दाङबो ल्हेकोर ब्लि ङोन्नाम नम्सा क्ररि फेङोत ङि मुपाला । हुजु फेङोत ङि रङलेनो रङकि म्राङ–बुरि गेत सेङजिम छुनाले ज्यानाले टिटिपाला मुपाला । थेङे म्हेमेला खिम्तेखोर्चे मुलाइनो रङकि थेमे गिकला, स्यगि कागिलका चाङि खलेइनो आरेपाला टिम । रङकि स्यगि कागिकि म्हि अरइलेनो रङकि खिम्चेखोर्चेत तिङ दिमन्हाङ गिला रङले डिक्जिम टिपाला मुपाला । खलाइ दिमरि ता तालेइनो थेङे फेङोत दोपा मुपाला ।
रोत्राङताजिम थेङे फेङोतता खालचेनो ताङमेन नर्सेत अपङबाला मुबाला । थेङे फ्रेङोत खला नजि पाङपा थेइलेइनो हुजुरि ङिजिम च्याजिम ह्रो छेपा पुपाला ।
तिरेद म्रिङ–रेम्बोनो ह्रिरि सिङ थाबारि ङिबाला मुबा ।
ह्रिरि दोजिम थेङे फेङोत दोप्त माइपरि खानाकोरनो कोर्चि । होजु दुइरिनो पाराजोमारि फाचे थेनेमा ब्रापि पारागुरि ह्ये (ह्रि सिङसोर) जाङ म्रङजि । ह्येला जाङ म्रङपचेम फाचा ङि, ‘खुयु ! ङा चु पाराजोरि ङिजिम ह्येला जाङरि खुतु ठाइजिम बाइबा ए चुरिनो टिरिउ ।’ म्रिङचे पाङचि, ‘एचे दोलोनो जि थुङबाला मुपा होलेप पाराजोरि ङिसामि क्राङ्युरला, ए पारजोरि थङिउ ।’ म्रिङचे गादे गुलेइनो फाचे म्रिङला ताम आङ्येन । फा होजु पारारि डाम्बाला लङटुरि फ्योङजिम ह्येला जाङ छ्योरि दोनाले यार्चि । जोरि दोजिम ह्येला जाङरि या जङके छेपाक्योरनो थेला काङप्लाजि । थे क्रसु दुङरि तइचि । तइपचेम थेला क्रनो थिजिम । क्रास्या डोङजि । थे हुजुरिनो सिजि । रेम्बो राप जोचे ताइजिम सिपचेम म्रिङ हुजुरिनो ‘ङि ङि कोला खाले छर्नालापा, रेगो ए दरेनो सिपा अम्याङ’ पङजिम बोडेन्जिम क्राजि । गादे बोडेन्जिम क्रलाइनो सिबाला म्हि सिबुत्छि ।
ह्रिरि पाराचे ताइजिम ह्रेम्बो सिजि पाङसि नम्साला म्हिमाचेइनो थेचि । ह्राङला खिम्साला सेम ज्याबा म्हि चुले सिजि पङपा थेजिम खिम्साला ल्हानादा तिख्याप मुन्दुङ तापा छोर्चि । थेनि फेङोतला खालाङनो थेमे आरेबाला मुला । दिमन्हाङला खालइनो आरेलाइनो नम्साला म्हि छिप्सि सिबाइ म्हिदा म्हानेमरमेन लपारि लामा खुजिम ह्रिरिनो सिम्साखोरनो यार्चि । ह्रिरिनो नाम्साला म्हिमा ह्रपह्रुप ताजिम हुजु तइपइ पारा दुङरिनो पाकलपोकोलले ख्राङजिम छुत्थेन्जि ।
ङेसिरि दिमरि म्रिङचे ह्राङला कोला ङिदा योप्ता स्हेङजिम चावाचलु पिन्जिन्सिम ग्लारि नाइजि । असिम सेमरि ताम क्लाङजिम तिस्सारि क्योङले न्हुजि । न्हुजिम मेलेक्ले म्हेर्बाक्योरनो म्हाङरि फा खाजि असिम पाङजि, ‘म्रिङकोला एइनो ङदिङ ब्रे । चुरि गादे दुङाल याङसि टिबा ।’ फाचे ब्रे पाङलेइनो थे सिपाला म्हि बिइ म्रिङला सेमरि मुपाला । म्रिङचे पाङचि, ‘ए सिजिन्बा म्हिदिङ ङा सोम्बो म्हि खले खाबा ?’ म्रिङला ताम थेजिम फाचे पङजि, ‘ङा सिलाइनो ङाचे आइदा म्राङटिपा मुला । च्याको कोला ङि न्हुटिबा । एनोन न्हुटिबा । एचे ङादा ङ्येसि स्योरि कान नो अपिन । खिम्साकोरला खजु म्हि खादुतलेइनो ङादिङ ताम अपाङ । नम्स्यो ङ्येसिरि नाम्सा क्ररि नागि हाउ पङपा थेपदिङ ए फिच्योर डोङो ङा फिच्योरनो राप्टिला ।’ होथे पङबुत्पचेम फसरक्क छिङजि । छिङि खादेबाइ म्हाङ म्हाङजि पाङजिम दिनगिनो सेमरि म्हेन्टिजि ।
