‘आज्योइ, हुजु पसेइ आप्से एदा सत्तन ताबि मेतर मेतर बिबा ?’
‘मेत्तर बिबाम गाल्डिला क्लि स्ह्यार्बा रो, लाउरे आगु सुङबाला ।’
‘ए क्लिगाल्डि स्याल्बा म्हि हिन्ला ?’
जसे आपादा ङ्योत्चि ।
‘चु मेत्तर बिबा मिन, हुजु एगि आगुसे पाङबा ह्राङबा गाल्डि स्ह्यार्बा स्याल्बाइ म्हिइ मिन आहिन ।’
‘ङाइला मिननो मेतर, ता पङबासेम स्यान ?’
आपासे जादा प्रासाल्बारि ङ्योत्चि ।
‘अहाँ, चु मिन खात्तेनो आज्यानि, ताबि खाल्से थेन्बाइला ?’
‘एला मिन ङे थेन्पिन्बा ।’
‘एगि मिन देरेम आज्यो होइ !?’
पिडिइ दारि दुबा न्हाम्याङबा आम्याङबारिन जा चा ताम जाङबान ताङरि थेर स्हेखाजि ।
दुबासे हा…लासि हुइ ताप्पान, ताङरि टिखाबाइ कोलाइ ताम तिग्लो बोर्बारि आपासे चा म्हेमेओन्छे ओन्जि ।
‘उ जा, जादा म्हेमेसे ङोत जेत्चि ।’
‘ङा बेले दुबाला मला जा ।’
‘निउ जा म्हेमेतेङ ! म्हेमेसे जाम्मन सुङबासे मला । म्हेमेसेन थेन्जेताइला हिन्ला चु मिन, म्हेमेसेन बिखाम्बा, म्हेमेदन ङ्योदोसेम होइ !’
कोनकि ताम ह्या लासि म्हेमेसेइ ताम प्रासाल्सि बोर्जि ।
‘हिन्ला, एगि आपाइ मिन ङासेन थेन्बाइला हिन्ला ।’
‘मे ठाबा ठोङबाइ ग्रा थोसि केबाइला मुब्तेङ एगि आपाइ मिन मेतर ङेनो थेनपिन्बाइला हिन्ला ।’
‘मेतर गोप्पा मिन आहिन ।’
‘मेतर बिबाम ‘मे थरबा’ बिब्ला हिन्ला ।’
‘मे थरबादा ‘मेथरबा मेथरबा’ बिमा बिमा ‘मेथर मेथर’ तसि ‘मेत्तर मेत्तर’ तानिमा ‘मेतर’ तनिब्ला हिन्ला ।’
‘ङेनो, एदा ङा चु ‘मेतर’ला नमदर गि पङबा ।’
म्हेमेसे कोनदा राप नाल्सि उइमाला दुइरि कोर्बारि बोर्जि ।
उइमा दाङ्बो ङ्याङ म्हिमा ह्रिरिन मुबा । उरि टिमुबा । रारारोरो, तेमे, काम्बालाङ चासि सोमुबा । स्या चालाइ, ता चालाइ, छिङनो चामुबा । ह्योसि ख्राङसि चाबारि म्हिदेङ मेनो आरेबा । मे मेल्हामुतेन जे मुबा । होरोङ तासि तिरेम ङ्याङ म्हिला आखेसे मे माइबारि किरल्बोदा डेन्जिम । लावालुङसोरदा डेन्जिम । लानिछाङबोदा ज्याल्जिम ।
लानिछाङबोसे मेल्हामुदा ओन्जिम । मेल्हामुदा सिवा लासि मेमामा याङजिम । याङसि बाखामा ग्याम डेतरिन स्योर्सि यार्जिम । सेलयुङबारि वाङसि साप्निजिम । माजिम ।
तालो तालो आन्छ्याङ आखे, थोरोमोरो थमाथोमो तजिम । खकपारि ताइ आखसि सेलयुङबा नो फोजिम, बोजिम, थिजिम । थिसि ब्राःसि च्यालाइ आस्याप्माम थोमथोम दोमदोम ताजिम । चुराङले थोमथोम दोमदोमले ताइटिमा नाङवासाङगेसे ङ्हार्जिम ।
