क्यारसे जासे नोबानोबा पिङ छे दोङसे प्लिङबा गाङ । बेंसिरि चे फाँट । चेला ज्याङपट्टि छङछङ ङ्ह्याबा स्योङ । चेरि बजार मुला । थेरिन सरकारि गेदिमकादे मुला । बजार ताबान कालेश्वरला लाथानरि निबा ग्यालम मुला । बैतर्णिधामला लाथानरि थेग्याम नोन दोला । चापागाउँ थेन ठुलादुर्लुङ, गिम्दि थेन संखुला म्हिकादे बजारला ग्यालाम ताबान हाबा निबा लामुला । गाउँपालिकाला गे तामापाल्से म्हिकादे खाबा निबा ताचिबा ताला बजाररि । मिन चल्दिबा होटेल थेन रेष्टुरेन्टकादे स्याङ्बा मुला । बजारला कुनिरि सोसे न्हान्बा जजुबा ब्राङ मुला । थे दोर्जे थेबाला दिम हिन्ना । म्हेन्दो सोमला दिमथेमेसे दिमरिन जाजुबा प्रोखाङ (खाजाघर) चालइतिबा मुला ।
हाङबा लाला स्ह्यो, तारतार ताना बामा ताइबा मुला । सिम्बा लाबा सिरसिर ब्योङचिमुला । नोबा गाङकादे स्ह्योरि क्योलोलो ताइखाबा दिनिला होइसेरसे मोतिला महल राङबा म्राङजिमुला । दोर्जे थेबा माङग्यार ख्याङरि चिसि ब्लोबा तेमे फिचिला । ङामथाङ गोरकि बाइसाखि कडि राब्थान्मुला । प्यारालाइसिस ताबासे दोर्जेला छिङमासे मार आकोमुला । थेला साहारा बाइसाखि मुला । म्रिङ म्हेन्दोमाया चा दिम न्हाङरि कुदापरि सेलगेङ ख्राङबान मुला । जामे डोल्मो राङगा जोरि चिबा ताङकादे म्याप्बान मुला ।
गोरकि पिङ छोनला गाडि खासि दोर्जेला राङगा ङामरि रोकदिजि । गाडिग्याम म्हेन्दो च्युइ च्युङि म्हिकादे फाप्जि । थेरि म्हेन्दो ङा चा अमेरिकनकादे मुबा । केम्जाङ नाम्सारिक्यार गे लाबा गोर्कि एनजिओसे कुइरेकादे बाबा बोर्बा लामुबा । थेनिकादेसे सेलगेङ, च्या थेन तेमेला खु चाजि । चाबा दुइरि दोर्जे थेबाला कमजोर ल्हुइ थेन आर्थिक अवस्था म्राङसि अमेरिकानकादेदा दाया खाजिम । जामे डोल्मो ताङ म्याप्चिबा मुबा । गोरि क्वान्बा जामा डेसि गालगाल मुबासे स्याकादे म्राङ्बा मुबा । खिदि मुबा क्वान क्वानजिबा मुबा । च्युइसे ब्लि दिङला, च्यामान माया खाबा, वाला ग्राम्बा पुपुबा मुबा थेला । प्राङबो ताबासे थेसे लोप्पाडोबा लाआम्याङ्बा मुबा । थेरि खाबा म्हिकादे विदेसि गेन्दुनला अमेरिकनकादे मुबा । दोर्जे थेबादा थेन्से माया लासि तिगाइ सहयोग लाबा सेम थान्जि । अनुमति याङसाम जामे डोल्मोदा अमेरिका बोर्सि पढाइदिबा ताम थान्जि । दोर्जे थेबासे म्रिङजादेन ग्रोइ लाजि । सन्तानला मिनरि गोर्कि जामे आपुइ बिजि म्हेन्दोमायासे ।
दोर्जेसे म्रिङदा सम्झाइतिजि, ‘च्यागो म्हेन्दोमाया सन्तानला मिनरि गोरकि जामे, मिरि थान्साइ आब्लोबा, ङ्ह्याला लानि ह्राङ लासि दिमदा जेना लाबा मुला । म्हिला ह्युलरि म्हिला जिम्मारि पुइबा सेम ङालान खानाङ मुबारि ? तसाइ तिगा लासे लोप्खाङरि पुइखाम्बा आरे, चुपट्टि च्यागो ! चु दोबाटोला सरकारि गेदिम मुबाकादेला चिबा ग्ला तोसोला म्हिकादे खाबा निबा ताचिबा मुला । चुर्ला ल्हानान जामेकोला जाजान दिङरि फादा निजिमुला । व्यापार बढाइतिबारि होटेल रेष्टुरेन्टकादेसे छामेकादे थान्सि ग्राहक डुइबाचिमुला । चोराम्बा ग्लारि जामेला हादुइ खालाजि ज्याबा ताला । थेतबासे ह्याङसे डोल्मोदा पुइबादेन बुद्धिमानि ताला ।’
दोर्जेला ताम म्हेन्दोसे गोजि । थेनि ङिसे डोल्मोदा पुइबा निर्णय लाजि । जामेदा विधाइ लाबारि म्हेन्दोमाया गाडि ङामरि निजि । दोर्जे ङामरिन बाइसाखि जुसि राब्जिमुबा । डोल्मो आपाआमादेन फेसि अनि बिसि क्राजि । जामेदा सम्झाइतिसि गाडिरि युजि । गाडि रुल्जि । दोर्जे थेन म्हेन्दोमाया मिसे ङादेदोना गाडि च्यासिन चिजि ।
