गिक्खे छोबा थेन गिक्खे ज्युइबा ह्रो ङ्हि निकोलेभस्कि स्टेसनरि ह्रुप ताजि । छोबा म्हिसे क्योलोलो जेक्खे स्टेसनरि सोल लाबा मुबा ओम थेला च्युलच्युल्बा सुङफि मिन्बा चेरि ह्राङनोन चम्कप ताचिमुबा । थेग्याम जाजाकार वाइनला थाङए नोन खाचिबा मुबा । ज्युइबा म्हि बिसाम क्योलोलो जेक्खे रेलग्याम फाप्बा मुबा ओम बाकस थेन ग्रेनग्रेन झोलाजुगुरि टनाटन सामान बाबा मुबा । थेग्याम कफिला थाङ खासिचिबा मुबा । थेतेन छ्याम ह्रेङबा कामसिङ मुबा थेला ज्युइबा म्रिङ थेन स्कुलरि डोबाकेन लाबा याखारगि नोबा कोलाए नोन मुबा ।
‘पोफिरे !’ छोबा म्हिसे ज्युइबा म्हिदा म्राङबातेन क्रिङजि ।
‘तिला ए पोफिरेन हिन्ना ? ङाला समेजो ह्रो ! कादे सेर्खा, काखे बर्खा वाइजि ह्वा ?’
‘हे कोन्ज्योसोम !’ आस्चर्यचकित ताबा ज्युइबा म्हि क्रिङजि ।
‘ङाला जातुकु दुइला ह्रो ! ए खानाङग्याम चुरि दोगाजि ?’
ह्रो ङ्हिेसेन गिसेम गिदा सोमरेम मित्रवत चुम्बन लाजि ओम मिख्लिसे प्लिङबा मिसे गिसेम गिदा च्याजि । ङ्हि नोन दङग मुबा ।
‘ङाला सेमजो ह्रो’, चुम्बनलिच्छा ज्युइबा ह्रोसे पाङजि, ‘चुमि आडान्बान स्हे ताजि ! अचम्मान ताजि ! लाउ ङादा च्यागो ! ङामि ङ्हाच्छाला ह्राङ नोन ओतेबान जेबा मुला । ओतेबान प्यारो थेन ताङबा मुला । एदा खाराङबा मुला ? मिन र न्होर छाजि कि ? ब्रेल्बा लाजि ? एसे म्राङनोन म्राङजि ताला, ङाइमि ब्रेल्बा लाजि…. चु ङाला म्रिङ लुइज हिन्ना ओम चुजा ङाला कोला नाफनेल… दाते कक्षा सोमरि डोमुला । थे ङाला जातुकु दुइला ह्रो नाफान्या हिन्ना । ङानि स्कुलरि छ्याम नोन डोमुबा ।’
नाफान्यसे तिलाइ दुइ सोच तिजि ओम ह्राङला कुलाकि स्युजि ।
‘ङानि स्कुलरि छ्याम नोन मुबा’, ज्युइबा म्हिसे पाङसिकेन निजि, ‘एसे डान्मुला, स्यान्दोसे एदा तिला बिसि ङोमुबा ? एदा मुतेबासे हिरो स्ट्रेटस बिसि ङ्योइमुबा तिल्दा बिसाम एसे तिर्याम स्कुलला छ्योइरि म्रासिचिबा चुरोट चोल्सि गाल चाल्बा मुबा । ओम, ङादा बिसाम मोक्कोनसे एफिएल्टेस बिसि ङोमुबा तिल्दा बिसाम ङादा रापजुगु पाङबारि सेम निमुबा । हा हा !… ह्याङ थे दुइरि जातुकुन मुबा । आपेको नाफान्या ! कोला, ओसो आकुला ङामरि खाउ ओम । ओसेम, चु ङाला खुयु हिन्ना…।’
नाफानेलसे तिलाइ दुइ सोचप लाजि ओम ह्राङला आपाला ग्यापरिक्यार निसि लाजि ।
‘ओम ए खाराङबा लाचिुमला ओम ङाला ह्रो ?’, ह्राङला ह्रोदा आउदिन उर्जापुर्न रुपसे च्याबान छोबो म्हिसे ङ्योइजि ।
‘सरकारि जागिररि मुला ? खाजिबा तहरि दोजि ?’
