तार डेङ । तार नोन झ्यालला खापाजुगु । पारदर्सि सिसा । झ्याल माङग्यार काउसिला पेटिरि ज्यानमार मार्चाला दोङजुगु । जाकि क्याथाङ स्यान्दो मेबा काउसि । काउसिरि निबा चाम । मुस्किलसे गोर ङ्हि ओहोर दोहोर लाबारि खाम्बा । चामला याखारगि गुरि लस्कर नोन थान्बा जाजा गमला । गमलारि दुइ सार्बा बिरुवाजुगु । थे योला कु ङ्ह्यामा सार्मुबा । ङ्यासे साम्मुबा ।
नाना थेनोन झ्यालरि बाया या टेको ल्हागाब लामुबा । दाय या ग्राम्बारि क्यामुबा । ओम पारदर्सि सिसाग्याम ह्राङला मिजुगु ख्लामुबा । मार बसपार्करिक्यार । घन्टौ दोना । स्थिर । मि स्थिर । सुङ स्थिर । खिरिला काङजुगु स्थिर । चुह्राङबा छोर्मुबा, थेला ख्यारख्युरला मुतेबा मुतेबा परिस्थिति स्थिर मुला ।
सिल्कि कैलो क्रा । बामरि लत्रप ताबा । सुइरे तारङाला ह्राङबा जोर गि मि । सान्त । अपेक्षाहिन । सिकुटे पाखुरा । थप्पड नाङ बाङसे खालाइदा छेप्जि बिसाम प्याट्टा क्युइला ह्राङबा । थेला राइ न्हाङरि वाङबा मुबा । ङ्हेला फाचो थेनोन राइ न्हाङरि खानाङए ङ्हेप्बा । ङ्हा–ब्लिला नोबा । ट्युबलाइट ह्राङबान तार डि । मुतेबारि नाना स्या काडिरि स्युबा सुकुटि ह्राङबा म्राङमुबा । ह्रेङबा, तासाइ हार्बा ।
नानाला स्कुलला मिन बन्दना थिङ । दिमला फ्याङगुलिङ । खासरि थे ङाला आङि मुबा । ङाला लेङस्यासे ह्राङला आङिदा नाना बिबा थेबा मुबा । थेलान सिको लाजि । ओम पाङपिन्जि, फ्याङगुलिङ नाना । दिङसे आपा बिमा पन्ध्र दिङ कान्छि । ङा बिमा दिङ ङ्हाला जेठि । दिङला चु हिसाब किताब तोर मार ताबालाइ नोन कारन मुबा ।
आपा तोर नुवाकोटग्याम फाप्बा मुबा, हेटौडा । थेग्याम प्रिबारि पहाडरि दोबारि गाह्रो मुबा । न्होरला । दुइला । बिसेस लासि तिहाररि । थेफिरि आपाला केबाला बुसिङ आरेमुबा । बिकल्परि आपासे मैया आङिदा बुसिङ तेन्ना स्हिबा मुबा । मैया आङि आङिला मैच्याङ आङा मुबा फ्याङगुलिङ, मैया आङिला ब्रेल्बा तामा फ्याङगुलिङ नाना दिङ ब्लिला मुबा । बहुदलिय ब्यबस्था लागु लाबा दिङरि फ्याङगुलिङ नानासे कक्षा ब्रेला जिल्ला स्तरिय परिक्षा पिन्बा मुबा । तासाइ परिक्षाला नतिजा आखाचिमान ब्रेल्बा ताजि । ह्यार्सि । बिरगन्जरिक्यारला बाइ केटातेन । थे थेनोन केटा मुबा, थेला बारेरि बिरन्द्रसे ङादा खाइमागि पाङबा लामुबा । थे दुइरि ङा आदर्स बोर्डिङरि कक्षा ब्रेरि डोबाकेन मुबा । दिङ कुला मुबा ।
