डाइबारला मि

‘ओइ स्याममाया । योना खाउ ।’ लोकेन्द्र न्यौपानेला धोद्रो काइ थेजि । न्होङबा टेप रेकर्डर ह्राङबा । ‘चु बामान सातान चुह्राङ लासि तिल्दा छेर्बा हँ ?’

ङाइ सेमसेमरिन म्हान्जि । जाजाकि झ्याल ठ्वाङजि । मार ख्राङगारि लोकेन्द्र रापचिबा मुबा । थेला गुच्युलरि छ्योइ ख्यापचिबा मुबा ।

फिक्का मु रङला सर्ट । नुप्बा मु रङला पेन्ट । काङरि मु रङला पायल चप्पल । थोबोला गुङबोरि च्योचिबा क्राफुइ । थेला ह्रेङबा लिरि मुतेबा बिमा आजेबा थे नार्तु मुबा । पोरोल ह्राङबा ।

ङाला मि डेङला घडिरि च्योनिजि । तुन्बा सुइ कु थेन ह्रेङबा सुइ सोमछा नम्बररि च्योचिमुबा ।

‘हत्तेरि ! तिनि नोन स्कुल गाइमा दोसेला ताजि ।’ ङा ह्राङतेन केचिजि ।

‘ए निबाकेन लाउ ।’ ङाइ ग्रेन काइरि लोकेन्द्रदा बिजि ।

झ्याल डुङजि । ङादा लोकेन्द्रतेन ब्राबा सेम आरेमुबा । थे खाम्दे ङाला सा स्याप्केह्राङ लाला । ल्हेप ताबारिन म्हाइला । क्यानाक्योर ! ह्रेम्कोलामि हिन्ना । दारि च्योथान्बा ऐना च्याजि । लिला पाबा मिछाम च्यासि दिक्क मानतिजि । जतिन रेम स्योमसाइ भुक्का रेजिबा क्रा स्योमजि । नाप्ले नाला नत्थि तिर्याम ख्वाइस्याङजि । कुर्था स्युजि । न्हाङला टिसर्ट स्युजि ।

ऐनारि सार्बाकेन लाबा यौबन प्रतिबिम्बित ताजि । याखारगि आनाउठो तरङग ब्याप्त ताजि । सेमनाङ । खाराङबा खाराङबा । पेबा खाबा ह्राङबा । अप्ठेरो ह्राङबा । ह्राङला ल्हुइरि प्राकृतिक लिरि थोन्बा स्हु ज्याबा छोर्जि । तासाइ ओइमाला घटनासे सेम भरङग तासि खाजि ।

थे यो बुल्कु मुबा । दिनि खासुला पर्दा क्वान्छि चिबा ह्राङबा । आमासे ङादा दोकान निउ सुङजि । ब्रामा ग्लुबारि । जुङगे साहुलारि । थे साहुजिला सुङरे रुङबा मुबा । म्लाङ, ह्रेङबा । न्हाब्याङदोना दोबा । मिए ओस्बन निख्खर म्लाङ । या काङ बिसाम तार । बोक्रा स्युबा किम्बुला दोङह्राङबा । मोक्कोनरि ङादा जुङगे साहुजि किम्बुला दोङरि याङबा बुस्याडि बुलुङ ह्राङ छोर्मुबा । थेदा म्राङमा ङाला गो सिरिङग तामुबा ।

‘थे क्यानाक्योर जुङगे साहुजिसे ङाला ग्राम्बारि माङरे स्हुइपिन्जि ।’ ओइमा प्रसन्नासे बिबा मुबा । ङादाइ नोन ओस्बान लापिन्ना कि ? ङादाइ सकस ङ्हाम्जि । तासाइ स्यान्दो ग्लारि ब्रामा आयाङमुबा ।

‘साहुजि ब्रामा मुला ?’ ङाइ दोकानला म्रापरिन राप्सि ङ्योइजि । याखारगि जेक्खे खापा ठ्वाङबा मुबा । दिनि आफेबासे हिन्मुजि कि म्राप पुरा ठ्वाङबारि आताबासे हिन्ना न्हाङरि दोप मुबा ।

