नाम फ्रुसफ्रुस ताइचिमुला । ताइबा नामसे डेन्साङला ल्हुइदा सितल पिन्हाम्बा आरे । क्याच्चा दिमरि दिनसे हाबा गोर्कि छामेला लिक्रिप मिरि ता…ता…राप्काला डेन्साङला । थेन लिक्रिपसे मेल्हामसे क्रोदे क्रोचिबा मुला सेम ।
तामाङ गोइलो क्वान्बा छामेकादेदा म्राङबाम चुबिमा ङ्हाच्छा कादे म्राङजि कादे । तासाइ थिङम्हेजा तिनि डोम्बो हाबा छामेसे डेन्साङला देन्छिन सेम ख्लोन्ना लाजि । थोबोरि तामाङ कुलागि तारतारबा क्वाइदाङ लि । म्हेरो निसि बुबा साल्गिह्राङ ल्हाउल्हाउबा क्रा । क्युल्क्युल्बा मि प्लेक प्लेकबा ना स्योङ रेङबा ल्हुइ । ल्हुइदेन तोकजेबा क्वान्बा तामाङ गोइलो । सेमसेमरि डेन्साङसे थे छार छामेला ल्हुइ डोजि । थाङका खाइबासे ब्रिबा लाला आङसि ठ्याक्कन । डेन्साङसे मोबाइल च्याला । ङ्यासेला च्युइ ङ्ह्याजिन्जि । क्याच्चा दिम चुच्चा दिम बेना म्हेर्जिन्जि । डेन्साङ बिसाम हाइमा राइदोला हाइमा डोङरेला । दुइ दुइरि झ्यालग्याम च्याला क्याच्चा दिमला ख्राङगारि दिन्से थे छामे म्राङमुबा पाङसि ।
थेला मिन तिका मुला ताला ? दिम हानाङ मुला ताला ? ब्रेल्साङजा पक्कान आलाजि आलाजि । डेन्साङ ह्राङसेन ह्राङदान सेमसेमरि ङ्योइला । तेरेर एसएलसि पिन्सि चिबा डेन्साङसे ङ्हाच्छा लोप्खाङ डोबारि निमा हानाङाइ आम्राङजि जोस्बा छामे । जेबा थेन ज्याबा स्हेदा सेम आलाबा म्हि हाला तालोम ? थे दिन्सेला छामे ह्राङला स्होबारि सेमरि ताम क्लाङबा चुजि डेन्साङसे । मिन तिगा मुजि ? ह्रुइ तिका मुजि ? हाल्दा ङ्योइसे डेन्साङ सेमरि ताम क्याङला । स्यान्दोदा ङ्योइसाम ब्रेला । थेदान ङ्योइगे सेमबाङ आहा । सेमगिसे थेला फोन नम्बर ह्रिगे मोबाइलरि बेना सेमतामकादे पाङगे म्हान्ना । सेमगिसेचा आहिन आहिन फोनरिम सेमसे म्हान्बा बेना ताम पाङआखाम । ब्रिताम गि ब्रिसि सुटुक्क पिन्बा सेम थोजि डेन्साङसे । खुमग्याम ब्रिगु थेन स्युगु स्यासि चुजि बिताम ब्रिबारि ।
तिङमाइ….
