होङगाटाला लासाङ थेन म्हारसाङ योनोन ह्वारारि मकै पुतु म्हाइनितोबा मुबा । सत्तान बारतालिला ज्योमोसे मकै पुतु म्हाइबारि ङयोइगाबा मुबा । जहिलेन योरि दोमा लासाङ म्हेरबा जेक्खेन ताबा मुबा । लासाङ ल्हानान ब्लेखु मुबा । म्हारसाङसे आमादा ल्हाना गेकादे ह्रो लासाइ लासाङ म्हेरबान ताबा मुबा । ज्योमो बिसाम मकै पुतु म्हाइबारि छ्याम निबारि बिसि रुङसि चिबाला मुबा । लासाङला आमासे छाङ ठिक लासि लासाङदा योना निउ पाङसि छिङसि मकै पुतु म्हाइबारि पुइजि । ज्योमो थेन म्हारसाङ ङहाच्छा ङहाच्छा छाङ पुइसि हवारारि क्यार निबान मुबा । लासाङनोन लिच्छा लिच्छा छाङ पुइसि खाबान मुबा । ङोराबासे हाइहाइ लाबान हवारारि दोजि लासाङ । म्हारसाङ थेन ज्योमो बिमा लासाङ ङिदिङसे जाजा हिन्ना ।
आलेदा बिसि नाना ङिसे ज्याना पाङसाइ जोक जे रेबा मुबा । सुङ कापकाप लासि लेदाप ताबा मुबा । नाना ङिला दोइ छ्यो जिन्जि । लासाङला छ्योबा आरेबा । ङिसेन जक्कार ह्रुप्सि युसि पिन्जि । नाना ङिसे ब्राउ दारेम लोप्खाङरि निदोला पाङजि । लासाङ निबारिन आम्हाइजि । दिनि चिप्सिकेन तोरतोर खाबान मुबा । थे दुइरि आमासे लोप्खाङरि निबारि गाइजि योना खाउ पाङजि दिमग्याम । मकै पुतु म्हाइबा हवारा दिमग्यामसे क्यामसाङ ङामरिन मुबा । आमा बिसाम दिमला चावाटग्याम ङोरि या थान्बान खाजि कि आखाजि बिसि च्याबान मुबा । खाजि कि आखाजि बिसि क्रिङबान मुबा आमा ।
म्हारसाङ थेन ज्योमोसे लासाङदा ङहाच्छा जाङसि छ्यामनोन बाजि । लासाङ छाङनोन पुइ आसेबा ह्राङ लासि हयोइ हयोइ लासि पुइसि खाजि । दिमरि दोगामा आमासे लासाङदा बाङजि । ओेते ङामला गे सुताइ लाबारि आखम्बा तिलासि चाला पाङजि । बाङसाइ लोप्खाङरि नितोला बिसि कान चाबारि खाउ पाङजि । म्हारसाङसे ज्योमोदा कान चासि तायार तासि टिउ ल्हा ङा योनान ठिक तासि लोप्खाङरि निबारि खाला पाङजि ।
ज्योमो हया ताला पाङजि । दिमरि दोमा ज्योमाला आमा जामे तिल्दा गाइजि बिसि च्याबारि ठिक ताजिम ।जामे खाबा म्राङसि आमा योना योना कान ख्योसि पिन्जि । ज्योमो कान चासि ठिक ताजि लोप्खाङरि निबारि । आमानोन ह्राङला गेरि ब्राजि । जामेदा लोप्खाङरि ज्याना लासि निउ पाङजि । ज्योमोला डोबा ल्हानान ज्याबा मुबा ।
म्होकोन छ्योइला ब्रिबा आजिन्दे दोना खाइमाइ आकोल्बा मुबा । ज्योमो ठिक तासाइ तिल्दा आखाजि बिसि म्हारसाङला दिमरि निजि। दिमरि लासाङ ब्रिबा जिन्बा आरे बिसि फोतोङ बोल्सि ब्रिबान मुबा ।
