आपातेन दावा दुर्सा ख्रुङसि चिबान मुला । दोपदोपमा दुर्सा गाङरि गुङ दिमला बोम्बो म्हेम्हे ख्राङबा दुर्सासे जाजाकार म्हे मेफ्रा दोसि फ्याङबान मुबा । दुर्सा गङ ख्यारख्युर बुट्टबुट्टि मुलाइनोन म्हुन ताबासे अम्राङमा मुबा । हाङबा होत्तेबान मुबा । आबा छ्याम मुलाइ सेम लोङचि दावाला । दावासे मोबाइल स्याजि, ओसेम च्याजि, १२ बज्दि लाजिम । जक्खि दुइ गेम क्लाङजि ।
‘ह्या आपा, दरेम निबा दुइ अतानि ?’ दावासे आपादा रगरग लाजि । म्ला चि थुङसि दुर्सा ङामरिन मेर्बा पासाङ जासे रगरग लामा चोन निजिम, फत छिङजि । दावादा स्ह्योदोना छ्यामनोन थान्बा पासाङला सेम मुबा । जादा छ्यामनोन थान्बादा पासाङसे राप पाङजि ।
बोम्पो म्हेमेला दुर्सा ख्लासि निसाम डुठा विपा राक्षस खासि म्हेमेदा सोम्बो सोबा ताम आपासे पाङबासे दावाला डिरि पुजु रेजि । ‘म्हेमे सोयाम ज्याबा ताला माले झन्, प्राउ सेगे,’ दावासे लोङबान पाङजि ।
‘म्हेमेदा सोम्बो सोबासेम फेरि राक्षसला सा युसि दुब्बुदुब्बु लाबा मुला रो, होसाम म्हेम्हेला आत्मासे शान्ति आयाङबा मुला रो ।’
रापतेन आपाला तामसे दावाला सेम ल्हानान लोङजि । ह्रो आपातेन छ्याम लेप ताजि । राक्षस खायाम आपासे हराङले तप्सेला मुजि ? चु राक्षससे सोम्बो म्हिदा चा तिगा लाला ? दावाला सेमरि चुनोन ताम क्लाङजि । राक्षस हायाम ङाच्छाम दुर्सा ख्रुङचिबादान सेला तला ।
‘राक्षस हायाम याङ न्हिदाजा ख्लाला ओम,’ दावासे आपादा ङ्योइजि ।
‘ए नोन मुला, ङानोन मुला, खायाम गोजासे फेत थाला,’ आपासे पाङजि, ‘थेनोन खायाम फेत थाबादाका ह्याङ दुर्सा ख्रुङबाइ खाबा ।’ राक्षसला तामसे दावा झन लोङजि । आपादा दिमरि नि बिसि करकर लाजि ।
आपादाजा जादा खराङले ङ्यान्ना लासे बिसि सेम क्लाङजि । पासाङ दावादा बोम्बो तायम तसेदा विबा सेम लाबा मुबा । डोङबा बोम्पोला आत्मादा ताङना लखामयाम बोम्पोला ह्रेन्जेन दावातेन खाला विपा विश्वास पासाङदा मुबा ।
‘च्यागो दावा, एदान था मुला, बोम्पो म्हेमेदा गादे मान लाबा मुला, इज्जत होत्तेन मुबा, ङाला सेमनोन ए म्हेमे राङबान बोम्पो तगाइ,’ पासाङसे पाङजि, ‘चुला लागिरि म्हेमेला ह्रेन्जेन एदान ख्रेदोला, थेला लागिरि एसे म्हेमेला आत्मादा ताङना लादोला, होचुथे म्हुनखिम चुरिन चिदोला ।’
आपाल तामसे दावा डोजि । ह्रोदाम नाम्सालान हेल्थपोस्टरि डाक्टर दोसि गेलाबा सेम मुबा । चोरोङबा बोम्पो सोबा ताम मि म्हाङरिन म्राङबा आरेबा मुबा । ‘आबा ङा बोम्बो आसो, चोरोङबा तामरि ङाला विश्वास आरे,’ दावा क्रिङजि ।