दोर्जे थेन म्हेन्दोमायादा आज्याना ङ्हाम्जि । दोपदोप ताबाह्राङ ताजि । ङ्ह्याला लानि ह्राङ्बा याखरगि जामेदेन फेतोमा खाल्ला सेम आक्रा ? चाबा आचानि, जामेदा डान्सिन चिजि । कोलेसे कोलेसे सेम नाबान खाजि ।
सोमदिङ लिच्छा चिठ्ठिला छ्यामरि डोल्मोला फोटो खाजि । राङ ज्यानाले डोचिबा आसेम खाम्बा ज्याबा मुला बिबा साङग्युरसे ताङ्बाला सा बुन्जि दोर्जे थेन म्हेन्दोमायासे । जामेला हादुइला लागिरि सेमन्हाङहेन्देन लादा बाङ ह्रिजि थेनि ङ्हिसे ।
दोर्जे आखाम्बा ल्हुइला ताबासे म्हेन्दोमाया पिडिरि मुबा । पाङगे म्हेन्दोमायासे दोइ ङि पुइजिमुबा । ह्राङला पिर छुम्बारि म्हेन्दोमायासे आइराग थुङबा तिजि । कोलेसे स्यान ह्रेम्बोकोलादेन सम्बन्ध थान्बारि तिजि । तिरे म्हेन्दोमाया दोर्जेदा ख्लासि सडकरि ठेलरि खु चुङबा ह्रेम्बोकोलादेन ह्यार्जि । ल्हुइ अपाङ्ग थेफिरि म्रिङसे ख्लाबा । दोर्जे दारेम वेसाहारा ताजि । चुराम्बारि दोर्जेसे ह्राङलान ङ्होदा दोस पिन्जि । जामेला ज्याबा भविश्य म्राङबा आसरि दुङाल नासिन सोबा सेम लाजि ।
‘ङेबाङेङगोर, ङोसेबाकादेला ह्रो दोर्जेला सोबा आधार ताजि । दोर्जे जाकार हिसाब लाहाम्बा, चिठ्ठि ब्रिखाम्बा तासि सरकारि गेदिम ङामङामरि वाङबा । आपाआमा जाजामारि म्हाबासे आप्च्याङला कुरि छार्बा । लिच्छा याखरगि बाइ साहुला दिमरि चिजि । थेनोन बाइ साहुसे थेदा जागिर लाइदिपिन्जि । जागिरला टाङका सोसि ब्रेल्साङ लाजि म्हेन्दोमायादेन । ब्रेलसाङ लाबा दिङसोमरि जामे गि न्हाजि । सोसि थान्बाला टाङसे घरेडि ग्लुजि । जागिरला ताङरि याम्बुरि निबा दुइरि दुरघटना तासि दोर्जेला छिग्माहेन्से मार आकोनि । थेदा प्यारालाइसिस ताजि । जागिर निजि । दिम स्होआखाम्नि ।’ दोर्जेसे निबा दुइला ताम डान्जि ।
म्हिला ह्रोरि सोचिबा म्हि । उपचार लाबा बिबामि थारेङ ताम ताजि । तिनि बिमा न्हाङगार दोर्जेला ल्हुइ मार मार तासि निजि । ल्हुइ थेला हार्सि डि थेन नाख्रु जे ताजि । क्युइ थुङमा खारेला डिसे मार निबा म्राङमुबा ।
डोल्मो याम्बुला एयरपोर्टरि फाप्मा ङ्यासेला डु ङ्याजिन्मुबा । डोल्मोसे ल्हाना दुइ लिच्छा ह्राङला केवा सारि ज्योइ न्हेमुबा । याम्बु ल्हाना पोबा म्राङजि थसे । थे ल्हानान ताङजि । डाल्मोसे अमेरिकनकादेला सहयोगला ज्यानाले सदुपयोग लासि डक्टरि कोर्स थुम्ना लामुबा । थेरिन तिलाइ दुइदोना गे लासि नेपालरि हामुबा । डोल्मो थेग्याम ट्याक्सि रिजार्ब लासि लगनखेल ताबान दिम निजि । ग्यामनाङ थेसे सेमरि ल्हाना तामकादे क्लाङसिन चिजि । थेला ह्यार्दे बिमा ङ्हाच्छा आपादा उपचार लाबा सेम मुबा । थे लिच्छा गोर्गि दिम ग्लुसि आपाआमादा सुखरि थान्बा मुबा । डोल्मो स्ह्योला नागा क्राबा दुइरि गोटिखेल दोजि । क्यार्से जासे च्यामा ल्हाना पोबा म्राङजि । स्ह्योला दिनिला स्हेरदेन डोल्मो दिमरि दोजि । राङगारि म्हिकादे पोप्बा मुबा । थेनिला गुङरि गोर्गि सिबा कुल्हुइ (लास) मुबा । ङामथाममा गोर्गि बाइसाखि नोन मुबा । चु म्राङसि डोल्मोसे लोङबान चुरि तिगा ताजि बिसि ङ्योइजि ।
पोप्जिबा न्हाङला गोर्कि गान्बासे पाङजि, ‘च्यागो आङा चु दोर्जे थेबाला सिबा कुल्हुइ हिन्ना । ओन्छ्यान गान्बा दोबा दुइरि ल्हाना दुख याङजि । म्रिङसे ख्लाजि । ह्रिसि चादोजि । जामे हाला बिसि ग्याम च्याजिमुबा । म्हुना सिजिम ओन्छ्यान… ।’
‘ओ आपा…, आपा… सेङस्युगो, ङा एदा डान्सि हाजि आपा… ।’ डोल्मो तोरबोल मारबोल तासि ल्हाना ख्राजि ।