ङ्येसिरि गेलेइनो कोलामादा योप्ता स्हेङपिन्तिोजि पङजिम मेफुत्टिबाक्योर नम्सा क्ररि ‘हाउ… हाउ…’ नागि क्राजि । नागि क्रापा थेपचेम तिला रङचे म्हाङरि म्रङपि ताम व्हाल खाजि । ‘ङाला फा देमेनलेनो दुर्साचे रेजिम युजि वा ता हिन्जि ?’ सेमरि मेन्जिम कोलाम्हादा पङजि, ‘ए कोलामा ! फिच्योर खाला मुजि च्यानिउ ।’ आमाचे फिच्योर ङिउ पाङजिम कुल्पचेम कोला ङिनो रेजिम फिच्यार च्याङिजि । फिच्योरमि लोङपाला म्हि रप्टिपरिम । हुजु म्हिला ल्हिनो म्लाङम्लाङपा ग्रोसोल डनडुनले टिम । मि मे लुम्बाला रङपाटिम । होथेपा लोङपाला म्हि म्रङपचेम कोलामा दिमन्हाङ छ्योङखजि । होले छ्योङपाक्योर कोला ङिनो म्रापरि काङ गाजिम गुर्जि । गुर्जिम कोला ङिला ङ्हो ब्याजि । कोला ङिनो हुजुरि बुटाङजिम सिजि । कोलामा सिप म्रङपचेम आमा लोङजिम क्रिङजि ।
क्रिङपचे खिम्साकोरला खिम्चेमा रेजि । गोदोपनो रेजिम क्रिङबाथेबि दिमक्योर खजि । खिम्चेमाचेनो हुजु लोङबाला म्हाङ म्रङजि । म्हि ह्याक्को ह्रुप तबाचेम हुजु लोङपला म्हि गोलेले यार्चि । खिम्साखोर्चे होजु माङ ह्रिरि सिबाला ह्रेम्बोटिम बि स्येजि । होजु माङ राप्जिम ग्यामरि ब्रटिलेइनो थेला ब्ला टा–टाबि लाङि होतरिनो सरि अम्राङटिबाला ।
सिबाला म्हिनो रेजिम ब्रापा म्रङपचेम चु ता हिन्जि पङजिम नाम्साला म्हिमाचे लम्बुदिङ यार्चिम मुदु च्यापुङजि । ‘चु ज्यानले म्हानेमरमेन असेङना होजु सिपाला म्हि देवाच्यान उचेनो दोजिम युपाला टिम । ज्यानाले थुन्दा पिन्जिम म्हानेमारमेन असेङबासे चोरङ सिबाला म्हिनो रेजिम युबा मुला । थेचे ङ्याङदा अज्यबा आला । थेला चुरि सेमछ्यालेइनो चुराङ दोजिम युबा मुला । सिबाला म्हि रेलाइनो थेला मि थोबा खम्बा । मि थोबादिङ थेचे ङ्याङदा अम्राङ असिम होतेपा अज्यबा दुङाल अपिन ।’ मुदु च्याजिम लम्बुचे पाङजि ।
लम्बुला ताम थेपाचेम मोक्कोनचे सुङगिले पङचि, ‘होथेपा दुर्साचे रेबाला माङला मि अथोजि पाङसाम हुजु म्हाङचे खाल्दाबिबिनो लोङना लाबा । कोलामा लोङजिमनो सिबा । होचु लोङबाला म्हाङ बोमो खाजि पाङसाम खलाइतेनो पित्से आरे । खलेलामा तमु हुजु माङला मि थोपिनो ।’
