सोनाम ह्युल पोबारि बिसि नाम्सानाम्सा छोरोवाला मेथाङ चोल्सि ब्रामुबा । थोबोरि वाला फेटा थेन ग्यापरि झोला पुइबा लामुबा । कादेसे थेला ताम ङ्यान्मुबा बिसाम कादेसे आन्यान्मुबा । तास जुवा क्लाङबाकादे स्याप्सम थेनिकादेदा तास थेन काउडा सुङरि ख्वामुबा । थेतासि नाम्सारिक्यार थेदा म्राङमा च्यान हादे डोमुबा । बाप आइराक थुङसि ङ्योइब्राबा, डन दोसि छेब्राबाजुगुदा सोनाम थेन थेला ह्रोकादेसे छेक्मुबा । नाम्सारि सोनामसे छार छार म्हिकादे बामुबा ।
मकवानपुर धार्के नाम्साला सोनाम जात्तुकुरिन आपाआमा डोङबासे ज्योज्योचाङला कुरि छार्जि । थेसे कक्षा च्युइदोना जे डोम्याङजि । थे हात्ते ल्होला मुग्याम । दिमरि कु दिङ ङाच्छा डुइसि बोर्बा म्रिङ गिक थेन जा ङि जामे गि मुला । सोनामसे नाम्सा पोबादा बिसि दिम ख्लासि ब्रासाइ ह्राङलान दिमला अवस्थादा पोहाम्बा आरेबा । फोनाङ चाबा गोनाङ क्वान्बादा सुत्ताइ आछ्योबा दिमरि जाहान बिसाम ल्हेसि निबान मुबा । दिमरि देप्पेन म्रिङ जिउ ङिला मुबा ।
‘सोनाम ज्योज्यो ह्राङदा दिमरि योना दोगाउ पाङसि जिम्बागाङग्यामसे खबर पुइगाबा मुला ।’ ताम्बासे थासाङ बाजि ।
‘हाल्से पाङबा एदा ताम्बा तिगा ताबा रो ओम ?’ सोनामला लि दिरफाप्जि ।
‘हाइ दिमरि ह्राङला जाहान ल्हाना सारो मुला रो बिसि ङादा थेसोला म्हिसे पाङ्बा’ ताम्बासे ओदे पाङबातेन सोनाम पेङस्योङग्यामसे छ्योङजि । तिनि सोनाम याक्कर गि पेङस्योङरि हामुबा । पेङस्योङग्यामसे सोनामला दिम दोबादा घन्टा च्युइदे लाग्दिमुबा । बाग्मति स्योङ वाइसि नितोमुबा ।
‘ह्राङला दिमनाम स्याहरदिसि दिमरि गे लाबा ख्लासि माओवादि दोसि म्हिला नाम्सा दिम दिम कोर्सि ब्रासि तिगा याङबा मुला ताला चुदा ?’ सोनाम निबा ग्यालामपटि च्यासि नाम्बु पाराङसे ताम थाजि ।
सोनाम म्हुनाङ ११ बजे दिम ङाम्ला न्हानरि दोजि । दिमग्याम म्हिकादे थेन कोला लाइनुकादे क्राबा काइ थेजि । सोनाम योना योना छ्योङसि निजि । दिम न्हाङरि वाङमा थेला ल्हुइ ह्रोसे कोला न्हाआम्हाम्ना, दुइरिन अस्पतालरि आपोर्बासे जाम्बुलिङ ख्लाजिन्मुबा । छ्यामरि फोन्हाङला लाइनुसेनोन आपाला लि आच्याना फोन्हाङ ग्यामसेन आमादेन छ्यामामा बु पुइजि ।
सोनाम थोबोरि या थान्सि थोमबोर्जि । नाम्सारि टोल ल्हाना आरेबासे नाम्साबा नोन च्याङना मुबा । न्हाङगारदाङसे योनान मायुङकादे दोकासि चल्तिबा बिदि अन्सार बेनान गेताङ जिन्ना लाजि ।
सोनाम कोलाकादेदा आमाला माया पिन्बादा स्यानसे कुल्बा ह्युल नाम्सा पोबा गेदा पिरख्लासि दिमरिन चिजि । छ्यामामा ब्राबा ह्रोकादे दुइ दुइरि हासि पिन्बा सान्त्वनाला बाङसे सोनाम सेम नासि चिजि । तसाइ ह्युलला दात्तेला परिस्थिति च्यामा सोनामदा गोर ङि पिडासे अझन जिबा मुला । गिक नाम्सा पोबा थोप्ताङ, स्यान म्रिङ गुमाइदिबा स्हु ।