मुग्यामसे ताइबा सिल्बा सिल्बा थे फुमकादे ब्रादाङदाङ सरि ताइबान मुला । बेनान म्हिकादे ह्राङला दिमनाङरि चिजिमुला । आहाना आताबा ल्हाना हासिन आताबा हाराङबा चु नाम ? २०७२ ला बिनासकारि साङगुलसे फुप्पा दिमकादेरि तेरेरे जाकार दुङाल म्हासि निबान ताङरि दोसिन साउन २७ कुनु ङ्यासेहिन्से ग्रेन नाम ताइसिन चिजि । ङिरे सोमरे दोनान आसाङबा नामसे लासि ल्हानान क्युइला म्रुकादे थिजि । क्युइ आरेना सो आहाम्बा चु म्हिल्हुइरि तोबा बिमा ल्हानान नाम हाबासे थेदा कुलु स्होसि हानाङ पुइसे ? दिमन्हाङहेन्से ख्राङगारि हालाइ थोन्ना हाम्बा दुइ आरेबा ।
दिमरि गेलासि ब्लाप्सिमाम मुनारि मेरबान ताङरि हाबा नामसे ल्हानान भलकादे गान्दि माइसिगेन बाङहुन्बान ग्युरु फाप्जि । साप्रा युङबा छ्याम थोसि म्योसि ब्राबा भलकादेसे साकादे ब्योङबान ताङरि ल्हानान डुइकादे फुप्जि । या थेन सुङ थुइबा मिनरि मुबा वस्तुभाउ थेन बु ह्वारिकादे मुठि ड्वासि मुरि रोना लाबा दुइरि डुइसे बगर दोना लाजि । दिन मुनरिन हाबा नामसे लासि नाम्सा नाम्साबादा ल्हानान दुङाल ताना लाजि । कादेला चिबा बासकादे डुइसे ब्योङजि । कादेला बस्तुभाउकादे ल्हुसि सिजि, ब्योङजि । मेरबान ताङरि कादेला दिमनाम डुइसे ब्योङजि । क्यारमार च्यामामि डुइसे दिमकादे आरेमाम चु सेम हानाङ ताजि ताला ?
नाम नाङरिन बाम्सि बाम्सिन नाम्सारिक्यार ह्रो लाबान बेनान डिक्सि ब्राबा ताङरि ल्हुचिबा बस्तु थेन म्हिकादेदा गम्भिर अवस्थारि स्याजि । थेन्दा मान लाबारि बोर्बादा ग्यामकादे बेनान डुइसे डुङबा ताङरि थेनिदा सोना लाबादा नाम्साबा डिक्सि हेलिकप्टर ङ्योइसि याम्बुदोना पुइबा गे लाजि । आपत बिपातरि राङला जाजुबा ह्रोसे नोन म्हिला ल्हुइ सोना लाहाम्बा उदारण गोर्गि ताजि । नाम्साग्यामसे याम्बुरि दोतोबा स्हेकादे ग्याम डुङबासे लासि नोङजि । खानिखोला हाइड्रो पावाररि न्होङजि । लोप्खाङकादे नोन फुप्जि । दोसिन हाबारि हाम्ला चोराङबा बिपतला घटनाकादे । थेताबासे बेनान नाम्साबा डिक्सि चोइतासि चितोला, बिपतला दुइरि राङराङला ग्लाग्यामसे लाहाम्बा ह्रो लानोन तोला बेनासेन ।
चु ग्रेन नामसे लासि म्हिल्हुइ अस्तव्यस्त ताजि । कादे ग्लाकादे ब्लुम्जि । कादेसे मान आस्याप्नि । कादे सिजि । कादे दिमनाम बिहिन ताजि । कादे टुहुरा ताजि चु नामसे लामा । पिडितकादेदा हाल्से ह्रो लाला ? हाल्से च्यासि पिन्ना ? चु बिजोग म्राङमा ना दिनरि ख्रेन्बा फुइबा ना मुनरि हुँराबा हाजि ङादा ।
