आइराक थुङो बिबान मामसे गिलास नाङ ङाला ङामरि थान्सि पिन्जि । ‘ङाम आइराक आथुङसाम टिनोन आखाम थेताति ह्राङदाइ सोल्गो बिबा । ङानि खुइकादेलामि ह्रो बिसाइ तिल बिसाइ थेनोन हिन्ना म्हाले ।’ ङाइ मामदा च्याबाला च्याबान टिजि । बोगाल ब्लिसे च्युइ दिङ छ्योबा थे माम आइराक थुङसिन ह्राङला दुङालकादे म्लेबा लामुला । दिमला ताल फिग्याम बौद्ध छ्योर्तेन च्याबान ह्राङला निबा रे ज्यामुला तिल्दा मुग्याम ङाइ गोआखम्नि ।
माया प्रेम बिबा था आतबा दुइ ङिस दिङरि जन्ति लाबा सक्कलि माम ज्योज्यो ङिसला गोर्गि आङा मुबा । आउदिन मायाला ल्हुङरि छार्बा थे माम जन्ति लिच्छा बिसाम दुङालदान ह्रो मान्सि दातेदोना सोबान मुला । पोङ नाङ सुत्तान क्युइ पुइआखाम्बा दुइरि म्हिला दिमरि खराङले टिजि ताला दाते डान्मा चु ल्हुइ सिरिङ तामुला । थे दुइरि जामेला दिमनाम योना तासाम आपाआमाला सेम ताङमुबा नाम्साबासे ज्याबा पाङमुबा ।
वादिरि निमा दार्बुङ पुइबारि आखाम्म कादे दार्बुङ थिजि । स्युमिला बाङबा कादे न्हाजि । दार्बुङ गि सुत्तान पुइआखम्बा तिल लासि दिमनाम लाला बिबा दाते ह्राङनोन छोर्मुला मामदा । दोसिन आइराक थुङबान पाङबान निजि मामसे । उर्से बौद्धला छ्र्योतेनरिक्यार लुङदर लाबारि फ्याङसिन टिमुबा बिसाम ङाला सेम मामला तामरि तोरमार तोरमार तासिन टिजि ।
‘आहिन आइराक आसोल्बा आङासे ? सोल्गोले चुमि दिमरिन स्होबा लोकल म्हाले । स्यान्दो ह्राङबा काडा आरे ।’ मामसे ताइबा स्वाकादे उन्बान ङेजि ।
‘ताला म्हाले’ ङाइ मामला सेम थान्बारि आइराक च्युप्प जेक्खेन लाजि । मामसे पाङबा ह्राङनोन आइराक ब्रोइ खाबा मुबाटिम ।
‘आहिन आङा ङ्योइजि तिला ? तामनोन आपङनि ।’
‘आहिन माम तिनि मामतेन ह्रुप तामा सेम ताङसि म्हाले । बरु मामला स्यान्दो तामकादे सुङस्युगोले ।’
‘ङाइ तिनिदोना ङाला दुङालला रापकादे खालाइदा पाङबा आरे । दिङ ङिस छ्योमुबा । ङाइ तिरेम सुत्तान म्राङबा आरेबा बोरास ङाला ल्हुइला ह्रो, थे बिसाम च्युइसे कु (१९) दिङला मुबा । नाम्सालान ताम्बा गान्बाकादे बासि ह्रिबारि खाजि । जन्ति बिबा तिला थानोन आतानान ङानिला जान्ति ताजि । दातेगा गिसेम गि ताङसि जेक्खेन जन्ति लामुला । थे दुइरिम आपाआमा, ताम्बागान्बासे स्याल्गर छ्योत्माहेन्सेम जन्ति लानोन तोमुबा ।’ दोसिन आइराक थुङबान मामसे ह्राङला राप पाङबान निजि ।
‘ङादा मायुङ दिम बिबा तिकान था आरेबा । ङाइ दारे किन्बारि खाला ए चुरिन टिउ ह्या बिसि थान्मुबा आमासे । आमामि म्हुना तसाइ किन्बारिन आखाजि । ङा स्योरि डोङ रेसि बोमो खाबान आमाजा दोजि । आमला कुरि निसि क्रामा च्यागो जामे दरेम एला दिम बिबा थेनोन हिन्ना, चुरि मि खाइमागि जेखेन खाबारि ताला बिजि ।
थेलिच्छा ङा आमाला दिमरि आनिना ह्राङलान दिमरि टिजि । थे ताम ङाइ लिच्छा जेक्खेन था याङजि ।