बिरेन्द्र मैया आङिला च्याङबा कोला । ब्र दिङला । फतर फतर ताम लाचितोबा । थेला सेमरि कोल्डो मुनोन आरेबा । तरबुजा ह्राङबा हे्रङबा लि । साहरुख खानला गतिलो फ्यान । बाजिगर फिल्मला टिकट थेसे सोमर्याम थाबा मुबा । थर्ड क्लासला ।
ये काली काली आँखे
ये गोरे गोरे गाल
ये तिखी तिखी नजरेँ
ये हिरनी जैसी चाल
देखा जो तुझे जानम
हुआ हे बुरा हाल
बिरेन्द्र बाजिगरला ह्वाइरि ल्हे ह्राप्मुबा । ल्हुइ च्यार्मुबा । ङातेन ह्रप तामा थेसे ह्राङ डान्सर दोबा ताम जिकिर लामुबा । थे थेन ङाला केमिस्ट्रि डिक्मुबा । ठिक थेह्राङ नोन लासि जसरि फ्याङगुलिङ नानातेन डिक्मुबा ।
फ्याङगुलिङ नाना ह्यार्बा बिमा ङ्हाच्छा कुनु ।
काउसिरि ङा, बिरेन्द्र थेन पुतलि नाना मुबा । ङानि हेटौडा बसपार्करिक्यार गो दोसि राप्बा मुबा । लेप्बा लाबा ताङसे सिम्सकेन निबा मुबा । दिनि न्हुपला मुरि याखारगि ह्रेङबा रेखारि गाबा मुबा । थेग्याम याखारगि वाला धर्सो ताइबा मुबा, फ्याङगुलिङ नानाला लिरि । फ्याङगुलिङ नानासे थेकुनु ह्राङला क्रा कर्लि स्होबा मुबा । स्पन्जवाला क्लिप खिसि । म्लाङ रङला लङ मिडि थेन बटरफ्लाइवाला टिसर्ट क्वान्बा मुबा । मिला गुदोना दोबा लासि गाजल ल्हागाब लाबा मुबा ।
‘लिच्छारि भिलेनदा पुलिसे बोर्ला । ओम हिरो थेन हिरोइन स्याप्ला । थे सिनेमारि खाराङ लासि क्रबा खाला ।’
फ्याङगुलिङ नानासे क्योलोलो ओम चलचित्र मन्दिररि खाजिबाइ चलचित्र च्याबा मुबा । थेनोन चलचित्रला राप पाङबाकेन मुबा । थे प्रेम राप मुबा चलिचित्र मुबा । रापबिमा थे खाइमागि ल्हानान भाबुक तामुबा, खाइमागि खितिति ङेबा मुला । ङेमा थेला लि टन्न म्रेन्बा म्हिला ह्राङबा म्राङमुबा ।
‘याखारगि केटो मुला । म्लाङ म्लाङ । सातान आसुला स्कुल निबा ग्यालाम ख्रुङला । छार ल्होरि आसुदा ग्रिटिङकार्ड पिन्बा मुबा । आसुसे एस्सोला छ्योइ न्हाङरि छुम्सि थान्बा मुला ।’ प्रेम प्रसङग खाबासे बिरेन्द्रसे पोल ब्लाजि । फ्याङगुलिङ नाना थेन थे केटाला ।
‘साले ए जातुकु तासि ङाला चियो लाला ?’ फ्याङगुलिङ नानासे बिरेन्द्रदा तोबारि म्हाइजि । बिरन्द्रसे ल्हेला बक्ररेखा स्होजि । ओम टाप छ्योङजि ।
‘थुक्क । नक्कलि । फादान निसाइ नोन एसएलसि जिन्छि निसाइ तासेला । थेए नोन बाइतेन । ङान्छे डोबारि आयाङना दुख याङजि । एला मि थिजि ?’
