चु राप नेपालला पुर्व दुइ नम्बर सिन्धुलि गडिगाङ अदालतला हिन्ना । बादि प्रतिबादि गुङरि मुद्दा चलप ताचिमुबा । बादिसे प्रतिबादिदा बिना कारन दुख पिन्बा नियतसे जेक्खे मुद्दा युबा मुबा । थेसे लामा प्रतिबादिसे बादिदा ज्याना लासि न्यायला स्वाद ख्वाबा बिचार लाजि ओम न्यायधिसदा ह्रुप ताबारि निजि ।
थेसे न्यायधिसदा मुतेबा देन्बा ताम थान्जि ओसेम ह्राङदा न्याय पिन्बाला लागि डान्गाइ बिसि फेबा दुइरि न्यायधिसदा राडि फुल्जि ।
बादिसे म्हान्जि, ‘ओहो ! ङाइमि थेदा दुख पिन्बारि जेक्खे मुद्दा युबा हिन्ना । न्हाङगार थेदा दोसि प्रमानित लासि आहाम्नि बिसाम नाम्सारि ङाइ खाराङ लासि लि उन्सि ब्रासे ।’ चोदे म्हान्सि थे न्यायधिसदा ह्रुप ताबारि निजि ओम ह्राङदा डाना लापिन्बारि बिन्ति फुल्जि । थेसे फेबा दुइरि न्यायधिसदा क्योलोलोला दुहुनो मालि म्हे फुल्जि ।
फैसलाला दिन खाजि । प्रतिबादि ढुक्का मुबा थेसेन मुद्दा डाबा तामरि । तिल्दा बिसाम याखारगि ताम बादिसे फत्तुर जेक्खे लाबा मुबा स्यान्दो तामजा थेसे न्यायधिसदा राडि फुल्बा मुबा ।
फैसला खामा थे तिनछक्क परतिजि ओम छागाग्याम ताइमाह्राङ ताजि । प्रतिबादि डाबाला आतासबाजि लाबान दोजि । न्यायधिस अदालतला गे जिन्सि क्वाटररि वाङजि । थेसे ह्राङला सेमला दुङालदा काआखाम्ना ङ्योइजि, ‘सम्माननिय सिरि ! डान्स्ह्युोम ङाला राडि ।’ थेला क्रालि काइ थेसि सिरिमान मुइमुइ ङेजि ओम बिजि, ‘थेम म्हेसे चाजि ।’
थे दिन हेन्से तिनिदोना नेपालला अदालतरि चु नोन परम्परा चलप ताचिमुला ।
