‘कुलुलुलुलु, कुलुलुलुलु, छ्याक छ्याक, छ्याक छ्याक’ कुलुलु ङह्याजि । म्हुन गाङसाल तासि मुला । खुयु माम न्ह्त्बा मुबा ।
‘मार युङबा पिदोले, असत्ति कुलुलु लखारितउ,’ मामदा ख्रुङबारि स्युबा स्योन्दोलोङ आपासाँजि क्रिङजि ।
आपासाँजि क्रिङबासाद जाउले च्याङबा डोङरेसि फिक्र्याप थोन्जि । दिम नाङि छेडुपला माम फोतोकफोतोक तासि चिमुला ।
मामल नाििरर सलन पानीला पाइप थुइबाला मुला । मामला स्यान यारि चुङसि छेडुप ‘माम, माम’ बिबान मुला । होचुन दुइरि फिक्र्याप ‘कुलुलुलुलु, कुलुलुलुलु, छ्याक छ्याक, छ्याक छ्याक’ बिसि फिच्यान कुलुलु ङ्ह्याजि ।
‘उचु काका दोङि टिम, साँढेम’ जाउले च्याङबासे झटारो पुइजि । याकरनोन प्लेटेकजि जाउले, ‘दिमछ्योरि काका दोङ थान्सि चोरङबा आज्याबा नामे क्रिङबा, आज्याबा ताला तिनि । गोरनिस ताला दोना याल्ङा खायाम स्योङ बोम्बो टिबामुला बिपा थेबा चु तोङि, तिल्दा नासि थान्बाले ।’
कुलुलु क्रिङबासे वा नाम्साला म्हिकादे छेडुपला दिमि दोखाजि । मोक्कोनला लि जादा ताबा म्राङजि छेडुपसे । ‘माम तोरमार ताइलाबा कि तिगा ले ?’ छेडुपला सेम लोङजि । ङाच्छाङाच्छानोन कुलुलु क्रिङमा नाम्सारि आज्याबा ताबा मुबा बिसि खेप्पाखुयुकादेसे ताम लाबा मुबा ।
थेनोन दुइरि कुलुलु क्रिङबालान ताम ताजि । स्योन्दोलोङ आपासाँजिसे खोपराङरि सेसि बोम्पो म्हेमे बासि नोम्खाजिम । बेनान म्हि रुब ताबासे, माम एकोरो तासि निबासे छेडुब लोङजि । बोम्पो म्हेमेसे ङ्हा राब्बान ख्याद्बान मामदा मोने साजि ।
मामला यारि सलन पानी ताइबान मुला । स्यान यारि छेडुपसे चुङबान मुला । बोम्पो म्हेमेसे लादा सेरकेम लाबान मुला । पोबताबाकादे कुलुलु क्रिङबाला ताम लाबान मुला । कुलुलु फोहोरि, म्हुनासे ब्राबा ह्यो नामे, बोक्सिला वहान, थेसे बोक्सिथेन जाम्बुलिङरि कोर्बा मुला बिपा ताम दोना ताजि ।
‘बोक्सि ख्रेसि ब्राबासेम थे कुलुलु च्यान बिमान बाङबा ताबा मुला रो,’ स्योन्दोलोङ आपसाँजिसे पाङजि । लु चोथेबा म्हिकादेसे कुलुलुला ताम लामापाल्से चुदा आज्याबा चे बिपा थेसि छेडुपला सेमरि ताम क्लाङजि । छेडुपसे ओइमाजेनो कुलुलु खराङबा नामे हिन्ना बिसि लोपखाङरि खाबा म्हिकादेसे पाङबा ताम डान्जि । म्हिकादे खालाइ म्हेमे मुबा, खालाइ आपाग्रेन, खालाइ आमाग्रेन, खालाइ ज्योज्यो नाना मुबा ।
‘स्हिगो, छाङमासेनो कुलुलु आज्याबा सुङजि, तसाइ, चुदा ह्याङसे ज्यानाले म्राङबान आखाम्बा मुला, चु ह्याङ खेति लाबाकादेला ह्रो हिन्ना बिसिम थानोन आरेम ह्राङनिदा,’ छेडुपसे पाङजि ।
जाउले च्याङबासे छेडुपला ताम थाजि, ‘लोपखाङरि निजि बिसि ग्रेन थसोउले छेडुप, एला लोपखाङरि चा कुलुलुसे लोप्पा मुला कि तिगा, ह्याङला ह्रो खराङले ताला थे ख्लि नामे ?’
ख्लि नामे बिपासे छेडुप ङेजि । ओसेम पाङजि, ‘स्हिगो, कुलुलुसे म्हुनासे नामिला ब्ला माना लाबा मुला, ह्याङला सुन, साङा, मकाइ चाबा नामि कुलुलुला चाबा स्हे हिन्ना । चोत्तेजे अहिन, थेसेम पुख्रिन चाबा मुला । बल्बुन चाबा मुला । तिगागा नोन चाबा मुला । ह्याङदा जा ल्हाना फाइदा बिपा नमि चाबाथे हिन्ना ।’
‘थेत दोबदोब्बा म्हुन्से खराङले चाला थेसे नामि, नामि म्हुन्सेजे ब्रबा मुला,’ स्योन्दोलोङ आपासाँजिसे ङयोइजि ।
‘हिन्ना, म्हुनासे जे हिन्ना कुलुलुसेन म्राङबा, ह्रोला मि ग्रेन ताबा मुला, होचुथे, म्हुनासेजे म्राङबा मुला । दिनिरिम कुलुलु थोमथोमले म्हेर्सि चिबा मुला तोङरि, फेरि तोब्तोब्बा म्हुनारिजा थेसेन आम्राङबा मुला रो,’ छेडुपसे बिजि, ‘ओसेम चु क्रिङबाजा जाङि कोला मुमा क्रिङबा हिन्ना रो । थे क्रिङसि म्हिदा तिगान अताबा मुला रो बिपा ताम ङान्दा पाङबा मुबा ।’
नामि सेबा, पुख्रि सेबा हिन्साम ज्याबान नामे चिम लामि बिसि थेरि मुबा म्हिकादेसे सुङसुङ च्याजि । ताम लानालानान नाका ह्वाबा ङ्ह््याजि । बोम्पो म्हेमेसे मामला नारि चुङसि स्हिजि । बोम्बो म्हेमेसे माम योनान फान्ला सुङसि सेजि । थेन दुइरि अहेबा दोखाजिम । सलन पानी तिकतिक ताइबान मुबा । अहेबासे मामला कुजिलिइ थर्मोमिटर थान्जि । ङ्यामजागिमा स्याजि । थर्मोमिटर लिग्जि ।
‘ल छावाजा ताइजिम ११० दोबामुबा, ९९ तजिम, खुयुदा दरेम ठिक तला, साङाला खोले फ्योर्सि दोगो,’ अहेबासे पाङजि । छेडुपला आमासे दोगोनोन टुङगा युसि साङाला सुप सोसिजन्बा मुबा । अहेबासे सुङबासाथ म्हान्ज्यारि ख्योजि । थेन सुप छेडुपसे मामदा ह्वाजि । सुप सोल्बासेम माम सलसल ताजि । स्ह्यो ह्याल्याल ताजि ।
