चुनाव हाजि । ग्यालाम क्यारमारला पोस्टर पम्लेटकदेसे म्हिकदेला सेम हालाहाम्बा छेङबान मुला । दोङ, बिजुलिला पोलला च्योदो थेन दिमला धुरिरि ख्यापथान्बा वाला, उर, तार, पिङगाइ राङबिराङ झन्डाकादेसे बेनादान वाम्बान मुला ।
पाल्देन गोर्गि बेरोजगार ब्योन हिन्ना । थेसे नाम्सारिन दुख लासि लोप्पाडोबा लाजि । थेसे फाइला म्राप एसएलसि वाइबातेन मुरि फ्याङबा नामेह्राङ फ्याङसि ताङबा ग्लारि निम्याङला बिबा म्हाङ म्राङमुबा । चुह्राङबा म्हाङ छ्योबादाह्राङ मुरालि दोसि सोझो आताबा चिम । सानाइह्राङ कोक्टेङ ताबा चिम । ओन्छ्यान ! थेसे था आयाङनि । था तासाइनोन सेमसे आङ्यान्नि बिले । तिनि नोन सेमसे आङ्यान्ना आङ्यान्नान टाङगा ताजि ।
पाल्देनदा ह्रो मिङमासे फोनरि गे गि मुला पाङसि पार्टिला प्रचारप्रसार गेदिमरि ङ्योइजि । चुनाबरि रेबा गोबोनदेन ह्रुब ताना लाजि । चुनाबकुनु पार्टिला एजेन्ट चिबारि थेदा टाङगा पिन्जि । ‘लिच्छा तिगाइ टाङगा काप्सि पिन्ना, हात्ते चोदे बोर्सि निउ’ गोबोनसे मिङमा थेन थेदा वाम्जि । ताम थेसि पाल्देनला सेम बिसाम गाङला दोङ ह्योङबाह्राङ ह्योङचिजि ।
‘चु टाङगा बोर्सि नाम्साला तिगाइ ठिटाकादेदा जक्कर ख्वागो । चु ताम हालाइदा आपाङगो’ मिङमासे कुल्जि । पाल्देनला नाम्सारि थे पार्टिला म्हि हालाइ आरेमुबा । पाल्देनदा बिसाम हाजिबाइ पार्टि आताङमुबा । ह्रोसे कुल्बासे आङ्यान्नाइ आताबा, ङ्यान्गे सेम आताङबा ताजि थेदा । काम्बा सेम थोसि दिमरि दोगाजि । हालाइदा तिगाइ आपाङना कान चासि म्हेर्जि ।
पाल्देन मि च्युम्सि रोल मेरसाइ नाबेङ म्हेर्बा आरे । भित्ताला घडिसे दुइ थाबान मुबा । घडिला घन्टासुइसे म्हुनला १२ वाइजिन्जि । सेमन्हाङरि लाबा लुङसुर स्याचिमुला । ‘हात्तेदोना ङाइ आज्याबा गे लाबा आरे । चु गे नोइ ओदे आज्याबा ह्राङ आछोर्नि । तिगदा ङादा निन्द्रासे हाप आख्वाइनि ।’ पाल्देनसे ह्राङसे ह्राङदान ङ्योइजि ।
एसएलसि पास लासि दिङ ङि ताजिन्जि । जाँचरि चिट सुताइ ह्यो लाआहाम्बा पाल्देन ताम पाङबा सेसाइ ताइ ह्राङबा मुबा । ह्राङला कमाइरि बिस्वास लाबा थेदा तिनि गे आलानान यारि तोङ टाङगा स्याप्जि ।
नागा ह्वाबा क्रासि स्ह्योला ह्याल ताबा सङकेत पिन्जि । तोर छ्योङ मार छ्योङ लसि सेम ल्हाना दुमुबा । ‘न्हाङगार नाबेङ गि ङि तना तनान पक्कन नाम्साबा बेनासेन था ताला असेम थे दुइरि खार लासि लि ओन्सि ब्रासे ? दोसि ओदे टाङगासे ङादा ल्हुइनाङ छ्योसेदा आरे । बरु पाले गि लासि चु टाङगा दोसि पिन्तोजि’ पाल्देनसे अठोट लाजि ।
प्राकप्राक छाचिबा मि न्हाइबान मिङमादा फोन लाजि, ‘मिङमा ! ङालाम दुबाइ ग्याम्से भिसा हाजिम । चुनाब ङ्हाच्छान फ्याङतोसेदा ताजि । ङा नाम्सारि चिआम्याङबासे थे तिल्माला टाङगा दोसि पुइगाला ह्या, हालदा पुइगाउ ?’
‘ङाइमि एदा तिगाइ खर्च लाबादा तगाइ पाङसि ताम डिक्ना लाबा हिन्ना । एदा आतोसाम खालाइदा पुइगाउ ले’, मिङमासे पाङजि ।
‘लु थेराङ हिन्साम ङाइ ङे बाबा गाडिला ड्राइभरदा पुइगाला’, पाल्देन्से फोनरिन पाङजि ।
हदाइ हदाइ चिट्ठिला खाम माइसि थेरि टाङगा युसि टेपसे ख्वाराङराङ खिसि पुइजि । पल्देनला सेम ताङजि । ल्हिबा दोइ न्हाबाते छोर्जि । थे कुनु ङ्यासे ङोर डुइसि डुइसि मेर्जि ।
चुनाब हाजि । निजि । दिङ गि लिच्छा ह्रो गिदा पाल्देनसे बेनान ताम सेजि । ‘थुक्क एला बुद्धि ओसोन हाबा टाङगा थान आतो ? कि ङान्दा पाङसाइ तसेदा ?’ चोराङ पाङसि थे ह्रो ङेजि ।
