ङोसेबा
तिरेङ्हाउ ङा याम्बुला पुतलीसडकरि ह्वाइखा ब्रिखेन अर्जुन ग्लानदा ह्रुप ताबारि निमुबा । ओजा रेरिन; ह्वाइखा ब्रिखेन अर्जुन ग्लानग्यामसे सञ्चारकर्मी शान्ति तामाङदा ङोसेबारि म्याङजि । ङोसेबा दोन्बा ताङरि शान्तिसे ज्युम नेबान ङादा सुङजि, ‘ङा शान्ति तामाङ हिन्ला ।’
शान्तिसे ह्राङला ओजा ङोसेबा थुइसि टिबा ताङरि ङाइ ‘तामाङ डाजाङ’ला २०० छा बोरि शान्तिसेन ब्रिबा ‘डाजाङबाट हराउँदै महिला स्रष्टा’ क्राछिकला चोमतामदा तिखुरिन थुम डान्जि । थेलिच्छा; ङाइ शान्तिपाट्टि फ्लिक दोसि पाङजि, ‘ङाइ ह्राङदा डाजाङला गिक्खे बोरि डोमुबा ।’
शान्तिसे दाबे नोन ज्युम नेसिन सुङजि, ‘हिन्ला, ताला ।’
शान्तिला ओजा नेबारि ह्वाइखा ब्रिखेन अर्जुन ग्लान थेन ङाइए नोन ह्रो लाजि ।
छिक
तिलाइ दुइलिच्छा ह्वाइखा ब्रिखेन अर्जुन ग्लान थेन ङाग्यामसे शान्ति होक फेसि निजि ।
फेबाबिमा ङ्हाच्छा ङाइ शान्तिदा ङाला ङ्हिाक्छा ङ्हान्बाग्योइला ह्वाइखापोपला छ्योइ ‘नोरी’ दोन्जि ।
शान्ति निसिलिच्छा; ह्वाइखा ब्रिखेन अर्जुन ग्लानसे ङादा तिरेम प्लिक च्यासि सुङजि, ‘ह्राङसे शान्तिदा छ्योइरि तिलाइ छिक ब्रिसि दोन्साम, कादे ज्याबा तासेला ।’
ङाइ तिलाइ आबिनि, नेसिचे टिजि ।
ब्रिगु
शान्तिसे ‘नोरी’ छ्योइदा दिनिथाङमा याङमुबा; ङ्यासे थाङमा ‘नोरी’थोरि चुराङबा प्रतिक्रिया याङजि–
‘ह्राङला ह्वाइखापोपदा डोजि । तुन्बा दुइरिन डोसि जिन्जि । ह्वाइखाजुगु तुन्बा–तुन्बा मुसाइ नोन थेसे पिन्बा स्हे ल्हानान ओजिलो थेन अर्थपूर्ण मुला । अस्पतालरि टिबा दुइरि ब्रिबा ह्वाइखाइ नोन चुते सकारात्मक ताला बिबा आम्हान्मुबा । तासाइ अस्पतालरि टिबा दुइरि ब्रिबा ह्राङला ह्वाइखासे म्हिदा उर्जा पिन्बा मुला । ह्राङदा ह्रुप ताम्याङसि ताङबा खाजि । चुराङबान चुराङबान ह्वाइखाजुगु ब्रिस्युगो । ग्योइकाइला स्यान–स्यान थुमरि नोन ह्राङला ब्रिगु निङगाइ । ज्याबाम्हान्बा ।’