पापिला कोरो

ङाइ डान्मा फेस्योर मामजा म्हेन्दो ब्लि कोन चिमुबा । कोक्सा नाम्सारि मामला जेक्खेन दिमरि नाकि न्हामुबा । म्हेन्दो ब्लिनोन कोनला गे दोइ आरेबासे सेर्खारि सिकार लामुबा । पाङग्रे नाकिला ह्रो मामला कोनकादे । ग्रेनजाला मिन फुम्बा साजि । स्यान्दोला ब्लेगु पाराङ, आइते थेन माइते ।

दिन म्हुन पातले सामुदायिक ह्रिन्हाङरि सिकार क्लाङब्राबा । थेन्दा सिकारिला कोनएन बिमुबा । खडके म्हेमेएन सिकारि । सिकार लाबान ताङरि म्हेमे सिबा रो । तोङबाखोरला मामला कोनकादे आज्यानागि न्होङजिम । खाइमादामान पोरुवा सेत्पा आसेम जि आइरक थुङसि हल्ला लाबा । चुनिकादेसे लासि चु नाम्साला मिननोन न्होङजि, होपखोरला दोक्चे दमइसे गुनासो लाजि । स्यान्दोसेएन चु ठिटाकादेदा तिगाइ ज्याबा सिप लोप्सि पिन्दोला बिसि काठुइ लाजि । नाङसाल समुहला चिसाङरि चु ताम थोन्जि । फुम्बा साजिदाएन चु ताम सेम निजि । स्यान्दो आलेकादेसेएन ज्याबा तामरि सहमति लाजि । लाबाम लातोबा खाइ तिगा गे लातोबा होइ, ङामि तिगाइ आसेबागा फुम्बा साजिसे पाङजि । ङाला यारि तिगाइ सिप आरे तिगा लासे स्यान्दोसे काप्चि । आ हिन्बामि हिन्ला एन्ना यारि तिगाइ सिप आरे । सिप बिबा गे लोप्तोमुला । आलोप्ना खालाइदा था आता । बरु ओक्तेन नाम्साला झ्याकुले पाराङला जाथेबा हर्केसे सिकर्मि गे लामुला थेसे सदरमुकाम खादबारिरि खेप्पा मिल कारखाना ठ्वाङमुला रो । फुम्बा साजि निसि लोप्को चुराङ लासाम खाराङ ताला ? च्यान्दोरमा मामसे उपाय तेजि । मामला उपायसे साजि नोन ताङजि ।

लु होइ न्याम्सोमि ङाजा खादबारि नितोनाम । बरु थुन्दा खर्चजा चुनोन समुहग्यामसे छे दोन्तिोजि साजिसे मामदा प्रस्ताब थान्जि । मामसे पाङजि आइसे जेक्खेन बिसि आता स्यास्दो सदस्यकादे सेरे, भक्त, आइते, माइते थेन लोडेदा नोन ङ्योइगोलेओम । चु ताम साजिदा नोइ ज्याबान छोर्जि । मामलान तामदा साजिसे प्रस्ताब थान्जि छाङमान सदस्यसे साजिदा ह्रो लाबा सहमति लाजि । चुराङ लासि नाम्सारि बेरोजगार दोसि सिकार क्लाङसि जेक्खेन आतानि होइ म्हेमेतेन आपाला ल्हुइ चुनोन सिकारसे चाजि । ह्याङला पालोरिम चुराङ लासि आता, ङा चा तालिम किन्छि खाला । तालिम किन्माहेन्छे समुहला ह्रोकादेदा नोन लोप्ला । तालिम किन्छि यारि सिप तामाहेन्छे दान्तेला ह्राङ खर्च आरेना सापकोटा नाम्सारि तमसुक थोसि ब्राआतो । चुदे ताम लासि साजि खादबारि निजि ।

