जेलला स्होन्बोदिमरि जिमि भेलेन्टाइन ज्याबा मेहनत लासि जुताला माङग्यारला बो डुपचिमुबा । गिक्खे गार्ड थेरि खासि थेदा वार्डनला अफिसरि बोर्सि निजि । वार्डनसे जिमिला यारि थेला क्षमापत्र थानपिन्जि थेरि योरि जेक्खे राज्यला गभरनरसे हस्ताक्षर लामुबा । जिमिसे थे पत्र ब्लेसिकेन चुङजि । ह्राङला दिङ ब्लिला सजायला ला च्युइ थेसे थाजिन्मुबा । हिन्बाम चुरि खामा थेसे ल्हाना बिमा ल्हाना ला सोम चितोसेला अनुमान लामुबा ।
जिमिह्राङबा म्हिदा जेलला ङ्हार न्हाङरि चिसि क्रा थेन सुङरे–माङरे थातोबा आतोबा गेह्राङ छोर्मुबा, थेतासि थेला क्रा थेन सुङरे–माङरे ह्रेङमुबा ।
‘च्योगो भ्यालेन्टाइन’, वार्डनसे थेतेन बिजि, ‘एदा न्हाङगार योरि ख्लासेला मुला । थे दुइदोनारि एसे ह्राङला लि ज्याबा स्होउ । ए न्हाङहेन्सेन आज्याबा म्हि आहिन, सेफ फोबा गे दारेहेन्से ख्लागो आसेम सोझो ग्यामरि ब्राउ ।’
‘ङा ?’ जिमिसे छक्क ताबाह्राङ लासि पाङजि, ‘ङाइमि खाजिबाइ सेफ फोबान आरे ।’
‘अँ आरे ।’ वार्डन ङेबारि तिजि, ‘बिल्कुल आरे, तासाइ चु पाङगो ओम स्प्रिङफिल्ड कान्डरि खारलासि चुङजि ? घटना ताबा ग्लारि आराप्पा ताम चु कारनसे आपिन्नि तालाकि उच्च वर्गला खाजिबाइ म्हि एतेन फसतिल बिसि लोङमुबा ? कि जुरिला खाजिबाइ मुल्मि ए म्राङसि बोमो खामुबा ? ए ह्राङबान निर्दोस म्हि चुराङ लासिन फसतिमुला आहिन ?’
‘ङा ?’ जिमि आझान सिधा रुपरि, जब वार्डनला ताम थेसे च्योदो मे नोन आगोनि तब ङ्योइजि, ‘स्प्रिङफिल्डरि ? थेरि ङा दातेदोना निबान आरे ।’
मुइमुइ ङेसि वार्डनसे गार्डदा ङ्योइसि कुल्जि, ‘क्रोकिन चुदा दोसि बोर्गो । आसेम, ङ्यान्गो चुदा माङग्यार थोन्बा क्वान पिन्गो । योरि ७ बजे चुदा कोठाग्याम माङग्यार तेसि अफिसरि बागाउ । भेलेन्टाइन, यदि ए ङाला ग्रोइअन्सार ब्राला बिसाम ज्याबा तासेला मुला ।’
न्हाङगारताङसे योरि सबा ७ बजे जिमि वार्डनला अफिसरि रापचिमुबा । थेसे गिक्खे खुकुलो सुट क्वान्मुबा । थेला काङरि कोङबा खालला डिला स्होन्बो मुबा जुन सरकारसे ह्राङला परिबन्दरि परतिबा डोन्बोदा बिदाइला दुइरि पिन्बा लामुबा ।
