ख्युन मुबा चेगाइ

क्योङसेन बिमुला, ‘दुङाल आकिन्गो सोनालि । तिला ताबा ताजिन्जि । दारे एसे कादे तिङ स्हु नासाइ नोन एला आपा दोसि खासेला आहिन होइ ।’
ओइमा जेसिका खासि बिजि, ‘सेम कोङना लाउ सोनालि, ह्राङसे ह्राङदान सम्हाल तितोला । म्लेगो दुङाल स्हु, स्होउ लिउला जेबा म्हाङ, अठोट किन्गो लक्ष्य च्योम्बा, दाङसिकेन ब्राउ थेनोन ग्यालामदा ।’
तिल्दा तिल्दा तिनि न्हाङगार खालाइला तिलाइ सुझाबसे आथुर । खाराङ लासि म्हाबारि खाम्ला सेमला स्हु, ह्राङदा बिमा ल्हाना खोबा लाबा आपा डोङबा चु दुइरि । चुए नोन थाहा मुला ङादा– म्हि केवा सिबाला लागिन हिन्ना । तासाइ ङाला आपा दुइ आछ्योमान डोङजि, थेए नोन ख्युन मुबा चेगाइला कारन । उफ् ! ङामि स्हु नोन स्हुसे ब्लेटेक्बा चुजिम । खाराङबा थोबो स्हुखाबा छ्या !
‘आहिन सोनालि एला आपासे बिस नोन थुङसि डोङस्ह्युबा हिन्ना ? ङाइमि सुगर प्रेसरसे गेल्सि डोङस्ह्युबा हिन्ना बिबा थेबा मुबा । आहिन, थे आकु खाजिबाइ हालतरि बिस थुङसि सिबारि आखाम । कादे हिम्मतिलो मुबा । एसे खाराङबा आतोबा ताम लाबा सोनालि ? बिससे खोबा लाजि बिसि ।’ जेसिका गिक्खे ब्लेटेक्बा चुजि ।
‘खाल्से पाङजि एदा ङाला आपा बिस सोल्सि डोङस्ह्युजि बिसि ? बिसालु खोबासे गा सेजि बिबा ओम ङाइ ।’ पाङना पाङनान ङाला ओल्गोङ हाकगाजि । पाङगे लाजि पाङबारिन आखाम्नि ।
‘ए खाइमादाम्मान सेन्टिमेन्ट ताम जेक्खे लाला । तिनिन्हाङगार ङाइ एला ताम गोबारि ख्लाजिन्जि । देन्बा ताम तिला हिन्ना ? आछुम्ना पाङगोले ।’ जेसिकासे फ्यास्हिङजि ।
‘ङादा जाजारि आपाआमा ङ्हिसेन ल्हाना खोबा लामुबा । ङा छार्सिकेन निजि । थेनिला सेमए नोन न्होङसिकेन निजि । ङाला खोबारि बिसाम ङ्हिसेन च्याङना आलानि । थेनिला न्होङबा सेमए नोन झगडारि पोजि । ताना तानान दिमरि रेदाङसे झगडा ताबारि चुजि ।’ उफ् ! डान्मा ङाला ल्हुइमि टुसे फ्योर निजि ।
‘ओम ! ओम तिला ताजि ओम ?’ जेसिकासे चो तासि ङ्योइजि ।
‘आपा, न्होङबा ब्यबहार थेन आमाला कचकचसे म्हुक्गि म्हेर्बारि आखाम्बा तास्ह्युजि । आथे कोङबा छोबा म्हि गोल्से गोल्से म्ह्यसिकेन निस्ह्युजि । च्याना च्यानान फुइमान ब्लाङगुर्ला ह्राङ लासि ज्युइस्ह्युजि ।’
कामरेला रे मुबा । स्हेबा सोल्बा दुइरि आपा तिक्खुरि कुर्सिग्याम गुरस्ह्युजि ओम बेहोस तास्ह्युजि । ‘लाउ होइ ! आपादा तिला ताजि ?’ ङाइ क्रिङजि । ज्योज्यो नोन डोस्ह्युजि । योनायोना एम्बुलेन्स ङ्योइजि ओम अस्पतालरि दोना लाजि ।
आकस्मिक कक्षारि डाक्टरसे आपादा चेक जाँच लाजि । थेलिच्छा डाक्टरसे ङाजारिक्यार च्याजि ओम ह्रेङबा बु डुइजि ।