नाम्साला म्हिमाचे माङला मि थोपिनो पङपचेम बोम्बो दिङ लम्बु छिप्जिम नाम्सा क्ररि टिङिजि । म्हुना गुङसरिक्योर म्हाङ दुर्साचे रेजि । दुर्साचे रेजिम नाम्सारि ङिबा लाम्डाचे (ग्याम) नम्सारि युजि । बोम्बो दिङ लम्बु नम्सा क्ररि ग्याम कापेरिनो टिटिपाला । बोम्बोदिङ लम्बुनो ग्लागिरि म्राङपचेम माङनो तिख्याप लोङचि । थे ङोनरि युपइनो अखाम । ग्यपरि युपइनो आखाम । बोम्बो तिङ लम्बुचे ङोन्नो डोमसिङ यल्ङा क्युत्जिम बापाला मुपा । बोम्बोचे माङता पाङचि, ‘ए म्राङजिम म्हिमा लोङजि । एला कोलाङिनो ए म्राङजिम लोङबाचे म्रापरि गुर्चिम सिजि । नम्साबा खिम्साकोरनो लोङबाला मुबा । एला मि अथोजि पाङसाम ए रेलानो नम्सारि युला । ए सिबुत्जि । ए चुले नम्सारि युबादिङ नम्साला छङमान म्हिनो फिच्योर डोङपरि, गेरि, ताङरि थारेङ ङिपरिनो लोङटिबा मुला । एला मि थोतोजि ।’ बोम्बो तिङ लम्बुला ताम थेपाचेम माङला समे क्राजि । थेचे पाङजि, ‘नाम्सारि ङाला दिम म्रङकादे ङा नाम्सा पित्जिम यारआखम ता लाबासेम ।’
‘ङा एला मि थोपिन्बा । एला मि थोपादिङ एचे नम्सानो अम्राङ आसेम ए नम्सारि आयुबासे नम्साला म्हिनो अलोङ ।’, लम्बुचे पाङजि ।
लम्बु दिङ बोम्बोचे माङला मि थोबारि डोमसिङ यल्ङा गि क्युज्जिम ङाजिम सरि थेन्जि । डोमसिङ नामगि थेन्जिम ङोत्चि, ‘दारे एचे म्हिदा म्राङपा कि अम्राङ ?’
‘जेन्लेनो म्राङटिबा मुबा ।’, माङचे पाङजि ।
लम्बुचे डोमसिङ नाम ङि थेन्जि ।
‘देरे खतेपा म्राङजि ?’, माङदा दोसिनने ङोत्जि ।
‘देरेम चेक रदकरिदिकले म्रङजि । ङाला मिरिनो मुक्पाचे थोबा ह्राङ ताटिपा मुला ।’ लम्बुचे डोमसिङ दोरसोम थेन्जिम ङोत्जि, ‘देरे खतेपा म्राङजि ?’
‘देरेमि तइनो अम्राङ । ङाला मिरिनो मुन्दुङ तजि ।’
डोमसिङ यल्ङा सोम थेला ङोनरि ग्याम गुङरि थेन्बादिङ माङचे तइनो अम्राङपारिम पाङजिम बोम्बोदिङ लम्बुचेइनो गोजि । डोमसिङ यल्ङा सोमचे थोपतिङ माङला मिनो थोपरिम पङपाला राप थायाङजि । डोमसिङ दोर सोम ग्याम गुङरि थेन्जिम युङपा गिचे नाङथेन्जिम लम्बुदिङ बोम्बो नाम्सारि युजि । नम्सारि नम्साबादा पाङजि, ‘एनेमा खालइनो लोङआदो । ङाचे माङला मि थोपिन्पाला मुला । दारे माङ नम्सारि युबा अखाम । दारेङेन्से खना ङिलाइनो नम्सारि वाङपा ङोन लाम्डरि डोमसिङ दोर सोमचे ङ्याङला ल्हिरि फ्याजिम ग्याम गुङरि युङपा गिचे नाङथेन्गे । होत्राङ लाबासे माङ ङ्याङला ल्हिरि बबाला मुलाइनो नम्सारि वाङबा अखाम ।’ लम्बुला ताम थेजिम नाम्साबानो देरे माङचे दुङाल अपिन पाङजिम ताङजि । होजु दुइङेन्से नम्सारि खालादाइनो माङचे लोङना अला ।
तिङि नाम्स्यो ङ्याङचे माङदा अम्राङ । माङचे ङ्याङदा अम्राङलाइनो माङचे ङ्याङदा खाइम खाइमा फिच्योर ङिपा दुइरि ग्यामरि खादु तापदिङ चुङबा, दुङाल पिन्बा मुला । माङचे ङ्याङदा लोङना लाबा । म्हिमाचे होथेक्योर ङ्यान्सेनो माङला मि थोपरि ग्यामरि डोमसिङ दोर सोम क्युत्जिम युङपाचे नाङथेन्जिम खाबा हिन्बा । ङ्याङला स्यान्दो ह्युलरि ङिजिम दोखबा दिङ ग्यामकापेरि माङचे अम्राङखाइ पाङजिम डोमसिङ, केसिङ दोर सोम क्युज्तिम युङपचे नाङथेन्बा मुला । होले थेन्बादिङ माङचे स्युर्चिम खाबाला मुलाइनो होजु ग्ला वात्जिम नम्सारि खाबा अखाम पाङजिम ङ्याङला म्हेमेमाचे सुङबा मुला ।