क्लर्कसे जिमिदा रेलला टिकट थेन डलर ङ्हाला नोट पिन्जि । सरकारदा आसा मुबा कि चु डलर ङ्हासे थेसे दोसि नागरिकला रुपरि दोसि ह्राङला ल्हुइ तिखाम्सेला मुला । वार्डनसे जिमिदा गिक्खे चुरोट ह्रुपला स्वरुप पिन्जि आसेम थेतेन या बाजि । भेलेन्टाइन, ९७६२, ला मिनला ङ्हाच्छा रजिस्टाररि ब्रिजि, ‘गभरनरसे क्षमा पिन्जि’ आसेम मिस्टर जेम्स भेलेन्टाइनसे माङग्यारला दिनिला मुक्त होइस्हेररि केवा किनम्याङजि ।
नामेजुगुला मधुर संगितरिक्यार ध्यान नोन आपिन्ना, ह्योङबान मुतेबा दोङरिक्यार आच्यानान आसेम म्हेन्दोला थाङ आनानान जिमि सोझोन गिक्खे रेस्टुरेन्टरिक्यार ङ्हाच्छा वाङजि । थेरि थेसे मुक्तिला गिक्छा आनन्द किन्जि ह्रोबा नाका थेन तार आइरकला याखारगि बोतल । चुलिच्छा थेसे चुरोट थुङजि– वार्डनसे पिन्बा गिक्खे उच्च दर्जला चुरोट । थेलिच्छा थे गोलोसे स्टेसनरिक्यार ङ्हाच्छा ब्राजि । गिक्खे मि आम्राङबा ह्रिबाला कुलाकिरि जाजा सिक्क ागि ल्हिपिन्सि थे रेलला डिब्बारि चिजि ।
घन्टा सोम लिच्छा थे राज्यला सिमा ङामला गिक्खे जाजा स्टेसनरि मुबा । स्टेसनग्याम थे ह्राङला ङोसेबा माइक डोलनला क्याफेरि निजि । माइक बारला ग्याप्से चिचिमुबा । थेरि दोसि थेतेन या डिक्ना लाजि ।
‘जिमि ङानिसे दुङाल ङ्हाम्जिमुला, एदा ङान्से चु बिमा ङ्हाच्छा तेआखाम्नि । स्प्रिङफिल्डला बिरोधपत्रला कारन ङान्ना ग्यालामरि ल्हानान बाधा अडचन मुबा । गभरनरए नोन बिदारि मुबा । स्यान्दो ज्याबान मुला ?’
‘बिल्कुल,’ जिमिसे बिजि, ‘ङाला चाबि ?’
माइकग्याम ह्राङला चाबि किन्सि थे चाम क्रेजि । ङ्हाच्छाला बोरि स्होबा ह्राङला कोठाला ताल्चा ठ्वाङसि थे न्हाङरि वाङजि । मुतेबान स्हे जस्ताला तास्तान मुबा खाराङबा थेसे ख्लाथान्सि निबा थेराङबान । बेन प्राइसला कलरला बटन दातेदोना सारिन ताइचिमुुबा । जब थे प्रसिद्ध जासुस जिमिदा चुङबारि खामुबा तब चु बटन टाङसि ताइमुबा ।
पलङदा गुग्याम छेङसि जिमिसे सोझो ताना लाजि । दोसि गिक्खे सुटकेस माङग्यार तेजि थेरि फोहोर जमम ताचिमुबबा । सुटकेस ठ्वाङसि थेसे थेरि थान्बा आउजारदा प्रसंसापुर्वक च्याजि– चु स्यार अमेरिकारि सेफ फोबा थेन रेत ल्हागाब लाबाला लागि प्रयोग लाबा ज्याबा आउजार मुबा– बिसेस प्रकारला बाङबा फाइग्याम स्होबा आउजारला पुरा सेट थेफिरि जिमिसे ह्राङसे आबिस्कार लाबा आउजारए नोन काप्मुबा । थे छार आबिस्कारला कारन जिमिदा ह्राङफिरि वर्ब मुबा । चु सामान नगररि छुम्सि स्होबाला लागि थेसे नाउ साय डलरबिमा ल्हाना खर्च लातोमुबा ।
