ङ्यासे नाखिकादे जुबाला जुबान मुबा । ङाइ हानाङ जुजि बिसि झ्यालग्याम माङग्यार च्यामामि तोजा म्राङरिका चिम । आउसिला म्हुना ताबासे दोप दोप्पा मुबा ।
ङ्यासेला निस ङह्यामा म्राङला गैंडा ज्योज्योला दिमरिका नाखिकादे जुबाला चिम । थे ज्योज्योसे दिनसे गेलासि बाबा टाङगासे स्यो ङ्यासेला छाक टारदिबादा कुदाबरि मे लुङबा मुबा । थे ज्योज्योसे बाबा टाङगा जाजाकर जा आइरक थुङबा मुबा ।
म्रिङकोलाजा सागुला रा आदियारि नाबा मुबा । ङि दिङ लिच्छा राला बथान बढतिसि गोर च्युइ ताजिम । सागु थेन थेला रा बो लामा गोर ङा ङा थोप्पा मुबा । थेसे रा चुङसिमामि लाइनु मुइ ग्लुजिम । ङे चुङसिमाम जाकर लेङबा ङे जा चाबा मुबा । छिमेकि छाम बुलुङजासे लासि स्होसि चाजि बिसिमाम बोमो लाबा मुबा । तिरेम थे छाम बुलुङसे गैडा ज्योज्योदा सुराइ दिसिमाम भट्टिरि आइरक ख्वासि भट्टिरिन बाङबा छेबा लाजिम ।
सागुसे दोङ गुर्बादा गैडादा पाङजिम । गैडा ज्योज्यो दोङ गुर्बारि सागुनजा निजिम । सागुसे गैडादा दोङ तोर पट्टि दोना लासि गुरो । मार पट्टि दोङ निसाम ङाला गोठे फुप्ला बिजि । दोङ गुर्मामि झन ‘ङाइ तरिसे दोङरि ताम्मा तरिसेजा ङाला पुइर तामजि ।’ दोङ गोठेला छानारिका टासि छाना प्लेक ख्याजि । सागुसे गैडादा बाङजि ।
सागसे एला तिनिला गे लाबाला टाङ्गा आपिन बिजि । गैडासे ङाला गे लाबाला टाङ्गा आपिन्साम ङाइ एला चु तरिसे थोबो ख्लेला बिसि तरि थोबोरि बोर्जि । सागु लोङसि टाङगा पिन्जि । गैडासे भट्टिरि निसिमाम आइरक थुङसि बेनादान बाङजि । थे आइरकसे म्योजि ।
दिमरि जा गैडा ज्योज्यो दिम आखानि बिसि म्रिङ कोला पिर लासिमाम चाबा आचाना कि ख्रुङसि चिबा । गैडा लिच्छा दिमरि हासिमामि म्रिङ कोलाकादेदा छेबा बाङबा लाजि । दिमला झ्याल, म्राप थिबा ताङमालकादे ब्याबा, हुर्बा लाजि । ओन्छ्यान म्रिङ कोलाकादे दिगिन गे लासि दुबा झन मेर आबुङबा लाजि ।
गैडा ज्योज्योसे दिमग्याम मुनाङनोन ताप्पा । म्रिङसे कोला थोसिमाम दिम ङामला ढोड बोररि निसि चिजि । गैडा ज्योज्यो आइरकसे मुगिन फिर्सि चिजि । ‘जति जति लिच्छा ताजि थेदा आइरकला रङ सिल्जि ओदे ओदे थेदा होस् हाजि ।’
छिमेकरि निबाम छिमेकिकादे थेदेन ताम आपाङबा दिम च्यामामि दिमनोन सत्ते आरेबा मुबा । ताङ च्यामामि ताङनोन सत्ते आरेबा । गैडा ज्योज्योदा आइरक आथुङदे आताबा, तिङ ने बेबा, आइरक नसारि साप्पा थराङ ताबारि ‘स्यास्या खेरो न्हाङगु न्हाङगु खेरो ।’ बिबाराङ ताजि ।
गैडा ज्योज्योसे याखारगि ङामसि ह्राङला म्रिङ कोला, दिमनाम ब्याङसि माया मारदिसि आइरक पोङनाङ ग्लुसि कान आचानाकि युङबाला उरि निसि आइरक थुङसि हवाइ कोसि ‘आइरक ङाला तिङला छ्युगु दोजि, आइरक आरेसाम ङा जा सिजि ।’ बिसि ह्वाइ कोसि कोसि थेला लुइसि चु हयुलदा सधैला लागिरि साप्राला तागि (टोपी) कुजि ।’ आइरकसे लासि बैराग ताजि ।
महांकाल गाउपालिका–३, गोटिखेल ललितपुर