‘मुला न्हाङरि खाउ’, जुङगे साहुजिला मि मधुरोरि टलक्क टल्कप ताजि ।

‘चुह्राङबा दोप्पा मुला । ग्लुब म्रसाइ नोन तासेला !’ बोमो खाबान ङा न्हाङरि वाङजि ।

‘कादे वटा बोर्सेला ?’ जुङगे साहुजिसे ङ्योइजि ।

‘सिका च्युइला’, ङाइ यारि मुबा नोट पिन्बान पाङजि । थेसे नोट चुङजि । नोटतेन छ्याम ङाला या चुङजि । यातेन छ्याम ङाला चिचिलो कु चुङजि । ङाला सा बन्द तालाह्राङ ताजि । ङाइ ल्हुइ फाककोङना लाजि । ओम मुतेबा बाङ तेसि स्योर्बा कोसिस लाजि । काइ बिसाम खारेरिन गाजि ।

‘साहुजि’ दोकानला म्रापरि खालाइ राप्बा मुबा । जुङगे साहुजिसे ङादा फुत्तान ख्लापिन्जि । गोरच्युइ ब्रामा जोरपिन्जि ।

कागजरि । ङा बेपत्ता छ्योङजि । दिक्गि आज्याना लासि कु स्हुखाजि । थेबिमा आज्याना लासि ङाला सेम स्हुखाजि ।

थे कुनुहेन्से कु स्हुआखाबा उपाय म्हाइजि । थेला लागि यासेन समिज डुप्जि । फित्ता मुबा । अम्बुल ङ्हि प्लेक । टाइट ।

समिजसे ङाला रेबा कुदा नाङजि । दाह्राङ म्राङजि । प्लेक्तेङ । ह्रेङबा सा बुन्जि । दारे खालाइसे ङाला कुफिरि म्युङ दृस्टि ताइना लासेला आरे । ङा ढुक्क ताजि । सर्ट क्वान्जि । फ्रक क्वान्जि । टेबलला छ्योइ गुज्युलरि ख्याप्जि । बार्दलिरि च्योबा चामग्याम फाप्जि । पिङ पायल चप्पल काङरि ख्युजि ।

‘भोटिनि ! गाइजिन्जि’, लोकेन्द्र क्रिङजि ।

‘मास्साले बामान ! आझाइ ब्रान्चिजिम’, बोमो खाबा पालो ङाला मुबा । ङा खुइखुइ ब्राजि । मेनरोड थोन्बा मोड । डहुला ग्रेन दोङ । दोङदिरि जाजाबा आले खतिवडा, दिनेस मिस्र, रम्भा गुरुङ, निराजन थापा स्याप्जि । रातोमाटेग्याम प्राथमिकतह जिन्बा ङानि डु मुबा ।

थेलिच्छा बजारला रास्ट्रिय माबिरि भर्ना ताबा मुबा । दिमहेन्से थे स्कुलदोनाला दुरि ब्रासि घन्टागि । गाडिरि पन्ध्र मिनेट ।

चुरेला साधरि मुबा बगर । बगर थुर्सि तिबा जाबा भुगोल । थे भुगोलरि मकाइला ढोट सार्मा ताइबा साप्रा वाला ।
बर्खाला गिक्छा स्ट्रोकरि मुरिक्यार रेबा धुलोला कन वाला । चैतला दिनिरि फ्रेबा साप्राला डल्लो वाला । दिम ङामला कुलेसोरि ब्योङबा भल वाला । थेतासि थे ग्लाला मिन रातोमाटे मुबा ।

उतररि बजार । न्हुपरि बिरगन्ज ताबान छ्योङमुबा । मनरोड । थेग्याम मिनेट च्युइ राइ ब्रामाहेन्से स्याप्मुबा रातोमाटे । मेनरोडरि कि सोझोन याम्बु निबा एक्सप्रेस स्याप्मुबा कि बगररिक्यारला युङबा होबा ट्रक । ङानि ट्रकरि लिफ्ट ह्रिमुबा । ट्रक आस्याप्मा लेफ्ट–राइट लामुला ।

