कोलारि नो अपअम ह्यामचे सिचि । रख्लि ह्रङगिनो चेत्चि । कोला जा म्हेमेचे कुम्चि । म्हेमे सिमाम रख्लिल बबुच्यङपचे थेत सोचि । कोलारि नो दुङल नापे रख्लि छर्सिनो बोर्चि । रख्लिल पखोर ङछ्यङ तसिनो बोर्चि । ब्रेततिङ कुतिङक्योर रख्लि बामेन काजि जा बादो टिङिचि । काजिचे निकित रङल्या दुल्प तिप्चि । ह्रङकि ङ्होरि ब्रिपलनो होतोप टिम बि टु मिख्लि छ्योप्जिम गेत सेङचि ।
मार्पाक नेत्रावति जोङ श्री ३ सरकारचे अधिकारीत विर्ता पिन्पल मूप । अधिकारीत काजि उपाधि पिन्जिम हुचु नम्सरि पित्खपहेन्सो तामाङ, कामि, दमे म्हामि ङ्होरि ब्रा ठोक्चि । रख्लि काजिकि सेवा स्येङडिपे बेलोरि तिरेत गंगजमुनारि बोम्पो च्यापरि ङिचि । बोम्बोतिङ बेस्ल्या स्यचि । थेचे नेरि ज्यपे साहु यङखइ बि बाङ रित्चि । यिन्परिप ओतेक्योरकि ज्यर्तिबामेन सेम ज्यपल यङप यक्को ङ्हछ्यङ तम तपल ।
रख्लि बोम्पोइ ङ्ह रप्जिम स्यजिम युइडिपलम मलाय लाहुरे दप्डिपलिम किम्तङ ल्हुङटि । म्हुन्डुक्योर थेचे नो कुत्तो दप्पङिचि । नापजाप लजिम गल्लाचे पङचि या छ्युदिङमो फेत्तोप । चामकि रेरि यु बि स्योस्यो गि पिन्चि । ‘बहादुर घले गल्ला छनोट भएको छ ।’ ब्रिपे स्योस्यो थोजिम ङिचे । सोमरेतकि कुना ‘भर्ती भयो बहादुर’ बि चिक्परि रप्चि । ओल्फाक्योर्नो भर्ति तचि । मलाय लाहुरे ।
कलकत्ता, बम्बइ, दिल्लिरि ङिजिम तालिम किन्चि । बर्माकि लडाइरि पित्चि । ङिपे कुनायन्सो लडाइरि, सेत्प तुत्प डङडङडूङडुङ । गोलि बम बारूद वन सेन्ट्री चोतेपरिनो ङ्हदिङ गल्चि । छरो गतेक सिचि । ह्रङकि याचे गतेक सेत्चि हुचुइ हिसाव ह्वल अख ।
तिरेत रख्लि थे छरोतिङ सर्चटि ङिपल रेरिनो एम्बुस फ्रेचि । थे रोल फो छिर्चि । थे गोच्च थोचिम सतर्क तचि । गोलिचे बमरि टचि । थेचे ग्रिनेट फ्रेपिन्जिम लाङिचि । सिचि म्हेन्जिम मि च्युम लचि । गोलि खपे ग्लारि च्यामम दुस्मन ङ्हि सिनेम । थे बम्जिम क्याम्परि फेत्चि । गोरा सापचे स्यावास पिन्चि । ब्रेभरि अवार्ड यङचि । लडाइ चेक थङ तमम थे दिमरि खचि । टङ, म्हर बजिम डुतिङम रख्लि दोखचि ।
नम्सरि थापा काजिम्हाकि प्लेप नङपचे नम्सप क्राप कि ङेत्परि मुपल । वलागङ गोम्बोङक्योर बामेन ल्हप्पे ताम थ्याचि । तुलबहादुरतिङ छ्याजिम मार्पाकक्योर आन्दोलन स्हेङचि । पुलिस, आर्मि तोचि । तत्तु अधिकारी तोचि । आर्मिचे टाफि म्हइख्लापयन्सो दिम पित्चि । रङकि जागिर बिमा दुनियाकि च्यल्ता फ्लेन्पे ग्यमरि ब्रचि । म्हेमेत ख्लाजिम प्रवासरि यर्चि । च्यु दिङ भुमिगत आन्दोलन स्हेङजिम नम्सरि खचि । वन फ्याजिम टिचि । हुचुरि काजित खोर्पाचे प्रुङजिम छेत्चि ।
रख्लित काजिचे युङपाचे प्रुङचि । थे गि ह्रो योक्को थेल क्र थिचि । थेत हुचुरि नो सेत्थेन्चि । नम्सपइ च्यल्ता प्लोक्परि ब्रपे रख्लि ह्रङकि च्यल्ता टङचिम सिचि । थे सेत्पे ल्हेकोर गि लिप्चे विर्तावाला काजिम्हाचे नम्स पित्सिनो बोर्चि । प्रङना गोर्तेनम्हाइ दिन खसिनो बोर्चि ।