हुन्दलि खोर्लाे

पोखरा ढुङ्गेसाँघु बिबाइ ग्लारि तामाङ दिम ङि डिक्सि टिबाइला मुला । पुरेन लमाजोङसे दोखबाइ चु दिम ङि होन्दोङ चाम पोखरा रामबजाररि मुबा । ०३१ सालहिन्से चु ग्लारि दोखबाइ चु दिम ङि चुसे सोमदिङरि दोलो बिबाइ ग्लारि तबाइला हिन्ला । चुरि खसि टिमाहिन्से चुइला चुरिन टिजि । तो रमर क्यारजा हङग्याइ थोन्बा थल्बा थोर्बा आरे । चुइला चुरिन तोक छ्यासि टिब्ला टिबन मुला ।

चुरङले तोकछ्यासि टिमा दिम ङिलान ह्रङ ह्रङकि दिम, दिमनम, दिम्सा, नम्सा छाङमान खिम्सा तसि छ्यासि जेल्सि ह्रेल्जि । ब्रेल्जि । चुरङले ब्रेल्सि खमा जिजा ब्राबा कोलामा छर्सि ग्रेन ब्योन तजि । थे ग्रेन ब्योन तबाइ कोलामालाइ दिमनम तसि कोलामा तजि । कोलामालाइ कोलामा तसि छर्सि ग्रेन तसि ह्रङ ह्रङकि ग्यामरि ब्रब खम्बा तजि । चुरङले जिजा ग्रेन, च्याङन कोइन तसि दिमनाङ ल्होनाङ दोनाङले टिबाइलाइ खालङि दिङ योसि जिन्दाइला मुला ।

चुरङले चुरङपा ज्यना जेना, सेमगि फोगि सुङगिले टिलाइ छ्यालाइ, न्हङन्हङरि छकि ख्योल्सि निलाकिरङ ताइलब्ला मुला । कोलामाकि कोलामाइ छर्सि, ह्रङह्रङकि ग्याम, ह्रङह्रङकि मेलो चुङमाहिन्से गोलेले न्हङसेन्हङ तिलोतिलो तसि निबाइला मुला । हङग्याहङग्या ख्युर्पा प्युर्पा तसि निबाइला मुला । थेक्काङले बिमा, जा न्हबाइ दिमतेन जामे न्हबाइ दिमरि मेलो फेसि निबाइ मेसो थोन्बाइला मुला ।

कोलामारि तोङपा दिमकि कोला आले सेचा जा चे न्हजि । मङपा दिमकि कोला आज्यो चासे जम चे न्हजि । जचे न्हलाइ जमेचे न्हलाइ दिम ङिकि कोलामा छाङमासे ज्याबा डोजि । ज्याबा ग्याम किन्जि । होरोङलेन ज्याबा ग्लारि ज्याबा ग्यात याङजि । कोलामासे सेमरि मन्बा छोर्बा बिबा रङबा तजि । गोलेगोले योबा ख्युप्पा तसि निबाइ ग्यामाइ चुङजि । होचु हिन्सेन मेलो फेसि निबाइ म्रु बुसि निजि ।

दिम ङिरिन टाङा खदे लजि । तसाइ जचे मुबाइ दिमरि चा फिप्क्यारसे म्राङमा जे तजि । फिप्क्यारसे च्यामा देरेम फलनाइ दिमरि टाङा, न्होर थेन याङ ख्युबा तजि । देरेम ह्रोसे सुख यङबा तजि । कोलामा ज्यबा थोन्जि । आपाआमला मिन थेन्सि न तोरले चबा तजि । फिप्क्यारसे फिप्क्यार चुरङपा हल्कि तसि निलाइ न्हङसेन्हङ सेमकि स्हु लोक्सोनो तसि खजि । देम्बादर्बारले खर्सि बिमा, दिमरि टाङा खबा तबाइ दुइहिन्छेन टाङा खबा अहिन कि जमाचानोका गिसे गि थोन्बनो निबनो लदे लजि ।