थे कुनु ङानि सडक गुरि राप्जि । ल्हानान दुइदोना ट्रक आकुल्नि । बरु ङानि ब्राजि । एघार नम्बररि । बैसाखला दिनि । उखरमाउलो ताबान निजि । कालोपत्रे सडक लेप्जि । हप्प तासि खाजि । मौसम रापिलो स्होबारि सडक कानाकुनिला सागुघारिसे काप्सि ह्रो लाचिमुबा ।

‘एसे अंग्रेजिला होमवर्क लाजि ?’ दिनेससे ङ्योइजि लोकेन्द्रदा ।

‘आरे’, लोकेन्द्रसे धोद्रो काइरि जवाफ दोजि । थे छुच्चो मुबा । होमवर्क छुम्मुबा ।

‘स्याममायादा हिन्साम पिन्सेला । ङान्दाम तिल्दा पिन्से’, रम्भासे बोमो ल्हुजि । पाङसि । ङाइए बोमो ल्हुजि । मि तारतिसि । ङानि रमन ज्योज्योला बगैचारि दोजि । आम्बाला दोङदिरि राप्जि । निराजनसे खानाङग्याम काडि स्याप्जिम खाइ ? दोङरि झटारो छेप्जि । आम्बा चिचिलो मुबा । गोरङ्हा डु ताइजि । बुरुरु ।

‘क्यानाक्योरकादेदा चिचिलो म्राङलान आदेबा । छार्बारिन आपिन्बा । यारि च्योलोङ तागाइ’ ङाइ केजि । ब्योनजुगु ङेजि । गललल ।

छिस्सऽऽऽ ।

ओते दुइरिन याखारगि पिङ रङला ट्रक ङान्ना ङामरिन खासि रोकतिजि । ट्रकला झ्यालग्याम डाइबारसे थोबो तेजि । पिङ बा चाल्ला ह्राङबा म्युङ क्राला रेसा । निख्खर म्लाङ लि । चिम्सा मिजुगु । मिन्बा खयर ह्राङबा सुङफि । कुस्तिरि नाङबा ह्राङबा एकदम प्लेक ना । बोबा ङ्हो ।

‘निसेला हिन्ना ?’ थेसे तुन्बारि ङ्योइजि । थेला मि वाला म्राङजि । बारालसे क्रोबा ह्राङबा । जाजाकार बोबा ह्राङबा । ङादा लि म्राङसिन लोङबा खाजि । सातानमि ङान्छेन रोकतिमुबा ट्रक । खाजिबाइ रोकतिमुबा । खाजिबाइसे स्पिड बढप लामुबा । थेह्राङ लासि ह्राङनोन ट्रक रोकतिसि ङ्योइबा गिक्छा रेम मुबा । चु ङान्ना लागि अनाउठो मुबा ।

‘निसेला हिन्ना नि आकु ।’

जाजा आले उत्तेजित तासिन ख्लाजि । ट्रकला देब्रेरिक्यार म्राप ठ्वाङजि । खलासि केटो फुत्त फाप्जि । खिरोलो ज्यानला । नाकाला के ह्राङबा लि । रुङबा मिछाम । ग्रेनखेप्पा मिन । मुह्राङबा सुङफि । ह्रेङबा खारे । बामदोना ताइबा क्रा । थेला ल्हुइरि कलेजि रङला स्यान्डो थेन खिदिख्याबा जिन्स मुबा । ङानि ट्रकरि क्रेजि । ङ्हाच्छाला सिटरि लोकेन्द्र थेन निराजनसे गाप्जि । डाइबारला ठिक लिच्छाला सिट ङाइ गाप्जि । रम्भा थेन जाजा आले ङाला कुरि । ट्रक गोलेसे कुल्जि ।