‘तिला ताबाला चिम डाक्टरसाब ङान्ना आपादा ? खतरामुक्त मुस्ह्युला ले ?’ ङाइ लोङसि लोङसि ङ्योइजि ।
‘दातेम खतरामुक्त मुस्ह्युला तासाइ खात्दामान दुइरि तिलादाम्मान ताबारि खाम्ला’, डाक्टरसे गम्भिर तासि पाङजि ।
‘तिला ताबाला चिम आपादा थेह्राङबा ?’ ङाइ सङ्का लासिकेन ङ्योइजि ।
‘एला आपा होइपोटेन्सन थेन सुगरला नोबा जोखिमरि मुला । दारे ङ्हिनोन रोगला लागि नियमित मान सोल्तोला । चोदे लासाम लोङसिन ख्लातोबा अबस्था आरे’, डाक्टरसे बिस्वास िताना लाजि ।
‘सोल्बा थुङबारि खाराङबा ध्यान पिन्तोला डाक्टरसाब ?’ ङाइ ङ्योइजि ।
‘डाइटिसियनसे तालिका पिनस्ह्युला । थेतान फलो लाउ’, डाक्टरसे बिजि ।
‘थेलिच्छाम एला आपादा च्वाट्टान फान्जि ताला, आहिन ?’ जोसिकासे ङ्योइजि ।
‘फान्बाम फान्सेला मुताला तासाइ बिसालु खोबासे न्होङना लाजि’, ङाइ बिजि ।
‘तिला बिला चु सोनालि ? खाइमादाम्मान बिसालु खोबा ! बिसालु खोबा !’ जेसिका हाथोम्जि ।
‘हिन्ना दिमरि दोबातेन आमासे डाइटिसियनसे पिन्बा स्युगु हाकहोक डेसि डस्टबिनरि ब्याङस्ह्युजि ओम सातान च्याख्ला थेन ब्लोबा म्ल्हाला कान डापतेन जेक्खे पिनस्ह्युजि ।’
‘आमाला ब्यबहार नोन रुखो तासिकेन निजि । सोल्बा नोन असन्तुलित । आपा दिक्क तास्ह्युमुबा । आपा झान नोन म्ह्युसिकेन निस्ह्युजि ।’ बिना बिनान ङाला मिग्याम मिख्लि ब्योङबारि चुजि । काबारि म्हाइजि काआखाम्नि ।
‘ओम डाक्टरसेन थेह्राङबान सोल्बास्हे दोन्गो बिबाला मुसिमले ।’ जेसिकासे बिजि ।
‘आहिन, आहिन ! डाक्टरसे थेह्राङ बिबान आरेबा । डाक्टरसे चिनि, आतोबा चाबास्हे, बाङपिन्बा बिबा थुङबास्हे चानोा आचाउ । वालास्या च्याङना जेक्खे चाउ । स्यान्दो मुतेबा चाबास्हे डिक्ना लासि चाउ । ल्हुइदा प्रोटिन, कार्बोहाइड्रेड, फाइबरमुबा चाबास्हे तोःबा ताला । ल्हुइदा तिलाइस्हे ल्हाना तासि न्होङना लाला बिसाम तोबाबिमा च्याङना थेबिमा ल्हाना न्होङना लाला बिसि गोना लामुबा ।’ ङाइ थेबा ताम पाङजि ।
‘खु ब्लोबा जेक्खे चातोला बिजि ताला आहिन डाक्टरसे ?’ जेसिकासे जिग्यासा थान्जि ।
‘अर्गानिक मसला युसि खुदा ब्रोइखाबा स्होसि चाबारि खाम्ला । तारतिबा थेन झानतिबा आचाउ, दाइसि कादेखाम्बा ब्रोइखाबा स्होसि चामा ताला । कुदापरि खाम्देदोना पिङ डापडुपजा थाफेउ सुङमुबा ।’
‘ओम एला आपादा डाक्टरसे तिला चाला आदे बिबा थेनोन स्हे चाबारि सेम निमुबा, हिन्ना ?’ जेसिकासे ङ्योइजि ।
