ङाला आउदिन डिक्पा ह्रो हिन्ना प्रबेस । ङ्हि नोन याखारगिन बोर्डिङरि डोखेन मुबा । आउदिन राउसे म्हि, सातान ङेना लाचिबा । बिद्यार्थिजुगु गुङरि आउदिन लोकप्रिय । खेलकुद, संगित थेन बिसयबस्तुरि आउदिन अब्बल । मुतेबादा आउदिन माया लाबा, थेला चुनोन राउसे स्वभावसे लामा ङा थेतेन ल्हानान ङामरि ताजि । तलब च्याङना तासाइ नोन सन्तुस्टि ल्हाना, कुलचिबान मुबा ल्हुइला रथ ।
ल्हानाह्राङबा तलब खाबाकुनु ङान्ना टोलि रमाइलो लामुबा । प्रबेस थेन ङा आफेबा ह्रो ङान्ना खर्च लाबा रेरि नोन थेनोन तिरेमि हिन्ना नि । तलब खाबा न्हाङगारदाङसे ङ्यासेदोना ङान्ना तलबमि पुलिसला काइ थेसि जुवाडेजुगु ह्यार्माह्राङ क्यार्सेजासे वाङजिन्मुबा । रेनिदाङसे दोसि सापट म्हाइसिकेन ब्राजि, ल्हुइमि चुह्राङ नोन लासि छ्योङचिमुबा ङान्ना । खाइ न्होरमि ङान्तेन लोङमुबा कि ? छ्याम चिबारि आङ्यान्बा ।
ल्हुइ न्हा हिन्ना नासगिकला खानाङ ताला ओम प्रबेसला ब्रेल्साङ ताजि । ला डु ङिस ङ्हाच्छारिक्यार ह्राङ नोन कोजि ल्हुइ । कोलेसे थेरि पोबा म्राङबा चुजि, ह्वाइ कोबारि ख्लाजि । ङादा अचम्म छोर्मुबा कादे योनान पोला म्हि ।
ङादा अचम्म छोर्जि तिरेकुनु ङ्योइजि तिला हिन्ना सर, तिनिन्हाङगारमि राउसे खानाङ सुपम्हाजि ? चाङगेन खाबातेन रमाइलो नोन ब्राजि कि तिला हिन्ना ? थेसे बिसाम बाध्यता, स्कुलला तलबसे आछ्योबा गुनासो थेन दिमथेमे न्हातोबा बाध्यताला ताम लाबाकेन मुबा । सायद स्कुल ख्लाला ताला बिबाकेन मुबा । ङाइ प्रिन्सिपलतेन ताम थान्बारि बिजि ।
न्हाङगारदाङसे ताम थान्जिम । दोप लि म्राङबातेन थाहा ताजि तलब बढप आतानि बिबा ताम । तिलाइ रे लिच्छा स्कुल खाबारि ख्लाजि । ङा गिक्खे महसुस तामुबा । बिद्यार्थिसे आन्दोलन लाजि तासाइ प्रसासनसे आथेनि ।
ला ङ्हि लिच्छा प्रबेस ङाला दिमरि खाजि । रेनुकुनु दुबइला फ्लाइट मुला ज्याना लासि चिउ होइ बिजि । ङाइ नेपालरिन चिसि सुखदुख थाबा बारे ताम थान्जि, थेसे बाध्यताला ताम थान्चिजि । ताम नोन तामला ताङरि तिल्दा मुग्याम खाइ ङाला तिङ बोदाइ ताजि । ओम तिङ थिला ह्राङ ताजि । ङा तिक्खुरि हिक्का हिक्का लासि क्राबारि दोजिम । थे खाजिबा दुइरि थोन्सि निजि थाहा नोन आतानि ।
ङाला ह्रो थे बाध्यतासे माङग्यार ह्युल निबाकेन मुबा ।