‘स्कुलग्याम दोगामा स्योङरि क्याल्तोला’, ङ्हाच्छाला सिटरि चिसि निराजन लोकेन्द्रदा थिबाकेन मुबा । जाजा आले सेम लासि ङ्यान्चिमुबा । रम्भा कुटिसि चिमुबा । ङा सिसारि च्योबा छिरबिरे झलर च्याचिबा मुबा ।

झलर फिरि ऐना टासतिबा मुबा । ऐनारि डाइबारला मि ख्याप्बा मुबा । तिङ भरङग ताजि । खाराङबा चालाह्राङबान लासि च्याबा ! ङाइ ह्रोजुगुदा च्याजि ।

मुतेबान ह्राङलान तालरि मुबा । मिन दोसि ऐनारि दोजि । चुरेम डाइबार निस्चिन्त तासि ट्रक हाकतिचिबा म्राङजि । सेम जाकि सान्त ताजि । तिलाइ दुइलिच्छा ङाला मि दोसि ऐनारि क्यानिजि । डाइबारला मि ङाला चिचिला कुरि क्याबा मुबा । जुङगे साहुजिला ह्राङबान नियत थोबा मि । छि ङादा ह्रेमकोलातेन नाइबा खाजि । ङाला सा ल्हेजि । दिगमिग ङ्हाम्जि । ग्रुङ च्यार्सि खाजि ।

रुइबा खालाह्राङ । उफ ! खाह्राङ लासि माङग्यारला तापक्रमसे थर्मोमिटरला पारो ल्हेबा मुबा ठिक ओस्बान लासि ल्हेबा मुबा, ङाला ल्हुइला तामक्रम ।

‘स्याममाया फाप्गो’ लोकेन्द्रला काइसे ङा चोन निजि । ट्रक स्कुलला मोडरिन रोकतिबा मुबा । ङा ट्रकग्याम्से फाल छेप्जि ।

‘थुजेछे आकु’, चोदे बिसि जाजा आलेसे औपचारिकता छ्योना लाजि । लोकेन्द्रसे थोबो कुर्जि । कृतग्य तासि । निराजन ङेजि ।

मुसुक्क । रम्भासे या ह्योङजि । बाइ बिसि । ङादा बिसाम थो ब्याङबा सेम मुबा । डाइबारला लिरि ।
‘हे कोन्ज्योसोम दारे चु ट्रकरि खाइमाइ क्रेआतोगाइ’ ङाइ फुल्जि । सेमसेमरि ।

न्हाङगारदाङसे ङान्छे खाजिबाइ ट्रक आस्याप्जि । रेनिदाङसे नोन ङानि ब्राबाकेन मुबा ।

छिस्सऽऽऽ ।

ओइमालान ट्रक रोकतिबा मुबा । ङान्ना ङामरि । ट्रकरि युङबाला दोइ मुबा । ओइमाला ह्राङनोन डाइबारसे झ्यालग्याम थोबो तेजि । जाजा आले उत्साहित तासिन ख्लाजि । ट्रकग्याम खलासि केटो फाप्जि । निराजन, जाजा आले थेन लोकेन्द्र ट्रकरि क्रेजि । ङाइ रम्भाला या चुङजि । च्याप्पा ।

‘ए थेन ङा ब्रासिन नि’ ङाइ रम्भाला न्हाब्याङरि पाङजि । थे अलमलरि परितिजि ।

‘हे योना क्रेगो ले । भोटिनि’ लोकेन्द्रसे झ्यालग्याम थोबो तेसि क्रिङजि ।

‘एनिकादे निउ । ङानि आनि’ ङाइ छेर्बा काइरि बिजि ।

‘तिल्दा ?’ जाजा आलेसे लोकेन्द्रफिरि छ्यापबासि ङ्योइजि ।

‘ओस्सोन’ ङाइ अड्डि किन्जि ।

‘ल थेह्राङ हिन्साम ङानि नोइ आनि’ लोकेन्द्रसे धोद्रो काइरि लिच्छारि निर्नय लाजि । थेतेन निराजन थेन जाजा आले नोन फाप्जि । बोबोसे दार्बान । खलासि केटोसे ङादा च्याजि । अनाउठोतेन । थेलिच्छा ट्रकरि क्रेजि । डाइबारला लि खाह्राङबा म्राङजि ? ङाइ आम्राङनि । थेसे एक्सिलेटर नाङजि । ट्रक तिर्याम ग्यापरिक्यार छ्योङजि । दोसेला रेम रफ्ताररि छ्योङजि ।