घन्टा गाङसालरि जिमि मार फािप्ज आसेम क्याफेला ग्याम ताबान माङग्यार थोन्जि । दारे थेसे सेम निबा थेन ज्याना लासि डुप्बा क्वान क्वान्मुबा । सुटकेस थेला यारि मुबा ।
‘खाजिबा सिकार दाङबारि ?मित्रतापुर्वक माइक डोलनसे ङ्योइजि ।
‘ङा ?’ जिमिसे थेला ताम आगोबाह्राङ लासि पाङजि, ‘ङाइ तिलाइ आगोनि । ङाम न्युयोर्क अमलगेमेटेड सर्ट स्नेप बिस्कुट क्रेकर उन्ड फ्रेजल्ड ह्विट कम्पनिला प्रतिनिधि हिन्ना ।’
चु थेसि माइति चोदे ल्हाना ताङजि कि जिमिसे थेलातर्फग्याम सोडाक्युइ थुङनोन तोजि, जिमि खाइमाइ नोन आइरक आथुर्मुबा ।
भेलेन्टाइन थोन्बा हप्तागि लिच्छा इन्डियाना राज्यला रिचमोन्ड मिनला ग्लारि सेफ फोबा गिक्खे घटना ताजि । चु खाजिबाइ सेबाला गे मुबा, चुङबाला लागिरि खाचिबाइ प्रमान ख्लाबा आरेमुबा । तासाइ चुग्याम ह्योसे जम्मा आठ सय डलर जेक्खे स्याप्मुबा । चुला हप्ता ङ्हिलिच्छा लोगानस्पोर्टरि गिक्खे पेटेन्ट लाबा, छार ह्योसे फोआखाम्बा बाङबा सेफ बिना खाचिबाइ हिचकिचाहट खालि ताजि । पन्ध्र सय डलर निजि, मुतेबान नगद, सेक्योरेटि बन्ड थेन म्हुइ थेसे थुर्बा सुताइ आरेबा । चु ङ्हिाच्५ा घटनासे पुलिसला न्हाब्याङ ठाटो ताजि । चुलिच्छा जेर्फन सिटिरि पुरानो खालला गिक्खे बैंकला सेफ बोजि आसेम पाच हजार डलर म्हाजि ।
दारेम ताम ल्हानान ल्हेजिन्मुबा, बेन प्राइस ह्राङबा कुसल जासुससे हस्तक्षेप लबारि योग्य स्तररि दोजिन्मुबा । छानबिन लामा ह्यो लाबा ढङग मुतेबान ग्लारि गिक्खेन स्याप्जि । बेन प्राइससे मुतेबान घटना ताबा ग्ला कोर्सि परिक्षन लाजि । थेसे म्हिजुगुसे चुह्राङ बिबा थेजि :
‘चु मि जिम भ्यालेन्टाइनला गे हिन्ना । चुदे स्पस्ट कि म्हान्गेले थेसे मुतेबान ग्लारि हस्तारक्षर लासि ख्लाथान्बा तागाइ । थेसे ह्राङला गे दोसि तिमुला । सेफला मुठ च्यागो, जस्तोकि खालाइसे छेप्पाला माउसमला खाचिबाइ जाबा बिरुवा स्योइसि ब्याङबा हिन्गाइ– बिना खाचिबाइ झन्झट । चु थे आउजारला गे हिन्ना जुन थेजा चेक्खेन मुला । तालादा खारलासि थासि ताइना लामुला । थेदा सिरिफ गिक्खे गाल चाल्बारि आबस्यक मुला आसेम गे जिन्छिन ख्लाला । दारेम भ्यालेन्टाइनदा चुङनोन तोला, दारे थेसे माफि याङसेला आरे न्हा खाजिबाइ छुट याङसेला मुला ।’