लाबारिम ह्रो लानोन तोजि । जामेकोला सदस्यकादेसे नोन तिला तिला लाखाम्ला बिबा ताम थान्जि । छाङमानसे साजिदा ह्रो लाबालिच्छा जेक्खेन जामेकोलादा तालिम पिन्बा निर्नय लाजि । नाङसाल समुहला चिसाङ थुम्जि ।

गोकाकार दिम बिमा खालाइला ज्याबा पेसा थेन खेप्पा सम्पति आरेबासे लामा तालुङ नाम्सारि जहिलेन अनिकाल थेन बेसा नातोबा अवस्था मुबा । लासोम चाबालिच्छा फोइदान चितोबा । क्यरसेला नाम्सा मेलुङ, गेलुङ थेन हङलालुङ बिसाम जाकि फ्युक्पो मुबा । बिनोन तोमा थेन्लाजा नाम्सारि बिसाम खेतिपाति ज्याबा ताबा । खोल्साखोल्सिरि आलाइचि रोबा । बु ह्वारारि सुन साङा रोमुबा । डापडुप नोन ताबा । तालुङ नाम्सा चा ल्हा बिमा ल्हा नोन आहिन, बेसि बिमा बेसि नोन आहिन । सुन साङा तिलाइ आरोबा । सुख्खा प्याङखार ग्ला । अम्बाले, हुक्काराम, बिर्खे थेन छोटे कुसाइ दुगु ला ल्हागतिमाहेन्छे सिक्किमरिक्यार निजि । सिक्किमरि थेन्से ल्हाप्चेला आलाइचि बगानरि गे लाबा रो । तियुङमा नोन निमुबा । चुपाल्छे नोन निजि । स्होबा खाम्बा जतिसे गे लाबा । आखम्बा जतिसे नाम्सा ख्रुङबा ।

हिन्बामि अम्बाले थेन पाराङसे सिक्किमलान ग्लारिनोन ल्हानान गे लासि अम्बिथाङ बिबा ग्लारि आलाइचि बगान ग्लुबा मुला रो । ह्राङलान जाजुबा टुङसि स्होबाला मुला रो । थेनोन ताबासे तियुङमा सार्कि च्याङबाला जा एन ओसोन निमुबा । दोसि खाबा आरे । थेसे नोन तिलाइ लामुचिवा । दिम ख्लासि ब्राबासेम ब्राजि चुरि चिबासेमि तिगाइ लातोजि । क्योङसेन चुराङनोन बिबा चुजि । नाम्सारि ब्योनगादेदा क्योङसेन बिमुला दारेम चुनोन नाम्सारि चितोला । क्योङसेन सिप लोप्तोला । नाङसालला चोहोमामसे बिबाह्राङनोन ह्राङलान नाम्सा स्होदोला । बर्खा जिन्छि सेर्खा खाबान मुला । तियुङमाला नाङसाल समुहसे टाङगा ह्रो पुइबा फुम्बा साजि नोन नाम्सारि दोसि खाजि । क्योङनोन नाम्साबा ह्रापह्रुप ताजि । क्योङलान आस मुबा थेसे तिलाइ लोप्सि खाजि । आले च्याङबासे ङ्योइजि एसे झ्यकुले पाराङला जाला कारखानारि सिकर्मि गे लोप्जिओम ? साजिसे पाङजि ङाइ लोप्बाजे आहिन च्याङबा दारेम स्यान्दो ब्योनजुगुदा नोन लोप्सिपिन्बा आट थोसि खामुला ।