‘आहिन ताबाजा तिला हिन्ना ?’ लोकेन्द्रसे ङ्योइजि ।

‘ङादा थे डाइबारला मि म्राङसि लोङबा खाजि’ ङाइ बुगिरिन पाङजि । रम्भाला मि अझा ग्रेन तासि निजि । लोकेन्द्र, निराजन थेन जाजा आलेसे थोबो रिजि ।

थेलिच्छाला रेजुगुरि नोन थे ट्रक स्याप्मुबा । ङान्ना ङामरि दोगामा गोलेसे कुल्मुबा । नजर गि च्यापुइगामुबा । ओम ब्रामुबा ।

मंसिरला ला । हुस्सु थपक्क तिबा मुबा । पिच सडकरि ।

‘रम्भा खाइ ? गाइजिन्जि’ ङाइ ङ्योइजि । लोकेन्द्र, निराजन क्योलोलो साइकल बासि दोगाबा मुबा ।

‘जाजा आले नोन दोगाबाला आरेम’ निराजनसे ख्यारख्युर च्यासि पाङजि ।

‘ङाला साइकिल सजिलो मुला । चलप लासि च्यागोम’ लोकेन्द्र ङादा बोमो खाना लाबा मुडरि मुबा ।

‘चुला ब्रेक स्होतोबा मुला । आहिन्साम चु झन सजिलो मुला । एलाह्राङबा खेप्पा साइकिल आहिन चु’ ङाइ जवाफ दोसिन ख्लाजि । ङादा थाहा मुबा, लोकेन्द्र ह्राङला आपाला साइकल बामुला । निराजनला बिसाम छार साइकिल मुबा । ङातेन लेडिज साइकिल मुबा । आपासे ग्लुपिन्बा । सेकेन्ड ह्यान्ड । पिङ रङला । ङ्हाच्छारि जाजाबा क्यारिज ।। जालिवाला ।

क्योलोलो साइकिल चलप लाबारि चुबा मुबा । साइकिलफिला नियन्त्रन जाकि गाह्रो मुबा । सातान स्यान्दोला भर परप तातोमुबा, स्कुल निमा । डुइसि बिसाइ साइकिलरि स्कुल नितोला । चु निधो लाबारि ङान्दा ला ङिस ल्हागतिमुबा ।

रम्भा थेन जाजा आले दोगाजि । थेन्देन बिसाम साइकिल आरेमुबा । लोकेन्द्रला ग्याप्से रम्भा चिजि । निराजनला ग्याप्से जाजा आले । ङाइ डबल लोड थोबा आलामुबा । जति मसिनो ङाला पाखुरा मुबा, थेबिमा मसिनोन ङाला आत्मबिस्वास मुबा ।

थे यो दिनिसे मु आवाइनि । म्हुनगिला सितसे सडक प्लाबा मुबा । ङान्छे साइकिल कुल्जि । ङ्हाच्छा निराजनला साइकिल । थेलिच्छा लोकेन्द्रला । ओम ङाला ।

‘लौ रेस लाइ’ निराजन जाकि सन्कि मुबा । थेसे लोकेन्द्रदा बिजि ।

‘आला । एलागा छार साइकिल’ लोकेन्द्र छुच्चो पाङसिन ख्लाजि ।

‘लुते बामान ! लोङजि’ निराजन प्रतिरोधरि थोन्जि ।

‘काजि लाबु ! लौ ताला । डबल लोड म्हाले दोसि । रेडि’ लोकेन्द्र नोन सन्कप ताजि । क्राफुइ ह्योङना लासि । रम्भासे लोकेन्द्रला सुइटर चुङजि । कोङना लासि ।