‘सेलयुङबारि साप्पाइ मे देरेम मे नो आरे । चु देरेम सेलयुङबा ताइजिन्जि । देरेम मे स्होबारि मे आमाइना चु सेलयुङबासे चु सेलयुङबादान म्ह्याप्सि म्याप्तोबा । चु म्याप्सि थोन्बाइ मेसर (मेरवाङ)दान मेलुङरि तेत्तोबा । मेलुङ थोन्जि बिसाम थेदेन प्रेप्रे चु सेलयुङबासेन फाइब्रा थोन्बासे मुला । थेनो ज्याबा तसि दोसि स्होसि बोर्साम, बोर्मा बोर्मा मान्बा ह्राङबाइ मेलुङ थोन्बासे मुला । होरोङ ताना लाबारि ह्रिल्हामोदाइ ज्यालो ! लाखाइबादा गोमो !’ सेमरि टाना बिजिम ।
नाङवासाङगेसे बिबाह्रङलेन छाङमान ताम ब्लासि ह्रिल्हामु ज्याल्मा, थे ह्रिल्हामुसेइ खाइबा ला थेन न्होर ला गोम्सि ह्राङकि ल्हुइलानो कपाइतेन सिङखर्बा दोन्जिम । दोन्सि दोलो बिबा ह्राङलेन ताम ठालमाम सेलयुङबासे मेलुङ थोन्जिम । थोन्सिम फिच्या आमागाइ बिसि मेल्हामु, लानिछाङबो, किराल्बो, ह्रिल्हामु, खाइबा ला, न्होर ला, सेलयुङ, युरुङबोनतेन म्हिरेन्छेनमारि जुजिम । थे जुबादेन तिनिदोना मे माबारे । ङ्याङ म्हिसे मान्माकुनु मान्बा राङलेन मे तेत्खाम्बाइला हिन्ला । होरोङ थे मेम्हेला मिननो मेथर टिजि । हुजु हिन्छेनो चुरङले मे स्होखाम्बा तेत्खमबातेन ज्यानाले थरखाम्बादान मेथर÷मेत्तर÷मेतर बिबा हिन्ला ।
‘एगि आपाइ चुराङले मे थरखाम्बाइ केवादानरि न्हापातेन थेइ मिन मेतर थेन्पिन्बाइला हिन्ला ।’ क्रा सुम्बन म्हेमेसे सुङजि । म्हमेइ रापसे कोलाइ सेम थुर्जि । कोलाइ सेम छेम तब्तेङ छ्योङसि आमाकि ग्लुपरि वाङनिजि । ओसेम ङ्हे छेङबान ङ्योत्जि, ‘ङाइ मिन चा ताबि मेतर आथेन्बालासेम आमा ?’
ङ्हे स्युप्मा स्युप्मानो लाइनुइ ङोन्छाङ म्हाङ तजि । म्हाङङोन्छाङ तबरि लाइनु आपा तजि । आपा चा मेल्हाम तजि । मेबोन मेलुङ तसि तोरतोर फ्याङदे लजि । आपाचातेन प्रेप्रे कोला टिजि । टिसि स्युर्मा स्युर्मा आपातेङ जानो मेनमे (मेङ्याम्ङ्या) तसि मुक्र्यङ फिर्निजिम । तिप्लिङ राङले फ्याङ निजिम । चुराङले फ्याङनिमा लिक्याम लिक्याम हङग्या दोजि ? चाल्जि ? थानो आतानिम आन्छ्याङ कोला लाइनुदा । तिरेम्मानो म्हाङसे छिङमाका स्यार–नुप लानि–दिनि राङले आपाआामा ङिनो राङदान च्युमङेत्सि च्याटिब्ला टिम । राङ चा कोयोङ गुङरि ह्योङटिब्ला टिम ।
‘ङाइ कोला, ङाइ आपा, ङाइ ल्हुइ, ङाइ केवा,’ बिबान ह्वाइसित गोइटिब्ला टिम ।