दुइला म्हेन्दो
ल्हुइला म्हेन्दो
ङाला सेम थिरि आरे तिनि । एसे ङाथोरि आज्याबा थाम्हान्गो । देन्छिन तिङमाइ चुबिमा ङ्हाच्छा ङादा चोस्बा हाइमाइ ताबा आरे । हाइ तिगा ताबारि मुग्याम तिनि गोर्कि दुइला म्हेन्दो सार्बा म्राङसि ङाला सेम ङाइ थिरि थान्हाम्बा आरे । था मुला ङादा थे दुइला म्हेन्दो हुइरि मुला । थु हाम्ला वा आहाम तिगाइ था आरे । थेन दुइला म्हेन्दो ल्हुइला म्हेन्दो थुबा सेम थोसि ल्हानान कोङना सेमबाङ थोसि एलान मिनरि गोर्गि ब्रिताम ब्रिबारि चुजि देन्छिन तिङमाइ…। आसा मुला ङाला ब्रितामला जवाफ याङला ।
नम्बर ब्रिबाला मुला फोन लाउ ।
मिसे ङोआसेसाइ सेमसे ङोसेबा एलान दुइ ह्रो
डेन्साङ
ब्रिताममि ब्रिजि थे छामेला यारि दोना लाखाम्बा हार्लासि ? दोसि समस्यारि ताजि । हाइमाम ह्राङसेन पिन्गे म्हान्बा । आता ह्राङसेन पिन्माम तिका बिला थेसे आता स्यान हालाइदा पिन्पुङतोला बिला सेमगिसेचा । ब्रिजिन्बा ब्रितामदा दोसि ज्याबा छिक लासि ब्रिसे वा कम्प्युटर टाइप लासि पिन्गे वा सेम क्लाङला डेन्साङला । कम्प्युटर टाइप लासि पिन्साम ह्राङसेन पिनहाम्बा सेम थोजि । हालाइसे म्राङसाइ नोन छ्योइला तिमाइ पन्ना पिन्बा म्हान्ना । कम्प्युटर लाबा सेम थोजि । दोसि कम्प्युटर लाबारिम क्याम्साङ नाम्सारि दोतोला । योसेन निबा सेम थोसि म्हेर्बा बाङ लाजि । तिसारि रोल म्हेर्सि डेन्साङ । ओदे गाइमा बल्ल बल्ल मेङनिजि डेन्साङ ।
‘कुखुरि का’ नाका क्राला । डेन्साङ बातर बुतर डोङ रेला । स्वा म्याप्ला या लि ख्रुला । हालाइदान तिगाइ आपाङना ङ्यासे ब्रिबा ब्रिताम थोसि ब्राला क्याच्चा नाम्सारि कम्प्युटर टाइप लाबारि ।
डेन्साङ क्याम्साङ दोमा कम्प्युटर साइबर आठ्वाङचिबा चिम । डेन्साङ चिया होटल न्हाङरि वाङजि चिया गिलास ङ्हि थुङमा जेक्खेन क्योलोलो साइबर ठ्वाङगाला प्रकास । दावदावा चिया बेना लासि डेन्साङ साइबर हाला । प्रकास यारि फ्या चुङसि गेन ‘ओ लास्सो डेन्साङ ह्रो । चोदे योना हानाङसे ओम ?’ प्रकासतेन या बासिगेन ‘ओसो हाइमागिम कोर्काबा म्हाले ।’
‘लु स्युगोले ।’ प्रकास स्युदान पिन्ना ।
डेन्साङ देकछ्याला । दुलु सेङजिन्सि प्रकास धुप म्राला । डेन्साङदा बिसाम हाइमा कम्प्युटर लापिन्ना म्हान्चिबा मुला । प्रकास बेनान साङसेङ लाबा गे जिन्ना लासि डेन्साङला ङामरि छ्यानिला ।
‘जाम्सेम हालखबर तिगा मुला डेन्साङ ?’
‘हालखबरमि ज्याबान मुला प्रकास । बरु यिचु गोर्गि ब्रिताम टाइप लापिन्गोले ।’ गोनला ब्रिताम स्याबाइगेन पाङजि डेन्साङसे ।
‘या ताला म्हाले’ डेन्साङला याला ब्रिताम किन्सि प्रकाससे कम्प्युटर ठ्वाङजि ।
नाकासे माकाइ गेडा दुइदे लासि टाइप लाजि प्रकाससे । न्होङबा थोर्बा ताजिवा बिसि डेन्साङसे ङ्हिरेम सोमरेम च्याजि ।
टाइप जिन्माहेन्दे प्रिन्ट लाबारि चुजि । ब्रिताम प्रिन्टरग्याम्से गाङसाल चेक्खे थोन्जि । गाङससाल हाकगाजि । प्रकाससे हाम्दे स्यागे बिसि बाङ लाजि आतानि । तिलो प्रिन्टर न्होङसि प्रकास फोतोक फोतोक बोल्जिबा तिलो डेन्साङ ब्रिताम स्याआम्याङबासे सेम क्रोसि छटपट ताचिबा । प्रकाससे प्रिन्टर चोर्से ओर्से साम्ना साम्नान बिजुलि झ्याप निजि । ‘ला नाङसाल निजि’ पाङसिगेन प्रकास ङ्हाछारि ख्यापथान्बा नाङसालला रुटिङ च्याला । ‘ल खतम ताजि डेन्साङ ह्रो ।’ नाङसाल निजि दिनिला ङ्हि ङ्ह्यामा जेक्खेन हाला ।’