लोप्खाङला क्वाननोन आख्रुना म्लाङ म्लाङबा मुबा । लिनोन दोपदोप्पा लासि लोप्खाङरि निबारि थोन्जि । म्हारसाङ थेन ज्योमोदा आले ज्याना लासि लोप्खाङरि बोर्गाे पाङजि आमासे । म्हिसे ग्यामरि तोला पाङजि । ङिसेन हया ताला पाङजि । छ्यामनोन बोर्जि । लासाङ कक्षा ४ रि डोबान मुबा । म्हारसाङ थेन ज्योमो कक्षा ५ रि डोबान मुबा । लोप्खाङरि दोसि ह्राङला कक्षारि वाङजि । ब्रिबा डोबारि चुजि । लासाङ थेन नाना ङिला कक्षा थेरेकरेक मुबा । कक्षारि सरसे डोबा दुइरि लासाङसे नाना ङिदा करपुङ गालग्याम च्यासि ङोगाबा मुबा । खाइमाम सरसे थाहा तासि बाङबा मुबा लासाङदा ।
दिनिला गि ङ्यामा (ज्ञबजब तामा) छुटि ताबा मुबा क्लाङबारि लोप्बोन कादेदा । थे दुइरि म्होकोन क्लाङबारि थोन्जि । लासाङ सत्तान म्हारसाङ थेन ज्योमोदा छ्याम क्लाङबारि ङ्योइकाबा मुबा । खाङबा लाला दुइ ताबासे दिनि आउदिन डोइखाबा मुबा । तोर्से लाखुरिला दोङ टारि निसि लेप्पा दिनिरि निसि क्लाङबा सेम लाजि । थेरि निसि टिजि । गाङगारोला पुजु टारि चकलेटला फिमा म्राङजि लासाङसे । अर्कुइ चकलेटला फिमा पोप लाजि ।नाना ङिसे आलेदा तिला लाबा पाङजि । लासाङसे पाङजि । युङसेल चु चकलेटला फिमारि जोर्सि चकलेट स्होसि पसल जुबा क्लाङबारि बिजि । म्हारसाङ थेन ज्योमोनोन पसल जुबारि सेम ताजि । क्युइ आम्बलला डाल्लोनोन बासि चुइकाम स्होजि ।
क्युइ आम्बलला डाल्लने मि छावाला माननोन ताबा मुला । लासाङसे पसल थान्जि । म्हारसाङ थेन ज्योमोदा चकलेट थेन चुइकाम अपिन्जि । टाङका बासि खाउ होतासि चेख्खेन पिन्ना बिजि । चकलेट थेन चुइकाम चाबारि टाङगा म्हाइनिजि । ङानि ङि आखतेदोना अनिउ हाइ बिबा तामनोन लाबा मुबा । टाङगा च जाङबुला बाला स्होबा मुबा । जाङबुला बाला टाङगा थुबारि गाइजि । थेनोन दुइरि घन्टि ह्राप्जि लोप्खाङरि । लासाङ चकलेट थेन चुइकाम दुइसि लोप्खाङरि हयारजि । म्हारसाङ थेन ज्योमो अदोगानि ।
जक्कि लिच्छा दोगामा लासाङ आरे । म्हारसाङ थेन ज्योमोदा घन्टि ह्राप्सि निजि बिसि थाहा अताजि । जतुकुकादेला सेम गाइजि बिसि अछोर्जि । लुदासि लाजिम बिसि काइ गिरि म्हारसाङ थेन ज्योमोसे लासाङ बिसि काइ गिरि क्रिङजि । थेनोन दुइरि म्हारम्हेन्दो फिरक्याप निबारि लोप्खाङग्याम खाबान मुबा । तिल्दा क्रिङबा पाङजि म्हारम्हेन्दासे ।
लासाङ ङानि आखाते टिला पाङबा मुबा । खालाङ निग्याम बिसि ङयोइबा पाङजि । म्हार म्हेन्दोसे एनि ङिदा लुसि लासाङ छट्टु तासि लोप्खाङरि डोसि टिबा मुला पाङजि । ङिनोन जोक रेसि लोप्खाङरि वाङजि । म्हारम्हेन्दो नोन छ्याम छ्याम निजि । चु ताम ह्रोकादेदा पाङजि । आलेसे नाना ङिदा लुसि छट्टु ताजिम बिसि म्होकोन ह्रोकादे ख्वाइख्वाइ नेजि ।
काभ्रे