ए हे एदा ओदे ल्हाना आट मुसाम न्हाङगारहेन्से मोक्कोनदा ह्रुप्सि तालिम तिदोला । बरु तिक तिक लादोला ग्रोइ लातोजि । मामसे पाङजि न्हाङगारदाङसे फुम्बा साजिसे सिकर्मि तालिम पिन्बा रो । छाङमान ह्रापह्रुप ताउ रो बिसि नाम्सारि पाङगो । न्हाङगारदाङसे दिपज्योति सामुदायिक भवनरि जुरे, बिरे थेन धनेसे क्योङदान ह्रापह्रुप लाजि । तालिम तिजि । ला डु दोनाला सिकर्मि तालिम लोप्जि । तालुङ नाम्साला ठिटाकादे सिप लोप्सि सिपालु दोबालिच्छा खालाइसे नाम्सारिन कारखाना थान्जि । खालाइसे डकर्मि थेन खालाइसे इलेक्ट्रिसियन तालिम लाबान सेम मुबादा सदरमुकाम पुइजि । नाम्साला ब्योनगादे दारेम गे म्हाइसि बजारबजार कोरआतोजि । ह्राङसेन ह्राङलान गे लाबारि तिजि ।

बिर्खे थेन हरिचादा बिसाम जाकि फरक गे लाबा सेम खाजि । टाकान टुकुन गे लाबारि नाम्सारि ज्योज्योआलेजुगुदान आछ्योबा गा । बजाररि निसि ठेक्का लाबारि पुजि आरेसे थेन्दा पुजि ह्रुप्पा विचार खाजि । चुला लागि थेन्से तिलाइ दिङ ह्युल फिरक्याप निबा सेम लाजि । दिङ ब्लि ङ्हा चुनोन सिपला गे लासि टाङगा ह्रुपम्याङसाम बजारला ठेक्का ह्रुप्सि स्यान्दो आलेगादेदा रोजगारि पिन्बा म्हाङ म्राङजि । चुनोन लिच्छा थेन्ला सेमरि खाजि सिप लोप्सि बेरोजगार चिबा नाम्साबागादेदा नोन गे पिन्बारि खाम्ला । बिरे थेन हरि चुनोन म्हाङ थोसि कतारला अलसाफि कम्पनिरि गे लाबारि दोजि । तिदिङ लिच्छा गाइगुइ ताम थेमुबा थेन्छे ल्हानान ज्याबा गे स्याप्जि रो । नाम्साबासे बिबा चुजि ङ्हाच्छा ङाच्छाम सिकार लासि चाजि । मुमा बडाकु आरेबा हाक्टाला उ बिबाह्राङबा अवस्थाला चु नाम्साला क्रिप पोसेला ताजि । चु गेजा बिरे थेन हरिला उदाहरन पिन्बारि चुजि । फुम्बा साजि एन नाम्सारि जाजुबा मिसिन थान्छि ह्राङलान कारखाना मालिक दोजि । ह्राङलान यारि गतिलो सिप आरेबासे लामा नाम्साला ब्योनजुगुह्राङ थेसेएन तोरछ्योङमारछ्योङ लाबा डान्मुबा । खाइमामि चाआम्याङना फोइदान ब्राबा डान्मुबा । दातेमि नाम्साला क्रिप नोन पोपाह्राङ तामुला । तालुङ नाम्साला आर्थिक अवस्था थेन ल्हुइ तोर ताबाला कारन गोरगिक मुबा मामला उदाहरनिय गे ।

नाङसाल समुहला चोहो मामसे सिप लोप्बा प्रेरना आपिन्बा हिन्साम तिनि चु दुइ आखासेला । थेनोन मामसे पाङबा लिच्छा फुम्बा साजिसे सिप लोप्बा हिन्ना । ह्रेङबा दुइ लिच्छा चु प्रमानित ताबाला मुला तोङबाखोरला काजिसे डान्जि दारेमजा बिसाम चुदेदोना योगदान दोन्बा गोरगिक मामदा डेन लातोला । मामदा डेन फुल्दोला । खाबा रेरि मामदा क्योङसेन डान्सिचिबा स्होतोला । चु ताम काजिसे नाम्साबा ह्रुप्सि पाङजि । ज्याबा तामला ज्याबान परिनाम खाजि । हिन्ना हिन्ना मामदा मोक्कोनसे डेन लातोला । मामलान उपायसे ह्याङला चु अवस्था पोजि । खालाइला ह्रेम्बो खालाइला जा खालाइला जामे बेरोजगार चिआतोनि । बिनोन तोमा बेरोजगारि एन च्याङना तासि निजि । मुक्लुङगे साजिसे एन काजिला तामरि समर्थन लाजि । मामलान कारनसे छाङमानसे सिकार क्लाङबा ख्लासि गे लाबारि वाङजि । आधुनिक पेसारि वाङजि । दारेम मामदा ह्याङ डिक्सि डेन फुल्दोला । चु तामरि क्योङनोन सहमत ताजि ।