डेन्साङ खुइया लासिगेन ‘हायोम प्रकास ह्रो तिगा लास्योम दारे, नाङसाल नोन आरेमाहिन्दे ।’ प्रकास सरकारदा केसिगेन ‘ह्याङला ह्युलरि स्होसि लासि चाबारिन आपिन्नि । । तिरेला १५–१६ घन्टा नाङसाल निला । गेलासि चापुङनि डेन्साङ ।’
‘चु ह्युल्ला छर्दो छामे ब्योन छारबाङकादे मुग्लान ख्याप्बा ओहनि म्हाले प्रकास ह्रो ।’ प्रकासला तामरि छ्युगु काप्जि डेन्साङसे ।
‘हिन्ना हिन्ना डेन्साङ ह्रो । ङादाइ चु ग्लारि चिबासेम आरे ।’ प्रकाससे पाङजि ।
डेन्साङ मोबाइल घडि च्यासिगेन ‘नाङसाल हाबा दुइदोना ङा तिक्दा चिसे चु यासे ब्रिबा चा बोर्गे । नाङसाल हाबाइदेन प्रिन्ट लाथान्गो प्रकास ङा दिनिरि हाला ।’ डेन्साङ प्रकासदा बिदा लासि ङ्यासे ब्रिबा ब्रिताम गोनरि युसि चान आम्याङबा च्यानह्राङ तासि दिमरि दोसि निला ।
डेन्साङ दिमला ख्राङगारि दोमाइदेन ह्राङला दिमरि बिमा ङ्हाच्छा क्याच्चा दिमरि दोला । क्याच्चा दिमला म्राप झ्याल डुङबाला मुला । म्हि हालाइ आरे । तिक्लो छार म्हिदा ब्रिबा ब्रिताम प्रिन्टररि गाबा तिक्लो छारम्हि निजिन्बा वा पाङसि सेम क्रोला । डेन्साङ क्याच्च दिमला क्वारारा च्याला । दिमफि दिमदि बेनान ग्लारि म्हाइला हालाइ आम्राङ । सेम खोल्सि ह्राङलान दिमला तालरि निसि तिसारि ब्लिङला । हाइमाइ मोबाइलरि दुइ च्याबा हाइमाम थे छार छामेला लिक्रिप डान्ना डान्नन ङ्यासे फिना म्हेर्बासे दातेचा मेङनिला । डेन्साङ ब्रिताम यारि थोसिगेन ।
डेन्साङ फात्छोर्मा क्याच्चा दिमला ख्राङगानाङ म्हि छाजिबा थेन बेनान क्राक्रा ङ्होरङ्होर तिका ताजि पाङसि डेन्साङ बातर बुतुर रेसि दिरि हाला ।
‘हाला तिका ताबा आमा ?’ डेन्साङसे ख्राङका ङामरि थोम बोर्चिबा आमादा ङ्योइला ।
‘हाइ तिगा ताबा पाङसे कोला म्हाङरिह्राङ ताना लाजि । तिल्मागेन चुन क्वारारा दिनि फेदे लासि ब्राबा बोइमो थेन ह्रोचा याम्बुरि निबा स्होरि गाडि ह्रिल्सि सिजि रो कोला ।’
डेन्साङ छागासे ताइदे ताजि । घटना हानाङ ताजिम बिसि फेसबुक लिदेव ठ्वोङसि च्यामा ङ्हाच्छारिन म्राङला । ‘देउरालिमा यात्रु बस दुर्घघटना हुदा घटनास्थलमै दुइ किशोरिको मृत्यु’ छ्यामरि थेन तामाङ गोइलोरि छिबा छार छामेदा बोइमोला आङसि म्राङला । थे म्राङसि डेन्साङसे सेम न्हाआहाम । जाम्बुलिङ ख्वारख्वार दिङबा छोर्ला, ताना ताना डेन्साङ ब्लाङ गुर्ला । बेनान तिगा ताजि पाङसि डेन्साङ मुबा ग्लारि छोकाला । हालाइसे क्युइ स्वाला । हालाइसे क्वान स्युपिन्ना । ओदेमा गोनला ब्रिताम सारि फ्याल ताइला । ब्रिताम सेम दुइसि नाम्साला हर्के मास्टरसे च्याला ‘ओहो ओन्छ्यान डेन्साङसे तिल्मा दाबा छार म्हिदा सेम लासि ब्रिताम ब्रिबाला चिम, लु लु चु जाक्कि ङ्हाज्याङ ताहाम्ला डेन्साङदा मानखाङ बोर्सि ख्लागो चुरि थान्सि आता । सेमरि क्रास्यारि ङ्हाज्याङ स्हु मुला ।’ बेनासे ह्रोलासि डेन्साङदा मानखाङरि बोर्ला ।