मैया नानासे ढोकभेट दोबाकुनु केला स्हिजि । थेलिच्छा बाङसे कुरि ख्वाइसि क्राला स्हिजि, फ्याङगुलिङ नानादा । थेलिच्छा फ्याङगुलिङ नानाला मिरि लोङबाला याखारगि सर्को छ्योङबा मुबा । ङा आपाला मे दोसि थे भोजरि दोमुबा । वाला जर्जेट स्ह्यामा । सितारा युबा वाला पारदर्सि घुम्टि । ङ्हि नोन मिछाम फिरि लस्कर नोन जाजाबा बिन्दिया । सुङफिरि वाला लिपिस्टिक । ग्राम्बारि गुलाबि लालि । तार थेन ह्रेङबा जुम्बिरि बिच्छु ज्याप । काङरि म्हुइला पाउजु । खारेरि वाला पोते स्युबा तिलहरि । थे कुनु फ्याङगुलिङ नाना देन्बाला फ्याङगुलिङ म्राङबा मुबा । बसपार्कला स्यारला गाङरि मुबा थे दिमरि बजारला म्रिङकोलाकादे पोप्बा मुबा । १४ दिङला छाङछार च्याबारि ।
थेलिच्छा फ्याङगुलिङ नाना थेन ङाला ह्रुप आतानि । ह्रेङबा दुइदोना ।
ब्रेल्बा ताबा दिङला तिहार । ह्याल ठाम्बा दुइ । हेटौडाग्याम बिरगन्ज ओदे थारेङए नोन आहिन । खाइ तिला समस्या ताग्याम, थे दिङ फ्याङगुलिङ नाना आखानि । ङान्छे फ्याङगुलिङ नाना आउदिन डान्जि ।
‘थेला स्युइमि छुच्चि मुला रो । फ्याङगुलिङदा मायुङजा पुइनोन आपुइगा । फ्युक्पोजुगुला ताम । फ्याङगुलिङ लोङमुला केन स्युइमितेन ।’
चुह्राङ बिबान मैया आङिसे तिहारला सगुन थानपिन्स्ह्युजि, आपाला ओन्छाङ । गोर ङ्हि बियरला बोतल । प्लेटरि तारतिबा तारङा । दाइबा गेडागुडि । पान । ब्लोबा नाकाला के ।
‘थेसे जाजा दिङरि ह्राङला ताङबा ब्रेल्बा लाजि । बिजाततेन । दुख याङसेला ताजि ।’
आपासे सुस्केरा तिस्ह्युजि, बियरला चुस्कितेन । बियरमि फ्याङगुलिङ नाना नोइ सोल्मुबा आउदिन । चुरोट नोन । चु ताम आपादा, म्रया आङिदा, ङादा, मुतेबादा थाहा मुबा । बजारला चिबा, छार्बा । ह्रोजुगुला प्रभाब । दिमला प्रभाब । दिमरि मैया आङि नोन थुङस्ह्युमुबा । ग्याने आकु नोन । माम । म्हेमे । क्योङसेन थुङमुबा । थेतासि मुताला फ्याङगुलिङ आङि नोन जाजारिन रक्स्याहा ताजिन्बा मुबा । ब्रेल्बा लामाहेन्से थुङमुजि कि आरे ? ङाइ थाहा आयाङनि ।
आर्कु म्हेनिङरि फ्याङगुलिङ नाना खाजि । खामा गिक्खेन खाजि । कुरि जाजा ह्रोए नोन बाजि । तासाइ जाजा ह्रोला आपा आखानि । फ्याङगुलिङ नाना साइजरि ग्रेन तसि खाबा मुबा । वजनरि च्याङसि । लिला रङ सुर्यमुखि म्हेन्दोह्राङ म्राङमुबा । छ्यासमिस । उर । गुङगुङरि म्लाङ । मिजुगु उदासिसे प्लिङबा । ह्रेङबा ल्हामलिच्छा यात्रिसे महसुस लाबा ब्लाप्बा । ब्लाप्बा लिच्छाला आलस्य ह्राङबा ।
ङ्ह्याला रे मैया आङिसे ल्यान्डलाइनग्याम फोन लास्ह्युजि, बिरगन्जला म्हादा । फोनरि मैया आङिसे च्याङना अनुरोध, ल्हाना घुर्कि लास्ह्युजि । थेलिच्छा फ्याङगुलिङ आङिसे तिहारदोनाला छुट्टि याङजि, दिमग्याम । म्हाग्याम । प्रतिकुलताग्याम । थे तिहार जिन्छि जेक्खे दोजि ।
ला ङ्हि लिच्छा । माघला याखारगि ठिहिर्याप लाबा ङ्यासे ।
‘बन्दना आमा दोजि । दिमरिन सुत्केरि ताजि । जामे न्हाजि । मुतेबा स्हे सामान्य मुला ।’
ल्यान्ड लाइनग्याम खाबा चु तामसोर थेबा गिक्छा म्हि मैया आङि मुस्ह्युमुबा । थेलिच्छा माम । म्हेमे । आपा । आमा । ङा । ओम बिरेन्द्र । ङान्ना ताङबाला पारो ह्वात्तान ल्हेसि निजि । छेप्पाला थर्मोमिटर ह्राङबान । मुतेबासे लेप महसुस लाजि । थेला स्यान्दो दिङ ङ्हि फ्याङगुलिङ नाना मायुङजा आखानि ।
२०५० दिङ, साउनला ला । झरि । झरि । जेक्खे झरि । थेनोन दुइरि ह्राङला मुतेबा चन्चलता बिरगन्जरिन बन्धक थान्सि खाजि, फ्याङगुलिङ नाना । मिग्याम थेनआछ्याबा झरि ताइचिजि ।
‘जामे खाइ ? म्हा आज्यान्गानि ? कादे रे चिला ?’