स्प्रिङफिल्डरि गे लामा बेन प्राइस जिमिला बानि ग्याम ङोसेबा मुबा । थारेङला नगररि छेप्सि तुरुन्त ह्यार्बा, ह्राङतेन खालाइदा आबोर्बा आसेम ज्याबा समाजरि चिबा चाबा लाबा– ह्राङला चुनोन बानिला कारन जिमि भेलन्टाइन पुलिसला मि ख्योबारि सफल तामुबा । चु तामसोर छिजिकि बेन प्राइससे चु केस च्याबाला मुला । खालतेन ह्योसे फोआखाम्बा सेफ मुबा, थेनिजुगुसे चु तामसोर थेसि तिलाइ आनन्दला सा बुन्जि ।
तिरेकुनु सोमछा प्रहाररि जिमि भेलेन्टाइन तागाडिरि ह्राङला सुटकेस छ्यामरिन थोसि अरकान्सास राज्यला एल्मोर मिनला जाजा नाम्सारि फाप्जि । एल्मोर रेलवे स्टेसनग्याम माइल ङ्हा थारेङ मुबा । ह्राङला भेसभुसाला कारनसे जिमि कलेजला डोप्ताह्राङबा म्राङचिमुबा । गोल्से गोल्से थे होटलरिक्यार वाङबारि ङ्हाच्छा ब्राजि ।
गिक्खे छार छामेसे सडक थाजि आसेम घुम्तिरि थेला ङ्हाच्छाग्याम गिक्खे म्राङरि वाङजि । म्रापरि ब्रिबा मुबा, ‘एलमोर बैंक ।’ जिमि भेलेन्टाइनसे छामेला मिरि ह्राङला मि छेना लाजि । थेसे ह्राङदा म्लेजि आसेम गिक्खे छार म्हि दोजि । छार छामेसे तुरुन्त ह्राङला मि मार लाजि, थेला लिरि छार रङग खाजि । जिमिह्राङबा गठिलो नौजवान थे नाम्सारि च्याङनान म्राङमुबा ।
जिमिसे बैकला ङ्हाच्छा चुर्सेक्यार्से कोर्सि थेर्ला आबारा ब्योनजुगुदा ङ्योइजि आसेम थेनतेन नाम्साला बारेरि ल्हानान ताम ङ्योइजि । गुङगुङरि थेसे ब्योनजुगुदा न्होर पिन्बान निमुबा । तिलाइलिच्छा थे छामे माङग्यार थोन्जि आसेम सुटकेस थोबा नौजवानदा ध्यान नोन आपिन्ना राजसि चालरि ब्राजि ।
‘चु म्रिङकोला मिस पाउलि सिम्पसन आहिन ओम ?’ जिमिसे चतुर चाल ल्हेजि ।
‘आहिन,’ ब्योनसे जवाफ पिन्जि । ‘थेमि अन्नाबेल एडकस हिन्ना । थेला आपा चु बैकला मालिक हिन्ना । ह्राङ एलमोररि तिला गेसे ज्योन्काला स्हिबा ओम ? ह्राङला घडिला चेन म्हारला हिन्ना कि आहिन ? ङादा गिक्खे बुलगड ग्लुतोमुला । ह्राङतेन स्यान्दो तिलाइ न्होर मुला ?’
जिमि प्लान्टर्स होटलरि निजि । थेरि थेसे ह्राङला मिन राल्फ डि. सपेन्सर ब्रिजि आसेम गिक्खे कोठा भाडारि किन्जि । क्लर्कला डेस्करि कुतासि जिमि थेतेन ताम लाबारि तिजि । क्लर्कदा थेसे पाङचिकि थे एलमोररि ब्यापारला लागिरि ज्याबा ग्ला म्हाइबाला लागिरि खाबा हिन्ना । नाम्सारि तिन्हाङगार स्होन्बोला छोङ खाराङबा मुला ? थेदा स्होन्बोला छोन लाबा सेम मुला । छोन ल्हेबा तिलाइ आसा मुला ?