ख्यामाम थारेङकि अफिस, ग्यात, फिल्डओर्क, अध्ययन भ्रमण रो, ख्यामाम ह्रोमादेङ होलिडे, क्याम्पिङ, हकिङ, ट्रेकिङ क्यामफायर, ख्यामा चाम माइह्रोतेङ ताता ताताकि सेलिब्रेसन, लङ ड्राइभिङ, आउट होमस्टे सिटिङ थेन ख्यामाम चाम सदादा रङलेन लिभिङ टुगेदर रो । ब्रेल्साङ तमाहिन्से बिनो अतोनि तमनो जिन्जि । चुरङले फिप्क्यार फिप्क्यार टिबा तसि ज्याब्लेन फेसि निजि । म्रिङ, कोलामा, अफिस, ग्यात, ह्रो ताता ताताले दोबाइ अखम्बा तजि । नबाछबा अखम्बातेङ अयोबा अख्युप्पा तारिइ ह्रोइ अतबा तजि । चुरङले तोङपा दिमकि जमाकि आपा चा गोलेगोलेले सम्बाइ म्हेन्दो, खर्बै लप्तितेङ ज्योम्सि निबाइ लबड रङले कुम्सि निबा तजि ।

हुजुइ उल्टो जमेजे न्हबाइ आज्यो चाकि मङपा दिमरि चा जमेमासे फिप्क्यार बाइन तबा रङलेन न्हङरिइनो ज्याबा लसि खजि । हङग्या द्होलाइ दिमरिन खुसि खबा ख्युसि बबा तजि । टाङा स्होबा खम्बाहिन्से नो गिसे गिनो फ्रुलफ्रुलले ख्युसि बमा पाउण्ड तेङ डलर आइसि एनसि करेन्सि छाङमान सिक्काटाङा सोसि (ह्रुप्सि÷पोप्सि) म्युर्सि खजि । तिनिनम्स्यो काकर काकर लसि पुरेन गोठा रङबा दिम छार ज्याबा गोम्बो रङबा स्होजि । दिमरि तोबाइ स्हेमा गिसे गि पालोकि ल्हिपले प्लिङखजि । ग्याँसकुतप, दराज, धारा, बत्ति, टोइलेट छाङमान प्लिङसिइ निबा तजि । टिवि, मोबाइल, कम्प्युटर, ल्यापटपइ खुसि, दत्तेम स्कुटरइ कुल्खबाइला मुला । देरेम म्हिदङसेन कुल्बा ग्लुबान मुला ।

चुरङले ‘फिप्क्यार फिप्क्यारकि टाङाइ दिमन्हङरिन, ह्रङला जमेमातेङ प्रेप्रेन म्हामाइ ताङला ताङरिन’ तसि योबाख्युप्पा तजि । मन्बाइलातेङ पङबाइला योमाहिन्सेम स्यान्दोसेइ गुबाटिम । छाङमासेन दिबाइ मेनो दुबाटिम । चुरङलेन गि गिले दिमफिप्क्यार तोरमर क्यारजा खिम्सा नम्सारिन लि सलतेङ ह्यालले ब्रबा खम्बा तजि । ह्रोला ङ्हो ज्यब्लेन दिजि । गोलेले ह्रो ह्युलसिप्तारिइ थोन्बा ब्राबा लसि खजि । नम्सारि ह्रोकि मिन छाङमासेन किन्बा तजि । चुरङले जमेमाकि आपा जगजगपा तसि खजि ।

तिला ज न्हअखम्नि बिसि मिः दगु तबाइ मिः ह्याल तसि खब्ला मुला । ज न्हमा ह्याल तबाइ लिः दुप तसि निबाइला मुला । ख्युर्सि ख्युर्सि खाइ खरङबा दुइ खजि खजि ? खोर्लाे हुन्दलि रङबन तजि । मरकि पिर्का तोर, तोरकि पिर्का मर तजि । जकि ग्लारि जमे, जमेइ ग्लारि जका खजि । दाङबोइ ठिम रङबन तजि । स्यानरि अरेलाइ चुरिचाम, आमाकोलाइ दानरि छ्याबाइ तामाङ ह्युलकि म्हरमेनछान रङबन तजि । हुन्दलि खोर्लाे ज्याबलेन ख्युर्जि । लो हइ, चु ताम गोबादा जेखेन हिन्ला । फेर्सि ब्रबरि अहिन या ?! दिमल तम हिन्ला । दिमरिन थेसम, दिमलासे ब्होबा नि फिच्या ग्लाला ग्लारिन क्रला क्रस्या ।