मैया आङिला मिरि आताङक म्राङजि । लोङबा म्राङजि । म्राङजि खाजिबाइ ‘अनहोनि’ला आसङका ।
‘ङाइ कादे स्हु नाबारि लेङबा मुला ?’
फ्याङगुलिङ नाना मिसे पाङजि । सुङसे आपाङनि ।
थेलिच्छा फ्याङगुलिङ नाना दिमरि दोसि आनिनि । गोलेसे थे आर्लाला हार्बा हागाह्राङबा म्राङबारि चुजि । खङग्रङग । थे रेदाङसे याङसिकेन निजि । ङ्यासे छावा खाबा ताङसे निरन्तरता याङजि । ह्रेङबा ब्युङबा । चाबारि सेम आलाबा । थुङबारि सेम आलाबा । श्रब्यरि सेम आलाबा । दृस्यरि सेम आलाबा । थेदा म्राङमा चुह्राङबा छोर्मुबा, सोबारि सेम आरे । थे घन्टौ सिलिङ च्यासि चिबा लामुबा ।
मैया आङिसे जो लास्ह्युजि, हेटौडा अस्पताल बोर्बारि । फ्याङगुलिङ नानादा । नानासे आङ्यान्नि । चुह्राङबा रेमरेम ताजि ।
‘ए अस्पतालरि निबारि आङ्यान । सिङ दोजिन्जि । तिला ङान्दा क्राना लासिन निला ?’ हप्ता दिनलिच्छा आजित तासि मैया नानासे हप्काप लास्ह्युजि, फ्याङगुलिङ नानादा ।
‘ङादा टिबि ताबा मुला । निबा लासोम हेन्से । दिमरि मुतेबासे घुना लाबारि चुजि । जामेदा ङाला ङामरि खाबारिन आपिन । ङा योनान सिला ताला ।’
थेदिन फ्याङगुलिङ नाना सुङसे च्याङना ताम लाजि । मिसे ल्हाना पाङजि ।
मैया आङिला मिला आताङका म्ह्युजि । माइन दोसि । लेप्पा । रापिलो । चुसे ख्यारख्युरला मुतेबादा क्रोबारि तिजि । तासाइ योनान चु सिम्जि । मान उपचारला लागि छ्योङबा चुजि ।
फ्याङगुलिङ नानाला लागि स्यान्दोन ब्यबस्था लाजि । टाबेल, ताङजुगु । कोठा । सोमछा तलारि । ढलान छाना । तार डेङ । तार झ्याल । थेग्याम बसपार्कला लिखन्डि कु चाल्सिकेन छ्योङबा म्हुनाला बसजुगु म्राङबारि खाम्मुबा । म्राङ खाम्मुबा, तारङा बजारला क्यार छ्योङ मार छ्योङ । फुटपाथला क्वान पसल । होटलला चलह पहल । म्हिला भिड ।
फ्याङगुलिङ नानाला कोठारि जातुकुदा निबारि आपिन्मुबा । टिबि कोला बिसि । ङा बिसाम निचिमुबा । मैया आङि आरेबा माउका तेसि । थेला एकाङकिपन बोबारि । थेतासि ङाप्रति थेला स्नेह जाकि नुप्बा मुबा ।
‘लाउ चु पेन एदा । ङालाम डोबा ख्लाजिकोम । चु दिङ एसे जिल्ला स्तरिय परिक्षा पिन्बाकेन मुला । डोबारि आख्लागो ल्हा ।’
