गुल !
थेसे फुप्पारि खाला
प्रेबा ब्रोबाकादेसे सोबा दिमकादे
थेसे म्युना लाबारि खाला
भ्रष्टचारसे रुङ्बा छिकादे
ओम न्होङ्ना लाला
तोरमारला नेङ्गोरसे
सप्प्रैदिबा खेतिकादे
खबरदारदा लुबा बाङ थालाउ
ङेमा ह्राङ्बा छर्लङ्ग म्राङ्बा मुला ।
एला गेकादे !
म्लाङ फाइकादे मेलुसि खाला
नासि चिउ फाइला फाल्गि ङेबाकादेदा
होसै ताला एला चलख्याइकादेदा
थेसे ब्याङदा आरे
ह्राङ्ला आमा अंग चुङ्बाकादेदा
बलत्कार लासि चुङ्बाकादे
खबरदार लाबारि खलाइनोन हालोङगो ।
हिन्ना !
ख्रेन्बाकादेदा चाबा सोबा
लिङ्करिकादेदा क्वान तोबा
म्रिङ्कोला थेन ह्रेम्बोकोलाला
लेबाफेबा ब्याङ्बादा
जातिपातिरि स्वोबा डेङ (पर्खाल) फुप्पारि
प्राङ्बो थेन फ्युक्पो बेनानदा
याखरि मालारि स्युबादा
खाबागेन मुला दारेम ङ्हाज्याङ सङगुल ।
महांकल गाउँपालिका, ललितपुर