‘विश्वास आरेयाम तिल्दा लोङबा ओम,’ आपादा बोमो खाजि, ‘जाथरिजा म्हुन निसोम चि खाम्बा, तिनि म्हुन खि चि आखाम ।’ आपाला ताम थेसी दावदा बोमो हाजि । लोप्खाङिम माङ अताबा बिसि डोबामुबा । लोप्खाङरि डोलाइ माङ विपासेम सेम होस्सोन लोङबा मुबा ।
ङ्यामजागि कुटुसि चिबा मुबा, आपा ङ्होर्जि । आपा मेर्वा दुइरि डाक्टर सोबा सेम मुबा दावा लोङजि, ‘बोम्पो म्हेमेला ह्रेन्जेन हेजि विसम बर्बाद ।’ होचुन दुइरि ङामला बुट्टारि स¥याक…, बुद्रुक्क… लाजि । निराम सोमराम होराङमा ताबासेम दावासे आपादा रगरग लासि क्रिङजि । आपा आछिङनि ।
थे स्हे दुर्सारिन फुत्ता दोजि । ओसेम अर्को बुट्टारि वाङजि । आपादा फिच्यान रगरग लाजि । आपा छिङदेन आछिङनि । दावासे मोबाइलला टच म्राजि । ख्यारख्युर च्याजि । अम्राङनि । ‘पक्कान माङ हिन्न, लु छ्योङो दावा,’ दावा दिमपट्टि छ्योङजि ।
दुर्सा गाङग्याम दिमरि दोबादा घन्टा गि लाग्दिबा मुबा । ग्यामरि स्योङ नोन मुबा । थेन स्योङरि नोबानोबा मुर्कट्टा खाबा मुला बिवा ताम थेबा मुबा । स्योङ ङामरि दोमा दावादा लोङबा खाजि । स्योङ थासि निअखाम्नि । दुर्सा गाङरिन दोजि ।
छ्योङबान दुर्सारि दोजि । दुर्सारि तोगोला ग्लारि आपा अरेबा । ‘ह्राङ यार्बासे आपादा माङसे बोर्पाम अहिन,’ दावा झन लोङजि । तोगो स¥याक्क विपा ग्लारि फेरिन स¥याक्क आवाज खाजि । आपा अर्बासे टच म्राबा आटनोन आखानि । फिच्यानोन दावा दिमपट्टि छ्योङजि ।
पासाङचाम दावा म्योबा ह्राङले छ्योङबासे ह्रेन्जेन हेजिम विसि ताङजि । दावाला लिच्छालिच्छा गोलेले छ्योङजि पासाङ । दावाचम दोब्दोब्पाइ लिच्छा माङसे स्युर्जि बिसि लोङबान योनायोन छ्योङजि ।
दावा छ्योङबान लामा स्योङ पट्टिसे अर्कुसे खाबा म्राङजि । च्याटि म्रासि खाबासे च्याटि माङ खाजिम बिसि दावाला ब्ला माजि । लोङबासे दावा होजिन ब्लेग ख्याजिम । च्याटि म्रासि हाबाम दिम ग्यामसे पालो पिन्बाइ खाबा बोम्बोला म्हा चिम । पासाङनोन थे ग्लारि दोजि ।
‘ओहो तिल्दा दुर्सा ख्लासि प्रास्युबा आपाजा,’ बोम्पोला म्हासे ङ्योइजि । दावालान होस खाजि ।
पासाङसे ङेबान पाङजि, ‘दावादा बोम्बो आपग्रेनला ह्रेन्जेन हेजिम, होचुथे, ह्रोला लिच्छालिच्छा छ्योङबा ङाम ।’
‘हानाङला ह्रेन्जेन हेसेम, ग्यापसेग्यामसे तिसेसे स्युर्जि बिसि ङाजा लोङसि छ्योङबाला छ्योङबान मुला,’ दावा क्रिङजि । नाम्सारि नाका ङ्याबा थेजि । आपाजाला ताम थेसि बोम्पोला म्हाजाम सेमनिना ङेजि ।