क्लर्कदा जिमिला क्वान थेन थेला ताम लाबा तकिासे ग्रेन प्रभाव ताजि । थे ह्राङदा एलमोरला नवयुबक समाजला नेता म्हान्मुबा । दारे जिमिदा म्राङसि थेसे ह्राङरि कमि म्राङबा चुजि । जिमिला टाइरि छार प्रकारला बोदाइ खारलासि खिमुला, चु डान्बान थेसे पुरा सुचना पिनचिजि ।
हिन्बान, स्होन्बोला पसलमि चलप ताखाम्ला । दातेदोना जुताला खाजिबाइ अलग्ग पसल आरे । बिसातिसेन ह्राङला छोङखानरि जुता थान्मुला । चुरि मुतेबान स्हेला छोङ च्याना लासि चलप ताचिमुला । आसा मुला मिस्टर स्पेन्सर नोइ चुरिन चिसेला मुला । चिबाला लागि चु ज्याबा ग्ला हिन्ना । म्हिजुगु डिक्पा खालला मुला ।
मिस्टर स्पेन्सरसे पाङजि, थेला बिचार तिलाइ रे चिसि ब्यापारिक अबस्थाला जाँच लासेला मुला । क्लर्कसे कुलि ङ्योइबारि आबस्यक आरे । ह्राङला सुटकेस ह्राङसेन थोसेला मुला, सुटकेस तिलाइ ल्हिबा मुला ।
प्रेमला मेथुमसे क्रोबा जिमि भेलेन्टाइनला मेफ्राग्याम मिस्टर राल्फ स्पेन्सर दोबा हिन्ना, थे एलमोररिन चिजि । राल्फा स्पेन्सरसे जुताला ब्यापार तिजि जुनचा ज्याना लासि चलप ताजि ।
समाजरि नोन राल्फासे सफलता याङजि । थेसे ल्हानान ह्रो स्होजि । थेला सेमला इच्छा पुरा ताजि । मिस अन्नाबेल एडक्सतेन थेला ङोसेबा ताजि आसेम थेला जेबा लिग्याम रेदाङसे खिसिकेन निजि ।
दिङ गि लिच्छा राल्फा स्पेन्सरला परिस्थिति चुह्राङबा मुबाः थेदा समाजग्याम सम्मान याङमुबा, थेला स्होन्बोला पसल मज्जासे चलप तामुबा आसेम हप्ता ङ्हि लिच्छा अन्नाबेलतेन थेला ब्रेल्बा ताइ लामुबा । अन्नाबेलला आपा एडम्सदा, जो गिक्खे साहु मुबा, स्पेन्सर ज्याबा ङ्हाम्मुबा, जिमि आझाइ नोन मिस्टर एडम्स थेन अन्नाबेलला ब्याहा लाजिन्बा आङाला परिबाररि चुह्राङ लासि घुलमिल मुबा कि म्हान्गेले थे परिबारलान गिक्खे मुल्मि हिन्ना ।
तिरेकुन जिमिसे ह्राङला कोठारि चिसि गिक्खे पत्र ब्रिजि आसेम सेन्ट लुइरि चिबा ह्राङला ह्रोदा पुइजिः
प्रिय ह्रो,
ङाला सेम मुलाकि ए ङातेन स्यान बुधबार म्हुन्छे ९ बजे लिटिल रोकरि सलिभनला दिमरि खासि ह्रुप ताउ । ङा एतेन ह्राङला तिलाइ जाजाबा ताम जिन्ना लाबारि सेम मुला । ङा एदा ह्राङला आउजार ह्रुपताबा स्वरुप पिन्बा सेम मुला । ङादा था मुला ए चु याङसि ल्हानान ताङसेला मुला– हजार गि डलरबिमा ल्हाना खर्च लामा सुताइ एसे चुह्राङबा आउजार खानाङए स्याप्सेला आरे । बिलि दिङगि ताजिन्जि ङाइ ह्राङला पुरा ब्यापार ब्लाजिन्बा मुला । दारे ङाला गिक्खे पसल मुला थेरि ङा इमानदारिसे ह्राङदा तोबा स्होमुला आसेम खाबा हप्ता ङ्हि लिच्छा जाम्बुलिङला मोक्कोन बिमा जेबा छामेतेन ङाला ब्रेल्बा