मिनदोर्जेसे ङ्योइजि मामदा डेनमि फुल्दोबा तसाइ खाराङ लासि ? छाङमान डिक्तोला ङादा एन था ताजि तसाइ खाराङ लासि लातोबा ? काजिसे मिनदोर्जेदा उत्तर पिन्जि एदा थाहा मुनोन मुला नि । डेनफुल्बा बिबा ह्याङसे खेप्पा गे लाआतो । ह्याङ छाङमान डिक्तोला मुतेबान नाम्साबासे मामदा डोलिरि पुइसि छ्योलिङगुम्बा कोरो लातोला । धर्मनेइ ताला । रिमठिम एन डिक्ला । ओदे लामाहेन्से मामला डेन नोन ताला । चु नोन तामरि क्योङलान सहमति ताजि । छाङमानसे ताला ताला पाङजि । मामदा डेनफुल्बा साइत चा चुपाल्छेला सोनाम ल्होछाररि थोन्जि । ल्होसार खाजि । ल्होछाररि ह्राङह्राङला दिमरि पाठपुजा लाबालिच्छा नाम्साबा छाङमान ह्रुप्सि बिसेस बिधि बिधान लासि छोइलिङ गुम्बा होना बोर्जि । गोन्बोरि टेकबहादुर लामाला समुहसे मोलम लाजि । मामदा कोरो लाबा दुइरि छ्योइलिङ गोम्बो सोमरेम कोरो लाजि ।

ओथेबा कोरोरि नाम्साबा छाङमान खाजि । क्याम्साङ जासामला म्हिनोन खाजि । गोन्बोरि खेप्पा मेला ताजि । तियुङ नेग्युङ खाइमाइ होराङबा आतामुबा । खाजि फ्या लाजि निजि । कोरो लाबालिच्छा पाङग्यालरि चिसि छोफुल्बा दुइ खाजि । छाङमान ख्युरुरु लासि चिजि । गुङरि माम थान्सि छाङमानसे फ्या लाजि । मामला मोलम किन्जि । ह्राङलान कोन फुम्बा साजिजा आम्राङनि । गोन्बोरि हल्लाखल्ला ताजि । साजि खानाङ निजि । खाजि कि आखानि । खालाइसे म्राङजि कि आम्राङनि ङ्योत्बाम्हाइबा लाजि । ताम गोबान निमा ङाइ म्राङबा बिसि खालाइसे आपाङनि ।

ओत्थेबा गेताङरि आखाबा कारनजा क्यारसे दिमला पाराङदा बिबा रो । ङादा म्हेमेला सिकारि पेसाग्याम स्युर्बा पापिला कोरोरि ङाइ बो आकिन । मामसेन लासि ङाइ नाम्सा ख्लासिमाम अरबला छेप्बारि कुर्सि टेबल स्होतोजि । म्हिला ह्युलरि निसि तोबामाबा गे लातोजि । दाते न्हा चुरि कुर्सि मुला न्हा टेबल मुला । बरु म्हेमेला बिडो थामतिसि सिकार क्लाङबा हिन्छाम पोरोवाला काल्बा स्या थेन आइरकमि थुङम्याङसेला ।