‘वान, टु, थ्रि, गो ।’ जाजा आलेला ग्रेन काइ थेजि । ङ्हिसेन पाइडल तिक्खुरि स्याङजि । पाङग्रासे चक्कर ताजि । बाङ बाङसे ।

ङ्हाच्छा हुस्सु छप्प मुबा । थेनिकादे तिक्खुरिन सुप म्हाजि । ङाइ आम्राङनि । ङाइ खाह्राङ लासि ताला थेन्दा स्यापनोन तोला । मस्तिस्कग्याम चु ताम ल्हुइनाङ तिब्र रुपरि संचार ताजि । थेबिमा तिब्र गति साइकिलसे किन्जि । थेसे लामा साइकिलफिला ङाला नियन्त्रन म्हाजि । ङा असन्तुलित ताजि । छिनगिदा म्हान्जि ङा लाबारि कावा चाचिमुला ।

धडम्म !

रुङबा मिछाम । ग्रेन मिन । पिङ सुमिङ । ह्रेङबा खारे । नाकाला के ह्राङबा लि । मि ठ्वाङमा ङाइ म्राङजि…. थे खलासि केटोला थोबो । रेबा बाङ लाजि । आखाम्नि । या, कु थेन पुइमुरि स्हुला मात्रा ल्हाना मुबा ।

‘माइ या क्युइबा ह्राङमुला । थाल्हेउ’ चु काइ ङाइ ङ्हाच्छा खानाङए थेबाह्राङ छोर्जि । खारे दोजि । उफ ! थेनोन ट्रक डाइबार मुबा । ओहो ! ङा ट्रकला सिटरि पिक्तोङ मुबा । ङाम स्कुल निबाकेन मुबा । ओहो ! डान्बा खाजि ।

साइकिलला रेस । फिलिलि । लोङसि ख्लाबा ह्यान्डिल । साइड ड्रेनरि वाङबा साइकिल । ओम मिरि खाप्बा दोप ।

‘ङानि मेडिकल दोगेन लाजि । तिनि चुरिक्यारलान दोइ मुबा । ए बेहोस स्याप्जि । सडकला ड्रनरि । एला ह्रोजुजु आम्बाला दोङरिक्यार स्याप्जि । थेनिकादे खाबाकेन मुला’ खलासि केटोसे पाङजि । राइदोसि रेबारि म्हाइजि । स्हु झान ल्हेजि । डाइबारला मितेन ङाला घृना यथावत मुबा ।

‘याखारगि जामे मुबा । ङाला । कमजोर मुबा । डोबारि । ल्हुइरि । नासि चिमुबा । दिङ ब्लि ङ्हाच्छा कलैयारि ग्रेन हाट ल्हागतिबा मुबा । म्हान्जि, आमा जामेदा कोरपिन्ना । ल्हानान ताबा मुबा छ्याम आकोर्बा । खालासि आलेदा बिदा पिन्जि । ट्रक ह्राङसेन चलप लाजि ।

थे ल्हामसे जामे ल्हानान ताजा म्राङबा मुबा । तासाइ नियतिदा स्यान्दोन ताम स्विकार मुबा । कलैया आदोचिमान ट्रक ब्लिङजि । लास तेबासे पाङबा, आमासे कुरि जामे ग्योइबा मुबा । ङादा खालाइसे अस्पताल दोना लाजिम । ङा तिल्दा आसिनि ? दाते नोइ जामेला याद कोल्टो ताला तिङरि । सोबा हिन्साम दाते ए तेत्थेबान तासेला । ए ह्राङबान म्राङमुबा । चिम्सा मि । नार्तुरि नथि । रुङबा क्रा । म्लाज्ञ म्लाङ मुबा थे ।

डाइबार कोहोरोगि ताम लाचिजि । ल्हिबा काइरि । थेदुइरि ङाला मि मि ह्राङबान तातोला । ओसिलो । मुतेबा ह्रेमकोला जुङगे साहुजि ह्राङबा आताबाला चिम । थे कुनु ङाइ मिला चेपग्याम ह्राङला भ्रम ब्योङबारि पिन्जि । सललल ।

दो:बा : अगाध