‘हिन्ना, सेमजो ह्रो ङाइ नोकरि लाचिबा मुला । लिच्छाला दिङ ङ्हि हेन्से ङा कलेजियट एसेस (रुसि साम्राज्यला सरकारि सेवाला ८ औ क्लासला पद जुन न्युनस्तरला हिन्ना) मुला । तलब ल्हानान च्याङना मुला, तासाइ थेसे ओदे फरक ताबा आरे । ङाला खुयुसे संगित लोपपिन्बा लामुला ओम ङा चुतेन छ्याम चुरोट थान्बा सिङला बाकासए नोन स्होबा गे लामुला । थेदा ङाइ गिक्खेला रुबल गिरि चुङबा लामुला । खालाइसे च्युइ बिमा ल्हाना ग्लुजि बिसाम छुटए नोन पिन्बा लामुला । चुह्राङ नोन लासि चलप ताचिमुला । ङाइ ङ्हाच्छारि कारिन्दाला रुपरि गे लामुबा ओम दाते चुरि ङ्हाच्छालान बिभागरि प्रमुख कारिन्दाला रुपरि सरुवा ताबा मुला । दारे ङा चुरिन गे लासेला मुला । ओम एलाजा तिला खाराङबा मुला ? एमि पक्कान सिभिल कौन्सिलर दोजिन्जि ताला ह्वा ? आहिन ओम ?’
‘आहिन तिङजो ह्रो ! थे बिमा ल्हानान फिरि मुला’, छोबा म्हिसे बिजि– ‘ङाम प्रिभि कौन्सिलर (रुसि साम्राज्यला सरकारि सेवाला सोमछा क्लासला उच्चस्तरिय पद) दोजिन्बा मुला…. गोरङ्हि सिताराजुगु अंकित ।’
ज्युइबा म्हिला लि तिक्खुरि दोप ताजि ओम अवाक चिजि तासाइ थेसे योनान ह्राङला लिरि मुस्कान बाजि ओम चुह्राङ ङ्हाम्मुबा कि थेला लि थेन मिग्याम ज्वाला थोनचिबा मुला…. लोङबा थे लडखडप ताबान झान्नाइ गुर्जि… थेसे थोबा बाकास थेन सामानजुगु नोन सारि ताइबारि चुजि… थेला म्रिङला ह्रेङबा कामसिङ झान नोन तन्कप ताजि, नाफनेलसे ह्राङदा ल्हानान सतर्क ताना लाजि ओम ह्राङला क्वानला मुतेबा टाकजुगु थुइजि ।
‘ओहो ह्रेम्बोरछे, ङ… आउदिन ताङजि ! ङाला जातुकु दुइला ह्रो चोदे ग्रेन म्हि दोस्ह्युजिम !
‘ताजि, ताजि’, छोबा म्हिसे ङ्हो च्याकारच्युकुर ताना लाजि । ‘तिल्दा चु ह्राङबा लबज ? ए थेन ङाम जाजारि ह्रो मुबा ओम ह्याङ गुङरि चुह्राङबा भद्दा आउपचारिकताला आवस्यकता आरे नि !’
‘कोन्ज्योसोमसे ङादा रक्षा लागाइ ! हे महामहिम ! चु तिला सुङस्ह्युबा ह्राङसे…. ?’ ज्युइबा म्हिसे ङ्हाच्छा बिमा ल्हानान दार्सिकेन म्हाबा मुस्कानतेन पाङजि । ‘महामहिमला लि ज्यालम्याङमाम अमृत च्योच्यो मुला… महामहिम चु ङाला कोला नाफानेल हिन्ना… ओम चु ङाला खुयु लुइज हिन्ना ।’
छोबा म्हिसे तिलाइ बिरोध उन्के लामुबा कि थेसे ज्युइबा म्हिला लि भक्ति, चिल्लो घसाप लाबा ओम चाप्लुसिपुर्न अभिव्यक्तिसे प्लिङबा मुबा ओसेम थेदा वाक्कदिक्का ल्हागतिजि । थे थेलिच्छा ज्युइबा म्हिदा ह्राङला या पिन्बान थेग्याम निबारि म्हाइजि ।
ज्युइबा म्हिसे थेला जुम्बि सोम नाङजि, ह्राङला मुतेबा ल्हुइ कुरजि ओम याखारगि चिनियासे ह्राङनोन लासि दबब ताबा ङेबा ङेजि, हे हे हे । थेला खुयु मुस्काराप ताजि । नाफानेलसे सारि ह्राङला काङ स्हुइजि ओम कुलाकि ताइना लाजि । थेनि सोमनोन ब्याकुल मुबा ।
दो:बा : अगाध