कुङक्यल तिङ डुप्सल कि मि छेत्प तिप्चि । काकर ङ्हिङ्हि तमा तमम पक ङ्हिकि अपअमचे नो थ्याचि । देरे दिकि कोला म्हा त खले दुल्स्या बि डुप्सलकि अप सेम म्हेन्लु स्यर्डिपलम कुङक्यल, ‘ज्यपनो स्हुपो अस्यङ ?’ बि दिम न्हङ वाङचि । न्हङटि थेमेम्हा छेङल्या ह्रङल्या ङेत्प तिप्चि ।
‘तिङी ङ अर्थ गि डुत्प ओ ?’ डुप्सलकि अपचे पङचि । ‘तल तल’ बि मोक्कोनचे पङचि ।
‘दङपो दङपो नम्स गिरि सोमच्युइ ते दिम मुपल रो । हुचु नम्सरि यङप योपल मुपल रो । हुचुइ मुखेचे ह्रङकि नम्सप त बेस्ल्या तङनल्या थेन्पल रो । तिरेत हुचु नम्सरि गन्डङ खनेम रो । गन्डङकिल या डु, कङ ब्लि, से ब्लि मुपल रो । म्लङ बिसिरि मुपल रो । च्यामम म्हि ह्रङप, नखुङ चे पे डोङपल मुपल रो । थे ग्यमटि खलु दोचि हुचु चपल रो ।’
कोलाम्हा गितिङ गि ख्यरख्युरल्या च्यामु ।
‘ओसेम हुचु गन्डङ दिङि गल्प यन्सो नका अङय गते नम्स कोर्प मुपल रो । मुखेचे खलुतय ओतेबेलोरि थडोङो पङपलम तिरेत क्युचु स्योङजा अप तिङ ज खम्सङ ङिपे घ्लारी नखरुत रिउल्या चइथेन्नेम रो ।’
जोते अर्थ स्यत्प बुत्मम कुङक्यलचे ह्रङकि चकटि स्युक्तुक्ल्या छेङजिम म्रपक्योर स्हुरल्या च्याचि । डुप्सल नो अपइ जाङक्योर ठुत्मु । अपचे अर्थ डुत्सिनो बोर्चि ।
‘होल्या नो क्युचु थङसिङ गङ ग्यमचे खोन्द्रो नाजिम गङडङ युप मुपल रो । गोरालु गि चे स्हङगमचे लोप्पे ङाल्हुङ डुत्जिम तिरेत ग्यम ह्रोत्नेम रो । म्हङ तिङ गोरालु छेत्मम । गोरालु चे थे या ङ्हि ओसेम खोन्तोरो ब्यन्थेन्नेम रो । होतेपे कुना ह्यन्सो थे अम्रङनल्या ब्रनेम रो । स्योङटि तरङा अचङिनल्या नम्सरि वङजिम दिम दिमटि नो ङिजिम म्हि चप तिप्नेम रो । क्योङपेखोरकी च्यङप म्हेमे, तोङपेखोरकि च्यर्लिङ म्हेमे, गुन्सइ रकरिक म्हेमे होल्यानो काकर काकरल्या चनेम रो ।
म्हि लोङजिम दिमचे नो अडचङप तिप्चि रो ।
‘कक्करटि तमखु स्याप स्यापल्या डुत्जिम अपचे अरथ डुत्सिनो बोर्चि ।
‘गन्डङचे नम्स बेप तिप्मम मुखेचे थारेङचे बोम्बो ङ्होत्जिम ङा डङपङचि रो । बोम्बोचे थिङकोर जङजिम सेत्प म्हेमम थेचे ल्हि लापरि छुमनेम रो । होतेपे कुना ह्यन्सो थे लापरि नो ब्रप तिप्चि रो । थे ग्यमटि दोसम का लिङल्या पोतु सिपिन्प तिप्नेम रो ।’
कुङक्यल डुप्सल ङ्हि नो लोङजिम फुरि दोनेम ।
‘अस्यङ ङतङ दिमरि सइपिन्जेतो !’ कुङक्यलचे पङमम खेक्पा चे ‘ङमि अखम ओइ कोन दापो ङाल्हुङ अरे, गन्टङतिङ दोसम ता लसे, ङाइलम कोलाम्हा मुप ओइ !’ पङचि । कुङक्यल लोङचि । ‘ङ चुरिनो न्हुप’ बिजिम परेनक्योर ग्या न्हेन्जिम न्हुचि । स्ह्योरि योरिनो रेजिम ह्येर्नेम ।
होतेपे कुना हेन्सो कुङक्यल ङेसे ख्लङपरि अडोङनेम । कोलाम्हा जितारि नो अनोङस्या तमम पक ङ्हिकि अपअम नो तङनेम ।
