तोर्मा केक

थे ङ्यासे जम्बियाङदा बेनान बोमा रेजि । नाङगर नाबा रे–यम्बुग्याम दोखाबा अपासे तिकानोन नोम अखानिम ।
‘बर्थ डेदाम उपहार मिम अबानि ठिकान मुला, कमसेकम केक मि बातोसेदा,’ जम्बियाङला सेमरि ताम क्लाङजि ।
छोप्प म्हुन ताजि । कान चाबा बेला ताजिम । आमासे छ्याम्बा ख्योजि । ङाच्छा चरेसला देर्मारि । ओसेम जतजत स्टिलला ताङ ब्लिरि । ओसेम बोडितेन गन्डुला खु युजि छ्यामनोन ।
चरेसला देर्मारि अपादा । स्टिलला देर्मारि जम्बियाङ, आङा नि छेतेन, बोइमा थेन आमादा ।
जम्बियाङसे ह्राङला दोङरि दोखपा स्टिलला देर्मा छ्यामबातेन म्रबसाङग्याम हुर्जि ।
‘छन्द्रङग….’ दोब्दोब्बा ख्राङगाग्याम ग्रेन काइ खानि ।
‘म्हिन ग्रेन तासि खाजि, बोमोन ग्रेन तासि खाजि,’ १४ दिङ योबा ह्राङला जदा आमासे घुर्काइदिजि । अपासेम तिकान अबिनि । थे कुनु जम्बियाङसे तिलाइ अचानि ।
आपा आमा थेन आङाकादे कान चबासेम ह्राङह्राङला केरि वाङजि । छेतेन थेन बोइमा नाङगर ज्योदला नापा रे ताबासे ताङबा मुबा । निसेन आबा आमदा ह्रो लाजि ।
म्हुनसेन अपासे खडकन्डरि म्लकान ताइजि । छेतेन थेन बोइमासे नाङगरला लागिरि क्यु खोजि । आमासे डोन्पोदा आइरेक तेजि ।
तितरि वाङबासेम जम्बियाङदा न्हुङबान अखानि । गिचाम ओथुम्बा उपद्रो लामानोन सजाय अयाङनि । अर्कु फो हेन्जि । जम्बियाङल सेम पोल्जि । अर्कुकदे गे लबान दुइरि सुटुक्क चरेशला देर्मा स्यासि दिम ग्याब्से निजि ।
दिम क्याछङ ग्रेन युङबा मुबा । थेन युङबारि देर्मा डोङङा रोब्जि । देर्माम गोर्नि तोजि । थेन छाइया ब्याङजि । गोर ब्लि तोजि । थेन देर्मा ह्वारारि ह्वाङ ख्वासि लुजि ।
‘जा चुदुम्बा ताबा अपादा थानोन आरे, चरेसला देर्मारि अप्सेजे चदोबा ?’ जम्बियाङल सेम जक्खि छेम तजि । ओसेम मेर्बारि वाङजि ।
चुन्तोसे खरकन्डायि म्लाकान मिन्जिम । आमासे ब्यासिग्याम नोमखबा उस्युब लाङरा मुबा । ओनेमाजे डुडम खुदु मुबा । महि ला हाइबा म्हार मुबा ।
अबासे नाख्लेरि कान ख्योजि । ओसेम म्हार, खुदु, उस्युबला रस युबान कोलिसे च्यान्जि । च्यान्मा च्यान्मा अपाला ङोग्याम टु खाबा मुबा ।
जम्बियाङल तित ङामरिन मुबा । अपासे च्यान्बा कानला बासना मगमग खजि । थेन कानग्याम म्हाने ह्राङबा तोर्मा सोजि अपासे । तोर्मो सोबासेम अपसे सुङजि, ‘एला बर्थडेदा केक । तोर्मा केक ।’
‘ङ नुङबा अरे बिसि अबासे हराङले था याङजि ? खनाइ देर्मा थिबा ताम मि था अयाङनि,’ जम्बियाङ लोङजि ।
अपासे अर्कु जथ्तुकु तोर्मानोन सोजि । थे मोक्कोन त्रिभुजाकारला मुबा । कानला तोर्मो सोसि जिन्बासेम अपासे जत्खि तोर्मो जम्बियाङदा छिङसि दोजि, ‘ल म्याङगोनाम जम्बियाङ, तोर्मो केक ।’
जम्बियाङ छिङमा चोन्न निजि ।
‘छ्या, चु माङदा मन्साइदिबा तोर्मानोन केक तबावा ?’ जम्बियाङ बोमोसे तोबतोब तजि ।
‘ह्याङसे ह्याङला लदानोन पुजा लामा तोर्मो सोबा मुला जा, चुम ल्हानान चोखो से हिन्न, केक बिमान ज्याबा,’ अपासे सुङजि ।
लदान तोर्मो चडाइतिबा तामसे जम्बियाङला बोमा च्याङना तजि ।
‘तिल्मा जे ह्रि तेमे ख्वासि बापाला मुला । थेदा ब्लोदोला । मकै मोठे रोदोला । गन्डुला आचार सोदोला,’ अपासे सुङजि, ‘आमासे नम्साला मोक्कोनदा ङ्योइला । आङाकदेसे सरकदेदा ङ्योइला । अस्याङकदेन दोहला । बरु एला ह्रोकदेदान ङ्योयो योनान ।’
नापा रे छोबा अपाला ताम थेसे जम्बियाङला सेम ताङजि । क्रिम युबा यम्बुला केक चबा सेम, ह्रोदन केक ख्वाबा सेमचम सुबनोन मबासे ह्रोला सेम क्राजी । ‘ह्रोकदेदा ङ्याइबदाचाम पेबान हाला,’ जम्बियाङल सेमरि ताम क्लाङजि ।
अबासे पिन्मा तोर्मा सुङरि युजि । तोर्मामि छ्युल छ्युल ङाम्जि ।
नाङगर जम्बियाङल नाबा रे गेताङ चुजि । दिमला ख्राङगारि मोजेथेन ह्रि लहराला स्वागत म्राब सोजि । म्राबरी ब्रिवाला मुबा–जम्बियाङला नापा रे रि स्वागत ।’
निम्तो दोबाकदे दोखजि । जम्बियाङसे ह्रो दा तिल्दा ङ्योइदोजि र मोक्कोन ह्रोकदे ह्रुपतासि खजिम ।
म्ला मोनेला टिका थन्बादा चरेसला देर्मा तोजि । अस्याङसे चरेसला देर्मा माइजि । आमासे खन्दामान माइजि । देर्मा अयाङनि ।
अपासे स्टिलला देर्मारिन तला सुङजि । देर्मारि टिका फुजि । दहि दोङजि । पिडिरि गुन्द्रि तिजि । थेन गुन्द्रिरि जम्बियाङ चिजि । जम्बियाङला छेउछेउरि आङा नि चिजि । आमासे नख्लेरि तोर्मा नोम्खजि । छ्यम माकाइ, मोठे, बदाम, उस्युबला टुक्रा, तेमे मुबा । ओसेम गन्डुला अचारथेन मोहि ।
ग्रेन म्हिकदेदा आइरक जि ।
अपासे नौनिला धुप साङजि । अस्याङसे टीका ख्याप्जि । जम्बियाङसे १३ वटा त्रिभुजाकारला जतजत तोर्मा थाजि । १४ वटा छ्युमिरि बत्ति म्रजि ।
ओसेम टुबाक फोजि क्याच्च दिमला अप्च्याङसे ।
ओसेम जम्बियाङसेन ग्रेन तोर्मा थाजि । मोक्कोनसेन या ह्राब्जि ।
गोर्नि डम्फुरेसे डम्फु ह्राब्जि । ह्रोकदेसे ह्वाइ कोबाइ चुजि ।

