गोर्कि जेबा नाम्साला मच्जा मे थामाला खिमरि दिम ङ्हि मुबाला । दिम ङिरि जतुकु ङ्हि मुबा ।गिला मिन गुन्जा मुबा बिसाम गिलाचा टुल्कु मुबा । गुन्जा थेन टुल्कु आउदि डिक्पा ह्रो हिन्ना । सत्तान छ्यामछ्याम क्लाङसि ब्राबा मुबा । आपा थेन आमासे छे सिङरि ब्राबा दुइरि ङ्हिदा चेख्खेन दिमरि थान्छि ह्रिरि ब्राबा मुबा । चुर्से ओर्से अनिउ दिम अख्लाको बिसि पाङसि थान्बा मुबा । थे ङ्हि सत्तान क्लाङबारि बुल्याब ताबा मुबा । गुन्जा थेन टुल्कुला दिम क्युरुरु दोङकादे मुबा ।
दोङ टारि खाइमाम लाजाङ, खाइमाम बु स्होबा, खाइमाम दोङरि क्रेसि सोइसोइनोन क्लाङबा मुबा । ङ्हिलान आमा ह्रिग्याम खाइमा छ्यामनोन दोगाबा मुबा । खाइमाम ल्हानान दुइ खेबा मुबा दिमरि दोगाबारि । टुल्कु थेन गुन्जाला आमा खप्पादम्मान ङाच्छा दोगासाइ चाबा स्हे स्होबा दुइरि ङिदान पिन्बा मुबा । गुन्जाला आमासे चाबा स्हे स्होसि गुन्जादा ङ्योइसाइ ङिनोन निबा मुबा । टुल्कुदा आमासे ङ्योइसाइनोन गुन्जा निबा मुबा । जजा दिङला मुबा । लोप्खाङरि निबारि खाम्बा तासाइ ग्यालाम जकि थारेङ ताबासे ब्रिबा डोबारि निबा आरेबा ।जतुकु दोङरि क्यार क्रेबारि बिसाम सिपालु मुबा । दिमरि गुन्जाला आमा कान स्होसि टिबाला मुबा । थे दुइरि याम्बुग्यामसे सोनामला फोन खाजिम । फोनग्यामसे ताम लाबा दुइरि न्हाङगर सोनाम दिमरि खाबा पक्का लाजि । थे ताम गुन्जादा थेना लामा सेम फुरफर ताङसि ख्वार ख्वार स्याजि । टुल्कुनोन गुुन्जा स्याबा तालरि छ्याम छ्याम स्याजि ।
गुन्जासे टुल्कुदा न्हाङगरमि ङान्नाज्योज्यो सोनाम खाला रो पाङजि । टुल्कुनोन ङान्नाइ ज्योज्यो खाला पाङजि । थेराङ ताना तानान जामा कुनुला रे निजि । न्हाङगर दाङसि सोनाम याम्बुग्यामसे खाजि । सोनामला आमा कोला खाला बिसि ह्रिरि अनिना टिबाला मुबा । सोनाम दोगामा ज्योज्यो बिसि गुन्जा थेन टुल्कु ङिनोन कुरि रेप वाङजि । गिसेइ ङान्ना ज्योज्यो गिसेइ ङान्ना ज्योज्यो पाङजि । सोनामसे एनि ङिलान ज्योज्यो हिन्ना बिसि ह्वाम्जि ङिदान । गुन्जादा क्वान बाबा ताम थेना लाजि । गुन्जाला ल्हुइरि गिक्छा रेम क्वान बाबाला मुबा । क्वान क्वानसि च्यामा ताङसि स्याबाला मुबा ।
फोरि नाङबा दुइरि च्याप च्याप ङ्याबाला मुबा क्वान । गुन्जा ताङबाला सिमानोन अरेबा । गुन्जाला आमानोन कादे जेबा टिम बिसि लि सल लाबाला मुबा । सोनामसे केकेबा (चक्लेट) ङिदान यारि जुसि पिन्जि । थे दुइरि टुल्कु केकेबा यारि थोसि डोङरेसि आमा मुबा ग्लारि निसि ङादाम क्वान अबाबा बिसि सेम स्हुखाबा मुबा । जन ह्वाम्माम बोल्सि बोल्सि क्राबा मुबा । आक्राको ह्याङला ज्योत्दा बागाउ पाङला बिसि ह्वाम्बा मुबा । थेनोन दुइरि सोनाम थेन गुन्जाला न्हाबेङरि टुल्कु क्राबाला काइ ठोक्काजि । योनायोना रेसि टुल्कु क्राबा ग्लारि निसि तिल्दा क्राबा बिसि ङ्योइजि । क्वान अबाबा बिसि क्राबाला टिम ।सोनामसे ङाइ दिनिरि ब्यासिरि बजाररि निसि बासि पिन्ना बिसि ह्वाम्जि । थे दुइरि सोनाम गुन्जादा क्वान बसाइ अबबातेबान ताजि । तिल्दा बिसाम टुल्कु बोल्सि बोल्सि क्राबा म्राङमा सोनामला सेमनोन बोल्सि क्राजि ।
गुन्जासे थेला यारि मुबा केकेबा पिन्सि ह्वम्जि । थे चेख्खेन आताना ज्योस्से बाबा छार क्वान तोर पटि क्वान्बा जा ह्राङदा लासि मार पटि क्वान्बा क्वान जा टुल्कुदा पिन्सि सेम ताङना लाजि । थे ह्यान्दे टुल्कुला सेम बुसि ताङबा खाजि । गुन्जासे आक्राको ह्या पाङजि । ह्याङि डिक्सि क्लाङदोला पाङजि टुल्कुदा । टुल्कुसे ह्या ताला बिबान केकेबा गोर्गि तेसि चाजि । गुन्जासेनोन चाजि । जतुकु सेम छ्याम छ्याम ब्रासि क्लाङजि । गिला छार च्याप च्याप ङ्याबा क्वान गिला आरेमाजतुकुला सेम अज्याना ङाम्जि । सोनामला सेम ल्हानान स्हुखाजि । दारेम दोसिला रेरि तिल्दामान बासाइ ङिदान बासि पिन्दोला बिबा सोनामला सेम न्हाङ न्हाङ ताम लाजि । दोसि ङिदान तिल्दामान बासाइ खालगिला स्हे बाला बिसि गुन्जा थेन सोनामदा ब्ला सुसि सोनाम याम्बुरि दोजि । गुन्जा थेन टुल्कु सेम ताङसि टिजि ।