तासेला मुला । बिलि दारे ङा चुनोन सोझो ग्याम ब्राला । खालाइसे ङादा लाखौं रुपिया पिन्साइ नोन ङा स्यान्दोला सम्पतिला डलर गिनोन थुर्सेला आरे । ब्रेल्बा लिच्छा ङा ह्राङला कारोबार बोर्सि न्हुपरि निसेला मुला । थेरि ङादा ह्राङला पुरानो गेला लागि चुङसेला लोङबा तासेला आरे । बिलि देन्बान पाङबागेन मुला अन्नाबेल स्वर्गला देवि हिन्ना । थेदा ङाफिरि बिस्वास मुला । लिच्छारि मुतेबान दुनियाला लालच पिन्साइ नोन ङा बेइमानि लासेला आरे । सलिभनला दिमरि खा आम्लेना एतेन ङाला जरुरि गे मुला । आजारए नोन ङाइ ह्राङतेन छ्याम बासि खासेला मुला ।
एला पुरानो ह्रो
जिमिसे थे पत्र ब्रिजिन्माहेन्से सोमबार म्हुन्छेन गिक्खे बग्गिरि बेन प्राइसए नोन एलमोर दोगाजि । थे नाम्सारि ह्राङला स्वभाप अन्सार कुटिसि ब्राचिजि– जबदोना थेदा तोबा तामला डान्बा आखानि । स्पेन्सरला स्होन्बो छोङखान ङ्हाच्छा मुबा मान पसलग्याम थेसे मिस्टर स्पेन्सरदा ज्याना लासि च्याजि ।
‘ए जिमि, दारे ए साहुला जामेतेन ब्रेल्बा लबागेन मुला ?’ ब्रेन प्राइससे ङ्याम्बा काइरि सेमसेमरिन बिजि । ‘ज्याबान मुला, च्यागेले ।’
न्हाङगारदाङसे स्ह्योरि जिमिसे एडम्नाचा दिगु चाजि । थे दिन थे ब्रेल्बाला सुट अर्डर लाबाला लागि लिटिल रक निचिमुबा । थेग्याम अन्नाबेलला लागि नोइ तिलाइ सानदार गिफ्ट ग्लुसि बाबा सोचाइरि मुबा । एल्मोर खामाहेन्से थे ङ्हाच्छारि माङग्यार थोन्मुबा । ह्राङला पुरानो गे ख्लाबा दिङगि बिमा ल्हाना ताजिन्बा मुबा । थेला सोचाइ मुबा दारे माङग्यार थोन्मा खाजिबाइ खतराला लोङबा खातोसेला आरे ।
दिगु चाजिन्बा लिच्छा मुतेबान परिबार सपिङला लागि बजाररि थोन्जि– मिस्टर एडम्स, अन्नाबेल, जिमि, अन्नाबेलला ब्रेल्बा लाजिन्बा नाना थेन थेला जामे ङ्हि । जब थेनि जिमिला होटल ङ्हाच्छा दोजि तब थे छ्याङबान फिरि निजि आसमे ह्राङला सुटकेस थोसि खाजि । चुलिच्छा थेनिकादे बैक निजि । थेरिजिमिला ताबग्गिला लागि डोल्फ गिब्सन चिचिमुबा जो थेदा स्टेसन दोना दोना लाबारि खामुबा ।
मुतेबान बैकला किन्बापिन्बा लाबा कोठाग्याम सिङला बरन्डाला ग्याप्से निजि– जिमि नोन छ्याम मुबा । मिस्टर एडम्सला तासेलावाला म्हाला मुतेबान ग्लारि डेन ताजि । मिस अन्नाबेलला डिक्पाखालला म्राङबा सिधासाधा ङ्हाउला ह्रेम्बोला ज्याबा ताम थेसि क्लर्क नोइ ताङमुबा । जिमिसे ह्राङला सुटकेस दिरि थान्चि, अन्नाबेल, जसला तिङ नवयौवनला उल्लास थेन ताङबासे ओतप्रेत मुबा, जिमिला कुलाकि खेजि आसेम सुटकेस थिबारि वाङजि ।
‘च्यागो ङा दारे खाराङबा ब्यापारि म्राङमु !’ अन्नाबेलासे बिजि, ‘ओहो, राल्फ ! चु कादे ल्हिबा मुला म्हान्गेकि चुरि म्हारला इट्टा प्लिङबा मुगाइ ।’