तिनिला चु दुइरिमि,
गोर्कि सार मु ग्यामसे
चमचम चमचम फ्याजिम होइ
जम्बियाङला नाबा रे रि
मोक्कोन स्याइ लु मोक्को कोइ

ह्याङला ज्यबा म्हान्बा, ह्याङला ज्याबाम्हान्बा
प्रङना दिमरि केलाइनोन
अज्याबा एसे थमन्गो

ग्रेनग्रेन ताजि ए होइ दरेम दुङल ल्हानान नदोल
डासि डासि नितोला, ज्यासि ज्यासि खदोला

हे जम्बियाङ एदा ङन्ना बेनान बेनान ज्याबाम्हान्बा
हे जम्बियाङ एदा ङन्ना बेनान बेनान ज्याबाम्हान्बा
परर या राब्जि । जम्बियाङला थोबोरि कोम्हेन्दो फ्याङसि खजि । तासाइ, जम्बियाङल सुङमि दोबदोब तोजि । ह्रोला सेम अताङनि ।
ह्रोदा टिका ख्याप्बान मोलम पिन्जि । ह्रो टिका मुबा देर्मारि च्यासि टोलाइदिजि ।
‘फाकटरि देर्मा थिजिम,’ जम्बियाङल सेमरि ताम क्लाङजि, ‘चुथेबा म्हि मुबा ग्लारि देर्मा थिबा ताम पाङसाब पेबा हाला । आपा आमासे था याङसाम अज्याबा म्हान्ला ।’
ह्वाइ जिन्बासेम तोर्मा केक मोक्केनदन पोठाजि । ओसेम अस्याङसे जम्बियाङदा छलछलबा चरेसला देर्मा दोजि, ‘लु जम्बियाङ १४ दिङ दोबासेम चरेशला देर्मारि चदोला, चु देर्मारि एसेचे चा म्याङला । चु ङाला तरफ ग्याम हिन्न ।’
पररर या पादाल ङ्ह्याजि ।
सेम ताङसि जम्बियाङ म्हिग्याम बररर मिख्लि ताइजि ।