दिङसे बोगाल ब्लि वाइबा म्हामो ङ्यासे तामाहिन्दे रेदाङसेन कोला दोबा ग्यालाम च्यासि चिबा लामुला । म्हामोला कालाकोला आकेबा आहिन गोरडु केमुबा । तासाइ बेनान हाइमा छावा न्होङसि न्होइदासे, हाइमा ख्लि छिर्बा तासि सिजि बिसाम सिसि लेङबा गोर्कि जे मुबा थेनोन ताइ ताइ मुबा । ताइ बिसाइ ताइ आहिन चान्बा बिसाइ चान्बा आहिन्बा मुबा पेम्बा । पेम्बादा नाम्साबाकादेसे ओ ताइ बिसि ङ्योइबा लामुबा । पेम्बाला आपासे जाम्बुलिङ ख्लासि च्युइ दिङ ताजिन्मुबा । होरिला साङा माकाइसे या सुङ थुइबारि आछ्यो आछ्यो ताबासे पेम्बा रेदाङसेन नाम्साबा म्हिला गेरि निसि ज्याला लासि बाबा लामुबा । बोगाल ब्लि दिङला म्हामो आमासे हाम आहाम लासि कान स्होसि हाइमादामान ङ्यासे तामाहेन्दे कोला हाबा ग्यलामरि मि तिसि चिमुबा ।
खिम्जेरि ज्यार्दि मुसाइ हाइमा गि लाःसि लाःसि नाम्साबा डिक्सि म्हे थासि चामुबा । पेम्बा जाकि ताइ ताइ ताबासे बेनासे ह्वाम्सि ह्वाम्सि म्हे थाबारि कुल्मुबा । बेनासेन सुर्याप लाबाहिन्दे पेम्बासे खोररेप ताना ताम्मुबा । बोमो हामा केमा ज्यार्दिकादेसे गाइखाने भोटे बिसि केसाइ ह्युलरि म्हे थाबा कानुन आरेबा । तामाङकादेला रिमठिम म्हे स्या आरेना आताबा मुबा ङ्हाच्छा । ब्रेल्साङला दुइरि म्हा छारला दिमग्यामसे चाङ (माइति) छारलारि सगुनला छ्याम म्हेला बाम बोर्बा ठिम मुबारो । लिच्छा म्हे थाआम्याङबासे मुइला बोर्बा चलन लाबा सुङ्ताम मुला । चुह्राङ लासिन लाःसि लाःसि तिरे कुनु छोबा छोबा म्हे ग्लाबा थाबा कठुइ लाजि नाम्साबासे । चु ताम क्याच्चा दिमला जार्दि रामप्रसादला न्हाब्याङरि फ्याट्ट थेजि । दारेचा चु तामाङकादेला गोला दुलु ताइना लादोजि पाङसिगेन पुलिस चउकिरि निजि थे । चुर्से तामाङकादे म्हे थाबारि चुजि । रामप्रसाद पुलिस बोर्सि दोजि । चान्बाकादे बेनान यार्जि, ओन्छ्यान पेम्बा थेन बुदे पुलिससे चुङसि बोर्जि ।
दुइ चिप्सि निजि क्यार्से आमा कोला हाबा ग्यालाम च्यासि चिमुला । ओर्से कोला चा पुलिस चउकिरि बोर्सि म्हे तोदे तोजिमुला । कोला हाबा ग्यालामा ख्रुङना–ख्रुङना कुदाप ङामरिन आमा छेङनिजि । चउकिरि चा ल्होलाल्होलो लिला पुलिसकादे हासि छेक्पा ग्याङबा ख्लाबा आरे । न्हाङगारदाङसे ह्याल ताजि । रेडियोरि स्ह्यो स्ह्यो बेनारिन ‘गाई कोटेको अभियोगमा २ जना पक्राउ’ बिसि साङग्युर हाजि । चु ताम म्हामो आमाला न्हाबेङरि टाजि । चु साङग्युर थेबाइछ्याम आमा कु छेक्सि छेक्सि क्राबा चुजि । ‘ङाला कोलासे तिका गल्ति लाबा मुला रो चउकि बोर्बा, ङादा हाल्से न्हाला दारे, तिल्मा ङ्हाउहिन्से चासिगेन हाबा म्हेला स्या ङान्से चाआम्याङ ?’ म्हामो आमा क्राक्रा.. ङ्होरङ्होर लाजि । म्हामो आमाला थे अवस्था म्राङसि तामाङ नाम्साबा बेनानला मिरि मिख्लि हाजि । ज्यार्दि तजि खुचिङ पाङसि ङेसि चिज ।
देन्छिन, सिसि लेङबा कोला गि पेम्बा खुइ आमाला हादुइ तिनि जेलला सिम्बा चासि चिजिबा मुला । ल्होलोल्होलो तामाङ घेन्दुनकादे पाङपिनो पेम्बासे म्हे थाबा ताबा आताबा ? पेम्बासे म्हे थाम्याङला कि आम्याङ ? आम्याङसाम तिक्दा एन्सेन हाथागो आबिबा ? थाम्याङसाम तिनि तोङजा तोङजा पेम्बाकादे जेलरि सिम्बा नासि चिबान मुला । हिन्ना घेन्दुनकादेसे सुङ ओर्देन तोला पेम्बाकादेसे म्हे थाम्याङला कि आम्याङ ? चिबान मुला तिनि जेलरि मुबा ह्राङला मेम्बा कोलाकादे हाबा ग्याम ख्रुङसि म्हामो आमाकादे ।