‘हिन्ना, सुटकेस ल्हिबा मुला चुरि स्होन्बोरि युबा न्हाङला सोल मुला,’ जिमिसे संयमित भावरि जवाफ पिन्जि । ‘चु दोपिन्तोबा मुबा, ङाइ म्हान्जि चुदा नोन छ्यामनोन बोर्सि नि, रेलभाडा नोन जोगाब तासेला मुला, दारे ङा खर्च जोगाब लाबारि चुमुला ।’
एलमोर बैकरि क्योलोलो सेफ थेन वाल्ट ल्हागाब लामुबा । मिस्टर एडम्सदा चु तामरि ल्हाना गर्ब मुबा । थेसे ह्राङला ङोसेबा मुतेबादान चुला निरिक्षन लापुङमुबा । वाल्ट तुन्बा मुबा तासाइ थेला म्राप छारखालला कोङबा मुबा । थे डुङबाला लागि गोरसोम बाङबा छिटकनि मुबा जुनचा गिक्खे ह्यान्डलग्याम नोन ल्हागाब तामुबा । चुला ताल्चारि घडि थान्मुबा आसेम थे ठिक दुइरि ठ्वाङखाम्मुबा । मिस्टर एडम्स गर्वपुर्वक चु यन्त्रबिधि मिस्टर स्पेन्सरदा गोना लाबा चुजि जुन केवल सिस्टाचारपुर्न थेला ताम ङ्यान्चिमुबा, सेबा ताम आउदिन च्याङना लाचिमुबा ।
ङ्हि नोन लाइनुजुगु– मेन थेन अगाथा– वाल्टला चम्किलो रङग थेन थेरि ल्हागाब लाबा बिचित्रला बटन म्राङसि आउदि ताङसि लुङचिमुबा ।
चुला लिच्छालिच्छा बेन प्राइमए नोन कुटिसि बैकरि खामुबा आसेम माङग्यार रेलिङरि या जुसि रापचिमुबा । खाइमाखाइमाजे थे सेम आलाना आलाना न्हाङरि च्यामुबा । बैकला क्लर्कसे ङ्योइमा थेसे पाङजि कि थेला बैकरि खाजिबाइ खास गे आरे । थेमि ओस्सोन ह्राङला गिक्खे ङोसेबादा ब्रान्चिमुला ।
तिकखुरि म्रिङकोलाजुगु क्रिङबारि तिजि । ग्रेन म्हिजुगुला मि ख्योसि दिङ कुला मेनसे ङोसि ङोसि अगाथादा वाल्टरि च्युप पिन्मुबा । म्राप डुङसि किलिङ लापिन्बा मुबा । जसरि थेसे ह्राङला म्हेमेसे लाबा म्राङमुबा थेराङनोन लासि ताल्चाला बटन नोइ बन्द लाजि ।
मिस्टर एडम्स ताम गोबोतन लोङसि छ्योङजि आसेम वाल्टला ह्यान्डिल चुङसि चुर्सेक्यार्से स्याङबारि चुजि । तिलाइ दुइलिच्छा पिडित काइरि बिजि, ‘चु म्राप ठ्वाङ आखाम– घडिरि चाबि ल्हागाब लाबा आरे, ठ्वाङबा दुइए नोन निस्चित लाबा आरे ।’
अगाथाला आमा चु थेसि दोसि क्रिङबारि वाङजि ।
‘कुटिउ’, मिस्टर एडम्ससे ह्राङला दारचिबा या थिसि क्रिङजि । ‘क्योङनोन तिलाइ दुइदोना कुटिसि चिउ ।’ दोसि थेसे ह्राङला पुरा सक्तिसे काइ पिन्जि, ‘अगाथा ! एसे ङाला काइ थेचिमुला ?’
वाल्ट न्हाङग्याम अगाथा क्रिङबा थेन या काङ ब्याबा काइ थेजि, थे वाल्टला दोपरि लोङचिमुबा ।
‘ङाला प्यारि जामे !’ अगाथाला आमा क्राबारि तिजि । ‘दारे चु मि लोङसिन सिसेला ताजि । म्राप ठ्वाङगो । तिला चु म्राप फोबारि आखाम ? तिला ह्रेम्कोलाजुगु खालाइसे नोन तिलाइ लाबारि आखाम ?’
