थुल्कु फेङका ग्याजिम खन्डो फोत्चि स्ह्योम्हुन्चे । तिङि ग्यु गोर तोर बोर्पे चि डोङपल बि अपचे तामसोर पियुजेत्नेम । पेट थोजिम लोप्खाङ ङिपे ङ देमा खचु डोखाङरि टितोस्या हिन्चि ? होलेनो म्हेन्जिम मुस्यु, सुर्के ओसेम क्यार्कि ढाकररि युचि । खकेन ताचि । धोति डुनले डोङचि । डेम्सङ खोले लेप जङचिम खन्डो फोत्चि ।
तिङि डोङपे ङ डुरेतमा फेत्युल चोङ्क्योर म्हेन्जिम ङ्हरचेत खङडेलटि दोन न्हचिम टिचि । सेम्टि म्हेन्जि अमचे अप त ता ता जङचि सिम । ढाकर वल्मम पोङ नङल्या आइरक टिम । हुचुतिङ बग्च्या ल्हुम्बु ओसेम थुल्कु पुका गि टिम । थुल्कु पुकान्हङ पच्यरा फेङ्का टिम ।
सेम म्हेन्लु स्यर्चि यङप योपल मुसम ह्रो राङ्ल्या ज्यपे यन जङपस्या तल ङइ अपत अमचे । बस्र्योयोनी न्हपे ङि थेत बगलकि सुङ फो लुपरे गतेक सेम क्रोसिन । ओन्छ्याङ ङइ अप अम त ! होलेनो सेम म्हेन्लु स्यर्जिम ग्युब्रङ मेन्चि थङब्रा केरपगङ पित्थेन्जिम पङकरचे गेलेब्रा फेत्चि । गोररि खुत्कि चचि । सेम थुल्कु फेङकारि नो मुप । ताले चोतेप तचि ङ्यङ ? ताले सुरकुलि गम्बुर यनअम्यङ ? ताले झोल नाचिम याम्बु चाम कोरअम्यङ ?
‘अले तोपाल्या चो दरमा छेरमा थाजिम मेप्रा उ दोमे थेन लम्यङप ।’ तिङि ओते तमु बि दङचेत दोमु ?’ अपचे सुङचि । ङचे खुत्कि ल्होङनो अखम । खुरख्लाप अखम गारो गारोल्या ल्होङचि ।
अप पाचेरकि ग्या ग्याजिम गजक्कले म्रङमु । दिम नम्स पित्थेम्परि ताइ नो अमेन्जि व्हि ता ! म्हरकु, स्यर्कु तसिनो टिप । पाचेरकि ग्या भन्न पुकाइ ग्या ज्यप, फेङकाइ ग्या ज्यप । होल्या म्हेन्डसिन । अमचे पित्खजेत्पे फेङका खुमजिम न्हुस्या तल, पुका तित्स्या तल असेम क्रखि सुर्केचे अर्लमउर्लुमल्या न्हुस्या तल । ङ होलेनो म्हेन्जिम ब्रइडजि गेलेब्रा, लुम्बु, सिन्दुङ होलेनो होलेनो । सिम्पचे ग्रम्ब लेप्चि, दोतचे गो लेप्चि, डाचे पख्लो लेप्चि । चोले पङके सिम्पे लापरि प्रङनाकि टु छ्योप्जिम वार्म एसि तचि ।
ङेसेरि मेप्रा उ दोचि । नोस्यङ डप वरवर स्यमो डेमसङ क्यन म्हुन्दुङ न्हङ चचि । ख्रेन्पचे तल, फो न्हङ चुम्बक मूप रङल्या छेङचि । ङेसेरि अमचे जङपिन्पे आइरक क्योरि खलेपल्या लेप्जिम सुरूप्प थुङचि । मुस्युलु न्हङ वङमनो म्हेर्नेम ।
अप ल्हेकोर ङ्हियन्सो चोलेनो ग्यु छसिनो ब्रपल । म्हे गोर भन्न यक्को दुःख । सिम्प, लेप्प, नम, गङ, स्योङ, छप्प ल्ह, ल्हिङ चोलेनो ब्रतोपलिम ।
स्होरि छिङमम अमचे जङपिन्जेप्पे थुल्कु पुका खुम्जिम पच्यरा फेङका न्हेन्जिम अप मस्तल्या स्हिम्डिपलिम । चुरिनो म्रङचि माया चुरिनो म्रङचि दया । होलेनो चोलेनो ठिटाक्योरहन्सो ग्यु लप्डप । दबम ख्यामसम्म खम्मु । फेङकाचे गतेसम्म दु खम्मु । पाच्यरचे ख्यामसम्म गपखम्मु ।
अप अमइ माया हुचु फेङकारिक टिम ।