‘ओस्बा हिन्नोन आहिन । ह्रोसे सोल्बारि हिदाक लाबा म्हिए आहिन । चाला आदेबास्हे, बाङ पिन्बा थुङबा स्हे थने चिनि सोल्बारि ख्लाबाम ल्हानान दिङ ताजिन्बा मुबा । थेह्राङबा स्हे खाइमाइ सोल्बारि नोन आम्हाइनि । मामसे सुङबा जाजहेन्सेन काप्जि सोल्बा ठिम आरेमुबा रो । ख्योबासे कादे ख्योसि पिन्जि ओतेन सोल्सि रे स्ह्युमुबा रो । आपालान प्रभावसे ङान्ना दिमरि खालाइदा चाला आदेबा चाबास्हे सेम आनि । ङानि मोक्कोन दालकान, गेङ खु थेन माउसाम आन्सारला रोरोरि (फलफूल) ताङला ।’ ङाइ दिमथेमेला मुतेबा ताम पाङपिन्जि ।
‘ओम थेह्राङबा म्हिदा नोन तिल्दा सुगर प्रेसर ताबा ओम ?’ जेसिकासे प्याच्चा पाङजि ।
‘च्यागो जेसिका, सुगर प्रेसर चाबा थुङबाला कारनसे जेक्खे आता । म्हिला हिक्पा थेन भोगाइला कारनसे नोन ताबा चिम ।’
‘ओस्बा आज्याबा ह्रिक्पा तिला मुबा ले ?’ जेसिकासे जिग्यासा थान्जि ।
‘उफ् ! ङादा थे रेजुगु नोन डान्बारि नोन सेम आनि । खाजिबा रे डाक्टरसे आपादा सुगर प्रेसर ताबा बिसि पाङजि, थेरेहेन्से आमा च्यान दोजि । ब्लोका खु थेन माकाइला च्याख्ला बिमा मुतेबा स्यान्दो सोल्बास्हे काजि । आपा गोल्छेसे गेल्सिकेन तिसारि नास्ह्युजि । आमासे आपाफिला ह्रेवा म्योबा साँडेला ह्राङ तासिकेन निजि ।’
‘जा जामे होइ, ङादा अस्पताल बोर्गो । ङामि सिला ताला ।’ तिरेकुनु आपासे सुङफि दार्ना लासिकेन सुङजि । ङान्छे ह्रोदा अस्पताल बोर्जि । डाक्टरसे जाँच तिजि ओम ङ्योइजि, ‘तिनिन्हाङगार ह्रोसे तिला तिला सोलस्ह्युमुला ?’
आमासे ङेसिकेन सुङस्ह्युजि, ‘ङाइ मुतेबान कन्ट्रोल लाबा मुला डाक्टरसाब । माकाइला च्याख्ला थेन ब्लोबा खु बिमा तिलाइ नोन सुङरि युबारि पुङ्बा आरे ।’
डाक्टरसे ङ्योइजि, ‘तिला ह्राङदा ह्राङला फाला चेगाइ आहा ? ह्राङलान कारन ह्रोदा कुपोसन ताजिन्बा मुला । दारेम गाह्रो मुला ।’
‘चेगाइ खासिम मुतेबा कन्ट्रोल लाबा ले’, आमा मुइमुइ ङेस्ह्युजि ।
‘थे ह्राङला ख्युन मुबा चेगाइ हिन्ना ।’ डाकटरसे क्यालो लाजि ।
आमाला दुर्ब्यबहार थेन रोगसे डासिकेन निजि । आपासे ब्रसिकेन निजि । बोल्ना बोल्नान आपा खाइमाइ आछोर्बा लासि स्हिमस्ह्युजि । उफ् ! ङाला प्यारो आपा ! आपाला ह्रेङबा ङुबातेन लिउला ल्हाम नोन ह्योङ्जि । ज्योज्योले लिरि ओस्सो च्याजि । च्यासि च्याखाम्बा आरेमुबा ह्रोला लि नोन ।
‘दारे खाल्से लाला ङादा चेगाइ ? खाल्से फापिन्ना स्कुलला साइ ?’ डान्ना डान्नान थोबो थिला ह्राङ तासि स्हुखाजि । ख्वाइख्वाइ मिङग्युरजि । बेहोस ताजिम । छोर्मा आपाला मुइमुइ ङेबा आङसि डेङरि च्योथान्बा मुबा । थेनोन आङसि च्यासि ज्योज्यो हाथोम्चिमुबा । ‘उफ् ल्हुइ !’ (दोबा ः अगाध)