‘म्राप ठ्वाङबा कालिगड लिटिल रोकरि चिमुला,’ मिस्टर एडम्सला दारसि चिबा काइग्याम थोन्जि, ‘हे कोन्ज्योसोम ! स्पेन्सर एसेन पाङगोले दारे तिला लासे ? चु हालतरि लाइनु ल्हाना दुइदोना छोन्बो चिखाम्सेला आरे । न्हाङरि हावा सुताइ आरे । ओते दुइदोनारिम थे लोङसि बेहोस तासेला मुला ।’
अगाथाला आमा बेहोसह्राङ तासि म्राप छेप्पारि वाङजि । खालाइसे वाल्टदा बमसे फोबारि ग्रोइ पिन्जि ।
अन्नाबेलसे जिमिदा च्याजि । थेला गेनगेन मिरि दुख प्लिङबा मुबा, तासाइ दातेदोना थे निरास तबा आरेबा ।
जामेकोला हङला अराध्य ह्रेम्बोला लागि चु जाम्बुलिङरि खाजिबाइ गे लाखाम आम्हान ।
‘तिला एसे नोन तिलाइ लाआखाम, राल्फ ? तिलाइ कोसिसमि लाउ ।’
राल्फ अन्नाबेलदा बिचित्र आसेम ङ्याम्बा दृस्टिसे च्यचिमुबा ।
थेसे बिजि, ‘अन्नाबेल ङादा थे गुलाफला म्हेन्दो बाउ जुन एसे क्वान्चिमुला ।’
चु तामला बिस्वास आलाना देन्बान जिमिसे थेतेन म्हेन्दो ह्रिजि बिसि अन्नाबेलसे ह्राङला फ्रकरि मुबा गुलाबला महेन्दो तेसि थेदा पिन्जि । जिमिसे म्हेन्दो ह्राङला बासकटला खाल्तिरि युजि आसेम कोट स्युसि ब्याङपिन्जि, कमिजला बुस्या सुक्र्याप लाजि । चु गे छ्यामछ्याम राल्फ डि. स्पेन्सर सिज आसेम जिमि भेलेन्टाइनसे थेला ग्ला किन्जि ।
‘मुतेबान चु म्रापग्याम क्यार ल्हेउ,’ थेसे कुल्जि ।
थेसे ह्राङला सुटकेस टेबलरि थान्जि आसेम ठ्वाङजि, चुलिच्छा थेदा ङामरिक्यार खालाइ मुबा भान आतानि । गोलेसे सिटि ह्राप्बान फुर्तिसे थे बिचित्र म्राङबा चम्किलो आउजार पालोन पालो टेबलरि थान्बारि चुजि । क्योङनोन मन्त्रमुग्ध तासि च्याचिमुबा ।
जिमि छार सेफला फाइला म्रापरि गाल चाल्बा चुजि । दस मिनेट न्हाङरि फुर्तिला ह्राङला पुरानो रेकर्ड बोसि जिमिसे छिटकनि ल्हेजि, म्राप ठ्वाङजि ।
बेहोस अगाथा बिल्कुलै सुरछित मुबा । थेला आमासे जामेदा कुरि ख्वाइजि ।
जिमि भेलेन्टाइनसे ह्राङला कोट क्वान्जि आसेम रेलिङग्याम थोन्छि माङग्यार थोन्जि । ब्राना ब्राना थेदा चुराङ ङ्हाम्जि खानाङए थारेङ गिक्खे ङोसेबा जामेकोलाला काइसे थेदा राल्फ बिसि ङ्योइचिमुला, तासाइ थे रोकप आतानि ।
म्रापरि गिक्खे गेनखेप्पा म्हि थेला ग्याम पाङसि राप चिमुबा ।
‘ओइ बेन !’ जिमिसे बिजि । थेला सुङला बिचित्र मुस्कुराहट आझान कायम मुबा, ‘आताना आताना ए चुरि दोगाजि आहिन ओम, तासाइ तिलाइ आरे ब्राउ ह्याङ निइ, दारे ङादा तिलाइ फरक आता ।’
तासाइ बेन प्राइसला ब्यबहार तिलाइ बिचित्र प्रकारला ताजि ।
‘मिस्टर स्पेन्सर ह्राङदा तिलाइ भ्रम ताबाह्राङबा मुला,’ थेसे पाङजि, ‘ह्राङसे चु थाम्हान्गो कि ङाइ ह्राङदा ङोसेमुला, ह्राङला बग्घि माङग्यार ब्रान्चिमुला ।’
आसेम पुलिसला जासुस बेन प्राइस दोसि गिक्खे सडकरिक्यार निजि ।
दो:बा : अगाध
