ए तामाङ हिन्सामि तामाङ ग्योइ पाङ्दोला
सिम्बु, खास्योर साछि मुला ओम म्हाणि पेमा गोम्दोला
ह्राङ्ला रिमठिम थेन दोङरापला ताम लोप्के गोनालाइ बेनादा
ह्याङला प्रिबा ल्होछार हिन्ना बेनान डिक्सि दाङ्तोला ।
मोलाम थोप्जि साङ्गेला धर्म ख्राङसि थाब्याङ्गो
म्हिला धर्म ताङ्सिमाम ह्याङला रिमठिम थाब्याङ्गो
ह्युलला स्हिब्दा सिरुदा हाइमाइ तारमार ताना थालाउ
ङान्बादा क्यारमार थान्सिमाम ह्राङ्लाइ ह्युलबादा रेनालाउ ।
फापारे व्हाइ कोसिमाम टुङ्ना थेन डम्फु ह्राब्सि ब्राउ
तामाङ बिसि ङोसेबा ह्राङ्ला गोइलो क्वान्सि स्याउ
लोप्खाङरि निसि याङ्तामरिन खेबा डोबा लातोला
खेबा डोबा लासिमाम ह्युलला ग्रेन म्हि दोदोला ।
बरु मागाइ मोठे ह्रोसि गन्डु पोलो थेन छ्याम्बा चाउ
म्हिला होइ होइरि एसे ङान्बाला लिच्छा ग्याम थाब्राउ
ए गिक्छा तासि तामाङला मिन थान्सि ङाच्छा ब्राउ
ह्युलठिम थेन रिमठिम आम्लेना ङा तामाङ बिसि गर्व लाउ ।
इकुडोल, ललितपुर ।