तिरेकुनु फ्याङगुलिङ नानासे ङादा पेन पिन्बान पाङजि । थे पेन थेसे दराजग्याम तेबा मुबा । थे दिन ङाला काङ सारि आतानि । तिल्दाबिसाम, थे पेनला फिला साइडरि डिजिटल घडि जडान लाबा मुबा । महङगो खालला । थेह्राङबा पेनला कल्पना लाबान आरेमुबा, ङान्ना पुस्ताग्याम । अपेक्षाला ताममि झान थारेङ मुबा । खासरि नानादा थे पेन गिफ्ट खाबाला चिम । स्कुले दिनरि । प्रेम प्रस्ताबरि । थे बाइ केटोग्याम । चु ताम ङाइ ल्हालान लिच्छा जेक्खे थाहा याङजि ।
‘चु पेनसे दुइ उन्ना । उ थे गमलाला म्हेन्दोसे ह्राङ नोन । तासाइ याखारगि ताम फेबा मुला । चु ङ्हि गुङरि । चु पेनला घडिला लागि ब्याट्रि ठिक तातोला । गमलाला घडिला लागि दिनि ठिक तातोला । आहिन्साम चु ङ्हि नोन साम्ला ।’
चुह्राङ बिमा फ्याङगुलिङ नानादा लिरि नुप्बा खिन्नता म्राङबा मुबा ।
‘काजलदा तिनि बापिन्ना बिमुबा । आहिन ?’
तिक्खुरि तिलाइ डान्बाह्राङ, फ्याङगुलिङ नाना फ्लिक दोजि मैया आङिजारिक्यार । लिच्छाला घन्टा गिहेन्से बसपार्करिक्यार कोहोरे गि ताजिबा मुबा । थेला थोबोला ठिक फिग्याम दिनि वाङजि । पारदर्सि सिसा क्लेसि । थे च्योच्यो ठाम्जि । उदासिसे प्लिङबा डेङरि ।
काजल फ्याङगुलिङ नानाला जामे । दिङ सोमला । आमा जामे ह्रुप आताबा ला डु ताबा मुबा । गुङ गुङरि ङ्हिर्याम सोमर्याम जामे च्याबारि सेम लाबा मुबा नानासे । तासाइ अस्विकार लाचिजि दिमलाजुगुसे । रोग कोला बिसि । चु गुङरि फ्याङगुलिङ नानाला मि क्यासिकेन निबा मुबा । ङ्होरि कोल्डो ताबा मुबा । ग्राम्बाला नाख्रु अस्वाभाबिक तबरसे नोबा मुबा । ब्युङबाला मात्रा ल्हेबा मुबा । ख्लेनाइरि का म्राङबा मुबा । नियमित खाबा छावासे डि उर ताबा मुबा । ल्हुइ ब्यो दोबा मुबा ।
‘तिबिला मासे गे लाबा आरे । फ्याङगुलिङ आसो ताला । तिर्याम जामेला लि उन्तोजि ।’
मैया आङिसे फोनग्याम चिन्ता ब्यक्त लाजि, बिरगन्जरि म्हादा । म्हाला आमादा । आपादा । थेलिच्छा जामे बासि आपा खाबा तयार ताजि । न्हाङगार दाङसे । ह्यालरिन । तासाइ थे दिन दोप तादेदोनान थे आदोगानि । रेनि दाङसेला ह्याल फ्याङगुलिङ नानासे म्राङबारि आम्याङनि ।
फ्याङगुलिङ नाना असमायिक साम्बा योरि दिनि आफेनि । हुस्सु मारमार छ्याबा मुबा । ल्हिसि । ङाला तिङ ह्राङनोन । थे संयोग नोन मुबा । थे दिन गमलाला घडि म्हेन्दो आसार्नि ।
दो:बा : अगाध