मुरिसोमला बु सुदोमुबा थे दुइरि । लोप्पा डोबाला चलन आरेमुबा । म्हेमेसे ङादा आसेबा गेकादेरि ह्रो लामुबा । च्युइसे सोम (१३) दिङरि ङानिला जामे ताजि थेह्राङलेन लासि च्युइ सोम (३०) दिङ छ्योमा ङानिला जा जामे गोर च्युइ ताजि । जाजबा आले दिङ गिला मुबा । म्हेमे नाबा ताजि थे दुइरि दात्तेह्राङ अस्पताल आरेमुबा ङाइ तिला लासे कोलाकादे लाइनुन मुबा । लामा बोन्पोकादेसे ल्हामान स्युइबा छ्योत्बा लाजि म्हिसे बेद लाजिम पाङजि । रेदाङसिन म्हेमेला ल्हुइ खरबान निजि थेराङलेन लासोम छ्योमुबा म्हुनाला च्युइ ङ्यादाताला दात्ते डान्मा थे दुइरि घडि च्याबा चलनएन आरेबा । ङा लाइनुदा ङ्हे ख्वाबान मुबा म्हेमेसे पाङजि लु दारेम ङाला निबा दुइ ताजि ए आक्रना कोलाकादेदा ज्याना च्यासि टिउ बिबान ङाला ङामरि खासि ख्लुब तामुबा । थे दुइ लिच्छा दोसि खाइमाइ आरेजि ङादा ताम आपङजि ।’
मामला लि दोप्प ताजि । दोसिन आइराकला गिलास सुङरि बोर्जि । ङाइ तिलाइ पाङबारि आखान्नि ।
‘माम माम ! च्यागोम थे लुङदार लाबारि कादेज्याना फ्याङ्बा ?’
मामसे थे लुङदारदा मि आकोनान च्यासिन टिजि । ङा बिसाम दोसिन मामला ताम ङ्यान्बारि आतुर मुबा । थे लिच्छ मामला लिरि जजागि ताङबा म्राङजि ।
‘ङाम चु केवा लिच्छामि लुङदारला ह्राङबा केवा किनगाइ । थेसे ह्राङनोन जाम्बुलिङ क्योङला केवाकादेला सेम ताङना लाखाम्गाइ । ल्हुइला चु दुइदोना ङाइ लुङदारदा गोआखाम्बा मुबा तिनि गोजि । म्हेमे डोङसि लिच्छा ङादा कोलाकादे छार्ना लाबारि ल्हानान गाह्रो ताजि । ह्वारि बु ल्हाना मुबासे स्ह्यान्दोला गे लाबारि निआदोजि । आसार साउन ला क्योङ सुन साङा सुदोमुबा । थारा रादोमुबा । क्वान कोन्बारि जामा दुइरि दात्ते ह्राङबा कोनकादेला बाजार आरेबा । ङानिदा ल्हामा दुख मुबा गे लाबारि । ह्राङसे राबारि आखामसाम कोन कोन्बारि आम्याङमुबा । खाडिला राबा कोन जेक्खेन कोन्दोमुबा थे दुइरि ।’
गोर सोम मुइ न्हे न्हेबा मुबा । खाइमाम स्ह्यो गिनोन न्हे न्हेबारिन दुइ निबा । केन सोबा ता क्रेसि नाम्सा क्योङ कोर्मुबा बिसाम स्युमि ल्हानान सोझो मुबा । ङाला मिरि मिख्लि म्राङबारि आखाम्मुबा । ङाइ जाला लि एला लिरि म्राङमुला थेतासि एसे सेम कोङना लासि म्हिला ओन्छाङरि दिम तासि टिदोला बिमुबा ।’
‘स्युमि डोङबाहेन्से ङादा झन दुङाल काप्जि । ङादा ह्रो लाबा खालाइ आयाङनि । ह्राङला ल्हुइ ह्रो बिमा ग्रेन स्यान्दो खालाइ आरेमा सेम सेमरिन कादे क्राजि ।’
ल्हुइ गाङसाल आछ्योमान माम ह्राङला ल्हुइ ह्रोतेन फेदोबासे ल्हाना दुङाल न्हाजि मामसे । खाम्बा दुइरि ल्हाना दुख लाजि । दात्ते आखाम्बा तामा चाङ सोमला बोमो ल्हुबा म्हि ताचिमुला । दाते मामदा कान छाक गि थेन बास पिन्बारि चाङकादे गिसेम गि गुङरि छेचिमुला । बौद्धला छ्योर्तेन च्याबान मामला रेकादे निबान मुला । थेरिला लुङदर फ्याङसिन टिमुला ।
