थे न्हपे रे दिमरि चपे क्यन अरेपल । ङ्यम्पइ गेत स्हेङपे बुरि नो अमचे न्हचि । दुलु सेप्रा न्हङ बोलोक्डिपरि ग्याचचे म्रङजिम दुत्बचि । अप थे केपक्योर नो मलेसिया यर्पल । दो खपल अरे । सेप्राचे बपे कोला जितागि तपचे थे मिन छ्यम्प थेन्चि । ता चचि, खले छर्चि योक्को रेङपइ राप मुप ।
छ्यम्प सेप्रा चजिम नो छर्सिनो बोर्चि । टङ ग्लपरि यर्पे अपल फोन अख, चिठि नो अख । हुचुचे छ्यम्प म्हेमेत छ्यारि नुप्चि । ता चइ ता थुङकेरि छ्यम्प म्हेकेत ङ्हि टिडिचि । छ्यम्प रङकि छह्रो चप म्रङपिन गतेक थो ग्लोङचि थे हिसाब नो अरे । हिसाब थेन्जिम तइ लक ।
छ्यम्प ल्हेकोर स्यर्पे ल्होरि थे क्ररि छ्याकि दोत नापिन्चि म्हेमेचे । अमचे बङ पिन्चि, ‘अले मर्थइ कोला छ्या त लोङडि अदो । अम जचे फाप थेक्क्या ।’ ओते पङमम अमइ ख अथोल । मिख्लि ब्रसक्नेम । छ्यम्पचे अमइ मिख्लि फ्यापेग्यम्चे म्हेमेचे पिन्पे छ्याकि तमसुक किन्चि । सेम बङल्या ङ्हेप्नङ्हेप्न हिक्क तचि । मिक्लि डोङचि, तिङ ज्योर्जिम का तेप ह्रङल्या मिचे मिख्लि डोङसिम टिचि । ‘ढाप थलो, अम तिङ ज’ पङथेन्जिम म्हेमे यर्चि । अम ज जहु ब्रा फेजिम लकरिर यर्चि ।
सिसङकि रेत गि छ्यम्पत लङइ चइ म्हेन्चि । ह्रङजा अरेपल म्हेके न्हेरि च्यापलम ब्लि मुपलिम । अमचे थटङो पङन पङन ह्रङकि म्हेमेल बि थेचे गि टङचि । छ्युतारि ब्रापे छिङकेनतिङ लङइ छोपले ह्रपह्रपजिम चचि । चजिम ल्हम्रङरि म्रा स्योत्ङिचि ।
ङेसे नमटि छेर्कु कुजिम युपलम छि दोत ना अम्यङननो म्हेमेचे बेर्काचे ग्यङखचि । लङइ ह्यो बि म्हिन्च्योत स्हेङपिन्चि । होतेपे ङेसे छ्यम्पचे सेचि । थेमे म्हेमेत ङित फिच्र्योत स्यङपरि अप म्हेमेचे छुम्पल बि म्हेन्चि ।
ओतेक्योर नम्सरि प्रङनात रेन्परि बि तुम्बक नापे म्हिम्हा मुपल । छ्यम्प नो हुचुरि ङिजिम ल्हेपफेप प्लेपनङ्पकि विरोध स्हेङस्या बि यर्जि । अम गिनो पित्थेन्चि । गते व्हम्ल्या अङेन । थ्यापनो असेङ । अमचे ग्यम रोत्चि । अहँ छ्यम्पचे ह्रङकि तिङत युङ्पा सेङनेम । गुप अखम ।
न्हम्स्योदङयन्सो थे दिमरि छ्या ह्रित्पे म्हि युप तिप्चि । छ्यम्प तिवा तिवा म्हुनारि अम दोपरि युप तिप्चि । तिखेप छ्यम्प ज्यपखपे पुलिसचे थे अमतङ अज्यपे लक स्हेङजिरो बि थ्यामु । तोपामम छ्यम्प सरूवा तचि ह्रो बि थ्याचि । आर्मि क्याम्प प्रुङजिरो बि सम्तर ङ्यन्चि । थे अमचे खुच्छ्यङ बि ङ्यन्चि ह्रप्चि । कम्ब्याटटि पिएलए फित्त मुपे यान यान्जिम यारि बन्दुक के रि ग्रिनेट नाडिपे छ्यम्पइ फोटो च्याजिम छ्यम्पइ अम होलेनो टिडिचि । ह्रो सेताप ह्रङ्ल्या थे तिङकि म्हेन्दो तिङकि डा सेत्ख्लाल बि लोङडिचि ।
तिरेत दिङि गलह्यम्परिक्योर छ्यम्प नम्सरि खचि । थे तिङ नम्सइ लाजिम ब्रपलम्हा नो खचि । सत गि लिप्चे थे यम्बुरि ङिचि । पार्टिचे शसस्त्र द्वन्द पित्जिम शान्ति प्रकृयारि वङपे घोषणा लचि । संसदीय प्रकृयारि वङचि । थेनो अन्तरिम संसदकि माननीय सिफारिस तचि ।
चप अयङजिम फोइथेन टितचपे प्रङना कोला तिङि संसद तचि । म्हेमे लङइ ह्यो तिङि माननीय तचि । तेपाक्योर नम्सरि ङिमम दङ्पो सेला पङपल जम्मानो म्हेन्दो मल तिङ खादा थोजिम टिडिपलिम । हुचु न्हङक्योर थे अम थुल्कु यानतिङनो ज दोखनेम ।
